Yowannisi 8 - Kafa Linguistics Project

Shunoon Maabee Yecheti Ure

¹ Aroochee Yesuusi Zayitee Michi guudooch hammiye.

² Haree maaddoona wotta yaafee kexooch wotteꞌi hammiye. Asheenaꞌo bulli bi waan waaheete. Koteꞌinoo boonoshich dojjiye.

³ Dojjii bi beetaa, Muusichi Sheeree dojjechinaꞌonaa Fariseenaꞌona shunoon maabee yecheti ureen deebiyeete; biinoo daggooch neechiꞌi,

⁴ Yesuusin “Dojjechocho, hini ure shunoon maabee danaꞌa yechetine.

⁵ Muusiyoo bi sheeroochaa ebiyoomminaꞌon ‘Xaqqoona yexi wuxibote’ iꞌi gettitone. Newochi ama gettenne?” iyeete.

⁶ Ishichii boonoshi ito, bi toommoochee mooyon daneree biin taggeya boonoshi qaawitoyichiye. Tunebaani Yesuusi yittiꞌi bi yapheroona showee toommooch kooriye.

⁷ Wochii wochiꞌi biin boonoshi echemmona, kaameꞌi, “Ittoshi daggoochee axaaxaallo xaqqoona shiichi biin yexe” iye.

⁸ Wotta yittiꞌi bi yapheroona showee toommooch kooriye.

⁹ Boonoshiyoo ishin waayeꞌi geeneenaꞌoochee tiijjiꞌi ikkikkeebee bulli kechiyeete. Yesuusi arooch bi ikkeeto echehe; ureyoo arooch neexaa beehan.

¹⁰ Yesuusi kaameꞌi ureen “Haane, neen taggetinaꞌo aayeete? Ne toommooch nallito aalle?” iꞌi echehe.

¹¹ Ureyoo “Ta doonocho, koniyoona aalloone” iyan. Yesuusiyoo “Tawoo wotta ne toommooch nallaache. Hambe; ebiyee damba guttinnoon axaaxoon shuuneyaahine” iye.]

Yesuusi Alemee Bekko Bi Tuno

¹² Wotta Yesuusi asheenaꞌoyich “Ta alemee bekko taane; taan dabbimmoyich kashoon immemmi bekko bekkehalli, cir manderoona shaꞌeyaachemmone” iꞌi gettiye.

¹³ Ebich Fariseenaꞌo “Ne, ne qellichon miixehine; ne miixo iberoo toonoone” iyeete.

¹⁴ Yesuusi wochiꞌi boonoshich ishichiye: “Ta, ta qellichon amoonolla ta miixetaa, amoochee ta waato gaata, amooch ta hammemmo gaata ariibeeto taane; ebich ta miixo gibeneetone. Tunetaa ittoshi amoochee ta waato gaata, amooch ta hammemmo gaata ariyaachote.

¹⁵ Ittoshich ashi gaboommon nalliyote; ta, ta qelloona koni toommoochona nallaache.

¹⁶ Taan wocheti Nihoo Yeeri taanna tookkiinalli ta ikkeeto toono taane; ebich ta nalligaata, ta nalloo iberoone.

¹⁷ Ittoshi sheeree daggooch wotta ‘Gutte asheenaꞌo miixammi miixo manjoone’ getaa kooreetone.

¹⁸ Ta, ta qellichon miixaabeeto taane; wotta taan deejjiti Nihoo Yeeri taachon miixee beetone” iye.

¹⁹ Ebich boonoshi “Ne nihoo aabiichiye?” iꞌi echeheete. Yesuusi wochiꞌi, “Taan woyee ta Nihoon ariyaachote. Taan ittoshi ariito gaata, ta Nihoon wotta ariyesho ittoshine” iye.

²⁰ Yesuusi eboshi bullin bi gettito, yaafee kexooch beeti gijjee kicee qiicee gaꞌoochaa dojjiibeeniye. Tunebaani bi aabo shagaano bi tunetoyich, koniyoona biin yeshaanoone.

Yesuusi Echeyoo

²¹ Yesuusi wochinnoon boonoshich “Ta hammemmo taane. Taanoo qaawemmo ittoshine; tunetaa ittoshi axaaxoona qitemmo ittoshine; ta hammaa beetooch hamon hakkaachemmo ittoshine” iye.

²² Ebich Ayihudee ukkireenaꞌo boonoshinaa boonoshina “ ‘Ta hammaa beetooch hamon hakkaachote’ bi ii beeto, amoyichiye? Bi hajjee kishoona qitiya tunehe?” iyeete.

²³ Yesuusi “Ittoshi hiniixo ittoshine; tunebaani ta damba shimaayeexo taane. Ittoshi hini alemeexo ittoshine; ta hini alemeexo toono taane.

²⁴ Ittoshich ‘Ittoshi axaaxoona qitemmo ittoshine’ iyoye. Ebiyo, ta koni ta gaata ta tunoon ariiꞌi iberiyoo ittoshi qayigaata, ittoshi axaaxoona qitemmo ittoshi tunetoyichiye” iye.

²⁵ Boonoshiyoo “Ne koni neene?” iꞌi echeheete. Yesuusiyoo “Shiichaa ittoshich ta gettetoommon taane.

²⁶ Ittoshich ta gettemmo, ittoshi toommoochoo ta nallemmi wodde mooyo beetone; tunetaa taan deejjito ibere moochechone; tawoo bi waanee ta waayeton alemoyich gettoye” iye.

²⁷ Arooba waayeti asheenaꞌo Nihoo Yeerichon boonoshich bi geton shalligaaneenaꞌone.

²⁸ Ebich Yesuusi boonoshich “Ashi Bushoon kichii ittoshi yoodiyooba, ta aroo ta tunoon, wotta ta gettaabeeto ta Nihoo gettiton baachalli, ta qelloona amoonolla ta tuniyee qayon arooba ariyemmo ittoshine.

²⁹ Taan deejjito taanna tookkii beetone; biin emirikkii beeton bulli aaboon ta tuniyaa beetoyich, ta ikkeeton dufaanoone” iye.

³⁰ Ebin bi getaa, waayetinaꞌo daggoochee meetinaꞌo boonoshi mulloon bi toommooch tooꞌiiheete.

Axaaxee Guuchittinoochee Keyo

³¹ Yesuusiyoo boonoshi mulloon bi toommooch tooꞌiiti Ayihudeenaꞌon “Ta qaaroona ittoshi beegaata, iberoon ta dabboo ittoshine;

³² iberoonoo ariyemmo ittoshine; iberoo guuchittinoochee ittoshin kichemmone” iye.

³³ Boonoshiyoo wochiꞌi, “Abrahamichi yaroo noone; konichona cir guuno tuneyaano noone. ‘Guuchittinoochee kechemmo ittoshine’ iyaꞌa aabichaꞌa noon gettenne?” iyeete.

³⁴ Yesuusi ishichiꞌi boonoshich wochiye, “Iberoon ittoshich gettoye: Axaaxoon shuuneebeeto bulli axaaxee guunone.

³⁵ Guuno bushoo tuno bi qajjitoyich, bulli yemeenoon tookki beetaachemmone; tunebaani bushoo bulli yemeenoon tookki beeyemmone.

³⁶ Illa Bushoo ittoshin guuchittinoochee bi kichigaata, iberoon guuchittinoochee kechemmo ittoshine.

³⁷ Abrahamichi yaroo ittoshi tunoon ariibeeto taane; tunebaani ta getteti qaaroon iberiyoo ittoshi qajjitoyich, taan wuxoyich qaawiyote.

³⁸ Ta, ta Nihoo waanee ta beeggeton gettoye; ittoshiyoo wotta ittoshi nihoo waanee ittoshi waayeton tuniihote” iye.

³⁹ Boonoshiyoo wochiꞌi, “No nihoo Abrahamine” iyeete. Yesuusiyoo “Abrahamichi bushiishoo ittoshi tuneto gaata, Abrahami shuunetoommon shuunesho ittoshine.

⁴⁰ Andoo Yeer waanee ta waayeti iberoon ittoshich getteto taane; tunebaani taan wuxoyich qaawiyote. Abrahami ebiyoommon shuuneyaanoone.

⁴¹ Ittoshi, ittoshi nihoo shuunetoommon shuuneebeeto ittoshine” iye. Boonoshiyoo “No aricheyaani nihoona shiijjeyaano noone. Ikke Nihoo baachiye nooch beeto; aroo Yeerine” iyeete.

⁴² Yesuusiyoo boonoshich ishichiye: “Ta Yeer waaneeniye ta waato. Ebich Yeeri ittoshi Nihoo gaata, taan shunnesho ittoshine. Bi taan wochetenalli, ta, ta aalla waataano taane.

⁴³ Ta gettaa beeton amoyich shalligaachote? Ta qaaroon waayo ittoshi mawiitoyichiye.

⁴⁴ Ittoshiyoo, ittoshi nihoo daabiloosichi bushiishoo ittoshine; ittoshi nihoochi qaatoon ceechoon shunniyote. Biyoo shiichiꞌi kashee kichechone; iberoo bi maacooch bi aalletoyich, iberee gommooch neexeyaanoone. Biyoo kootecho, kooto bullichi nihoone; ebich kootoon bi gettii beegaata, bi mullooch beeton gettiye.

⁴⁵ Tunetaa ta iberoon gettaabeeto ta tunetoyich, taan iberiyaachote.

⁴⁶ Ittoshi daggoochee taan ‘Axaaxoon shuuneto neene’ gettemmo aabine? Iberoon gettaabeeto ta tunegaata, ittoshiyochi amoyich taan iberiyaachote?

⁴⁷ Yeericho tuneto, Yeerichi qaaroon waayehe; tunebaani Yeericho ittoshi tuno qajjitoyich, bi qaaroon waayeyaachote” iye.

Abrahamiyee Aaf Yesuusi Beemo

⁴⁸ Ayihudeenaꞌo wochiꞌi, “Shamaarecho ne tunoon, yinnoo ne toommooch beemon no geto iberoo toone?” iyeete.

⁴⁹ Yesuusiyoo ishichiꞌi wochiye: “Ta toommooch yinno aalloone; ta Nihoon oogiibeeto taane; tunebaani ittoshi taan giishiihote.

⁵⁰ Tunetaa ta ‘Asho taan oogiibe’ getaache; taan oogiiya qaawiibeeto beetone; aroo taach nallii beetone.

⁵¹ Iberoon ittoshich gettoye: Ta gettaa beeton ceechiibeeto koniyoona bi beegaata, cir qitaachemmone” iye.

⁵² Ayihudeenaꞌo “And ne toommooch yinno beemon xiishaa ariito noone. Abrahami qititone; wotta keemechinaꞌoo qititinaꞌone. Tunetaa ne ‘Ta gettaa beeton ceechiibeeto koniyoona bi beegaata, cir qitaachemmone’ ii beetine.

⁵³ Iberoon ne no nihoo Abrahamiyee beshenne? Bi qititone; keemechinaꞌo wotta qititinaꞌone; ne koni taane iiniye ne beeto?” iyeete.

⁵⁴ Yesuusi ishichiꞌi boonoshich wochiye: “Ta, ta qelloon ta oogiigaata ta oogo duuboone. Taan oogiibeeto, ittoshi ‘No Nuggishoone’ ii beeti ta Nihoone.

⁵⁵ Biin ariyaano ittoshine; tunetaa ta ariibeeto taane. ‘Biin ariyaano taane’ ta getigaata, ittoshichoommon kootecho tunesho taane; tunebaani biin ariibeeto taane; bi gettitonoo ceechaabeeto taane.

⁵⁶ Ittoshi nihoo Abrahami ta woyemmi aaboon bi beeggitoyich oogichii emiriye; beeggiꞌinoo emiroona wucwucciye” iye.

⁵⁷ Ayihudeenaꞌoo “Batt aache natt bedaachine. Abrahamin amoochaa beeggenne?” iyeete.

⁵⁸ Yesuusiyoo “Iberoon ittoshich gettoye: Abrahami shiijjoyee aaf, ta beeto taane” iye.

⁵⁹ Ebich biin xaqqoona yexiree wuxiya iꞌi xaqqoon tiijjiyeete. Tunetaa Yesuusi boonoshich tuusheehe; yaafee kexoocheenoo kechiꞌi hammiye.