Yowannisi 7 - Kafa Linguistics Project

Bashee Baaroon Baariya Yesuusi Hamo

¹ Ebiyee gubb, Yesuusi Ayihudee ukkireenaꞌo biin wuxiya boonoshi qaawii beetoyich, Yihudee showoona shaꞌoon shunaanoone; ebich Galiilee showoona shaꞌee beehe.

² Ayihudeenaꞌochi Bashee (Yambaaree) Baaroo katinnii giisheche aabo echehe.

³ Ebich Yesuusichi maneenaꞌo biich “Ne tuniibeeti mooyon neen dabbii beetinaꞌo boonoshi beeggemmoyich, hiniichee tiyiree Yihudee showooch hambe.

⁴ Bi qelloon arichiyoo qaawiibeeti asho aashoona shuuneyaanoone. Hini mooyinaꞌo bullin ne tunii beetoyee, ne qelloon showee toommooch beetinaꞌo bullich arichiyoo qaawiihe” iyeete.

⁵ Bi maneenaꞌo boonoshi ishichito, bi toommooch mulloon tooꞌiyoo boonoshi qajjitoyichiye.

⁶ Yesuusi boonoshich ishichiye: “Ta aabo batti shagaanoone; tunebaani amee aabolla bi tunetaa, ittoshich kaamoone.

⁷ Alemo ittoshin bi shixxemmi naboo aalloone; tunetaa bi shuunoo gondo bi tunoon ta miixaa beetoyich, taan shixxiye.

⁸ Ittoshi hini baarooch hambote; ta aabo batt shagaanoone. Ebich hini baarooch hamaache” iye.

⁹ Ishichiꞌi boonoshich gettiichii Galiilee showooch echehe.

¹⁰ Tunebaani bi maneenaꞌo baarooch boonoshi hammitoyee gubb, Yesuusi wotta xalla bekkeyaanoon aashoona are baarooch hammiye.

¹¹ Ayihudee ukkireenaꞌo “Aroo aaye?” iibee are baaree xaaꞌoochaa qaawii beeheete.

¹² Dofee asheenaꞌo daggoochee ikkikkeenaꞌo bi toommooch oogichii guruuxii beeheete. Ikkikkeenaꞌo “Gaawe uroone” iyeete; tunebaani bareenaꞌo wotta “Gaaweyaanoone; asheenaꞌon muricii beetone” ii beeheete.

¹³ Tunetaa Ayihudee ukkireenaꞌon boonoshi shattitoyich, koniyoona biichon xalla kichii yibbaateyaanoone.

Baarooch Kiceeti Asheenaꞌoyich Yesuusi Dojjoo

¹⁴ Baaree shabaattee daggooch Yesuusi yaafee kexooch hammiꞌi asheenaꞌoyich dojjooch giyiye.

¹⁵ Ayihudee ukkireenaꞌo “Asho biich dojjaanoon, hini uro eboshi bullin aabichiꞌi ariihe?” iꞌi worganee beeheete.

¹⁶ Ebich Yesuusi tiyiꞌi boonoshich ishichiye: “Ta dojjaabeeti doyoo taan wocheto waaneenalli ta waanee toonoone.

¹⁷ Koniyoona Yeeri shunniton tuniyoyich bi qaawigaata, aroo hini ta doyoo Yeer waanee bi tunoon woyee ta, ta qelloona ta geton ariyemmone.

¹⁸ Bi qellee gaboona gettiibeeto, ashi waanee oogoon qaawiibeeti ashoone; tunetaa biin wocheton oogiiya qaawiibeeto, aroo ibere moochechone; xummittino bi mullooch aalloone.

¹⁹ Muusi Yeerichi sheeroon ittoshich imaache? Tunebaani ittoshi daggoochee are sheeroon quyeebeeto ikkolla aalloone. Taan wuxoyich aakkiya qaawii beetote?” iye.

²⁰ Asheenaꞌo wochiꞌi, “Yinno ne toommooch beetone. Konine neen wuxoyich qaawiibeeto?” iyeete.

²¹ Yesuusi wochiꞌi boonoshich ishichiye: “Ikke shuunoon shuunehoye; ittoshi bulli aroon worganehote.

²² Ittoshich, shambetooba bushiishoon dokiriibeeto ittoshine. Ebiyoo Muusi dokiriyee doyoon ittoshich bi immitoyichiye; tunetaa hini doyoon ittoshich immitinaꞌo, ittoshi qaabbechinaꞌoani Muusi toonoone.

²³ Muusichi Sheeroon quyoyich ittoshi bushiishoon shambetooba dokiriibeeto ittoshi tunegaata, ashoon ceeni bi ashittinoon shambetooba ta wodiitoyich, amoyich taan kaarehote?

²⁴ Kaachiree nallibotalli ashi aafoon ciiniree nalliyaahote” iye.

“Hini Kiristoosine?” Iꞌi Asheenaꞌo Echo

²⁵ Arooba Yerusaalemee asheenaꞌo daggoochee ikkikkeenaꞌo ishichiyeete: “No ukkireenaꞌo wuxiya boonoshi qaawiibeeto, hini uroon toone?

²⁶ Ebiyoche, kaacha gettii beehe amoone! Boonoshiyoo amoonolla getaacheete. Iberoon ukkireenaꞌo hini uro Kiristoosi bi tunoon ariiꞌi tunehe?

²⁷ Tunebaani hini amoochee gaata ariito noone; tunetaa Kiristoosi waahooba, bi woyemmo amoochee gaata koniyoona ariyaachemmone” iyeete.

²⁸ Ebich Yesuusi yaafee kexoochaa dojjiibee bi qaaroon oogichiꞌi ishichiye: “Taanoo ariibeeto ittoshine; amoochee ta waato gaata ariibeeto ittoshine. Ta, ta qelloona waataano taane; tunebaani taan wocheto gibeneetone; ittoshi biin ariyaano ittoshine.

²⁹ Tunetaa ta bi waanee waato taane; biyoo taan wochetone; ebich biin ariibeeto taane” iye.

³⁰ Ebich asheenaꞌo daggoochee ikkikkeenaꞌo biin yecha qaawii beeheete; tunetaa bi aabo batt shagaano bi tunetoyich koniyoona biin yeshaanoone.

³¹ Tunetaa asheenaꞌo daggoochee meetinaꞌo boonoshi mulloon bi toommooch tooꞌiiꞌi, “Kiristoosi waahooba, hini uro bekkiiti malleteenaꞌoyee beshoon bekkiyehe?” iyeete.

Yesuusin Yechiyoyich Ayihudee Ukkireenaꞌo Wocho

³² Asheenaꞌo ebi mooyon tiijjiꞌi Yesuusichon guruuxeebee boonoshi yibbaatee beetaa, Fariseenaꞌo waayeheete. Ebich qeeshee ukkireenaꞌo, Fariseenaꞌoo biin yechiya yaafee kechi kellechinaꞌon wocheheete.

³³ Yesuusiyoo “Batt giisheche aaboon ittoshina tookki kotemmo taane; aroochee taan wocheto waan hammemmo taane.

³⁴ Ittoshiyoo taan qaawemmo ittoshine; tunebaani daneyaachemmo ittoshine; ta beetoochoo womon hakkaachote” iye.

³⁵ Ebich Ayihudee ukkireenaꞌo boonoshinaa boonoshina “No biin daneyaachemmoyich, hini uro amooch hammane bi ii beeto? No macceenaꞌo shaceꞌi beeti Giriikeenaꞌochi katemeenaꞌooch hamiree Giriikee asheenaꞌoyich dojjoyich tunehe?

³⁶ Biyoo ‘Taan qaawemmo ittoshine; tunebaani daneyaachemmo ittoshine; ta beetoochoo womon hakkaachemmo ittoshine’ bi ii beeti hini bi yibbaatoo amoone?” iꞌi yibbaateheete.

Kashee Aachi Xuupho

³⁷ Baaree ciiroochee qaabbe aabooba Yesuusi neexee bi qaaroon oogichiꞌi, “Koniyoona shacheweto bi beegaata, ta waan waaree uye.

³⁸ Bi mulloon ta toommooch tooꞌiibeeto, Yaafe Macaafoochaa bi getteetoommon, ‘Kashee aachi xuupho bi maacoochee xuupphemmone’ ” iye.

³⁹ Ishin bi gettito, boonoshi mulloon bi toommooch tooꞌiitinaꞌo boonoshi danemmi Yaafe Ayaaneechoniye; Yaafe Ayaano batt kindaan beetone; ebiyoo Yesuusi oogoyich batt shimaajj keyaan beeto bi tunetoyichiye.

Asheenaꞌochi Daggooch Shaco Gimo

⁴⁰ Ebich dofee asheenaꞌo daggoochee ikkikkeenaꞌo hini bi yibbaatoon waayeꞌi, “Iberoon hini uro quyaa no beeti Keemechone” iyeete.

⁴¹ Bareenaꞌo “Hini uro Kiristoosine” iyeete. Tunetaa bareenaꞌo “Kiristoosi Galiilee showoochee waataachemmone.

⁴² Yaafe Macaafoochaa ‘Kiristoosi taatoo Daawiti yaroochee, Daawiti beebee echeti katemoo Beetilehemee kechemmone’ getteyaache?” iyeete.

⁴³ Ebich Yesuusichi naboona asheenaꞌo daggooch shaco tunehe.

⁴⁴ Boonoshi daggoochee ikkikkeenaꞌo biin yecha qaawiyeete; tunebaani koniyoona yeshon hakkaanoone.

Yesuusi Yeer Waanee Bi Womon Ayihudee Ukkireenaꞌo Iberiyee Qayo

⁴⁵ Yaafee kechi kellechinaꞌo, qeeshee ukkireenaꞌonaa Fariseenaꞌona waan wottee boonoshi waammona “Amoyich yechiꞌi deebaachote?” iyeete.

⁴⁶ Kellechinaꞌoo “Hini uroochoommon koniyoona yibbaatee ariyaanoone” iꞌi wochiyeete.

⁴⁷ Ebich Fariseenaꞌo “Ittoshi wotta dacheetote?

⁴⁸ Ayihudee nallechinaꞌo woyee Fariseenaꞌo daggoochee ikkolla bi waan wotteto beete?

⁴⁹ Tunebaani Muusichi Sheeroon ariyaani hini maccoo Yeerina uppetone” iꞌi wochiyeete.

⁵⁰ Aroyee aaf Yesuus waan waati, Fariseenaꞌo daggoochee ikkoo tuneti Niqoodimoosi

⁵¹ “Nallecho shiichiꞌi taggeetochi noonoochee waayeyaanoon, amoon bi shuuneto gaata ariyaanoon, ashi toommooch bi nallemmoyich no sheeroo daaggite?” iꞌi echehe.

⁵² Boonoshiyoo wochiꞌi, “Newoo wotta Galiilecho neene? Keemecho Galiilee showoochee keyaachemmone. Yaafe Macaafoochee qaawiree beege” iyeete.

⁵³ [Ebiyee gubb, boonoshi kexi kexooch hammiyeete.