Yowannisi 6 - Kafa Linguistics Project

Uuche Humeenaꞌoyich Yesuusi Maanjoo

¹ Ebiyee gubb, Yesuusi Galiilee baharoyee beqach kimmiye; biyoo Xibaaridoosee baharoone.

² Biiyechinaꞌo toommooch bi bekkiiti worganikkiti malleteenaꞌon boonoshi beeggitoyich dofee asheenaꞌo biin dabbiyeete.

³ Yesuusi geppooch kechiꞌi arooch bi dabbeenaꞌona tookkii kotehe.

⁴ Ayihudeenaꞌo baariibeeti Beshee Baaroo katinniye.

⁵ Yesuusi kaama wottee ciinniꞌi, bi waan waabeeti dofee asheenaꞌon beeggiye. Ebich Filipphoosin “Eboshi bulli maayemmi koshon amoochee kemehone?” iye.

⁶ Ishin bi gettito Filipphoosi noonoochee waayoyichalli, amoon bi shuunemmo gaata arii beetone.

⁷ Filipphoosi “Boonoshi qelli qelloona giishi giishecheenolla boonoshi maagaata, gutte balle diinaaroona kosho kemetaa boonoshich bedaache” iꞌi wochiye.

⁸ Bi dabbeenaꞌo daggoochee ikkoo, Simoon Pheexiroosichi manoo Indiriyaasi tiyiꞌi,

⁹ “Uuche gishiishi xekee sheqee koshonaa gutte haashoonon yechiti bushoo hiniich beetone; tunebaani hinin shaahe asheenaꞌoyich ebi amoon hallehe?” iye.

¹⁰ Yesuusi bi dabbeenaꞌoyich “Asheenaꞌon kotiibote” iye. Are xaaꞌoo mocechi gamini xaaꞌoone. Asheenaꞌoo koteheete; anaaminaꞌochi haddoo uuche hum bedoone.

¹¹ Yesuusiyoo koshon tiijjiꞌi Yeerin galletehe; arooch koteti asheenaꞌoyichoo bi beddemmoyich tuniihe. Ebiyoommon wotta haashoocheenoo boonoshi qaawiti wottoon boonoshich bi beddemmoyich tuniihe.

¹² Asheenaꞌo bulli maaꞌi michitoyee gubb, bi dabbeenaꞌon “Duubiyaanoon gaawichiree echeti ooyoon maci kicibote” iye.

¹³ Ebina asheenaꞌo maati uuche sheqee koshoochee echeti ooyoon kiciꞌi aaraa gutte ogooge mokkoona ceechiyeete.

¹⁴ Arooch beeti asheenaꞌo Yesuusi tuniiti malletoon beeggiꞌi, “Iberoon hini uro ‘Alemooch woyemmone’ getteeti Keemechone” iyeete.

¹⁵ Ebichi naboona asheenaꞌo bi waan waaree biin yeshi taatiiya boonoshi gaboon Yesuusi ariiꞌi, boonoshi waanee bariꞌi wochinnoon geppooch bi ikkeeto hammiye.

Baharee Aachi Toommona Yesuusi Shaꞌo

¹⁶ Showoo xumetaa Yesuusichi dabbeenaꞌo baharo beetooch hammiyeete;

¹⁷ giishi markabeech giyiꞌi baharoyee beqach Qifirinaaha wotteꞌi hammii beeheete. Areegaata showoo manderoone. Yesuusi batt boonoshi waan waataan beetone.

¹⁸ Giidechi yongo yongetoyich, baharee aaco oogichii shuuriye.

¹⁹ Uuche woyee shiritte kiilo meetiroon markabee boojjetoona yoppeebee boonoshi hammitoyee gubb, Yesuusi baharee toommona shaꞌeebee markabe waan bi katinaa beeggiꞌi keqqoona qitiyeete.

²⁰ Tunebaani aroo “Taane, shattaahote” iye.

²¹ Ebina markabeech bi giyemmoyich qaawiyeete. Bi giyitoyee gubb bekkech markabeena boonoshi hammiibeeti showooch shaggiyeete.

Yesuusin Dofee Asheenaꞌo Qaawoo

²² Dechara baharoyee haqach echeti dofee asheenaꞌo neexee beeheete; boonoshiyoo bi dabbeenaꞌo ikkeeto hamonalli Yesuusi boonoshina tookkii markabeech bi gimi qayon, wotta arooch ikke markabeyee damba baroo aallo bi tunoon ariiheete.

²³ Tunebaani [Doono galletetaa] koshon boonoshi maati xaaꞌee gaꞌooch beeti Xibaaridoosi katemoochee bare markabeenaꞌona hammiyeete.

²⁴ Arooba asheenaꞌo Yesuusinaa bi dabbeenaꞌonon arooch mucceꞌi tiyii markabeenaꞌooch giyiꞌi Yesuusin qaawooch Qifirinaaha hammiyeete.

Kashee Kosho Yesuusi Tuno

²⁵ Asheenaꞌo baharoyee beqach Qifirinaahaa Yesuusin daneꞌi, “Dojjechocho, hiniich ne waato aatoobane?” iyeete.

²⁶ Yesuusi wochiꞌi ishichiye: “Iberoon ittoshich gettoye: Taan ittoshi qaawiibeeto, koshon maaꞌi ittoshi michitoyichalli, malletoon ittoshi beeggitoyich toonoone.

²⁷ Bulli yemeenee kashoon immemmi maayoyich shuunebotalli, aallemmi maayoyich shuuneyaahote. Hini besheyaani koshon ittoshich immemmo Ashi Bushoone. Ebiyoo Nihoo Yeeri taanna bi emiroon bi miixetoyichiye” iye.

²⁸ Ebich asheenaꞌo “Yeeri qaawiibeeti shuunoon no shuunemmoyich aabichibona?” iꞌi echeheete.

²⁹ Yesuusi wochiꞌi, “Yeeri qaawiibeeti shuunoo, bi wochee deejjito toommooch mulloon ittoshi tooꞌiyoone” iye.

³⁰ Boonoshiyoo “Illa beegiree neen no iberiyemmoyich, amee malletoon bekkiyenne? Amoon shuune bekkiyenne?

³¹ ‘Boonoshi maayemmoyich shimaayoochee koshon boonoshich immiye’ getaa bi kooreetoommon, no qaabbechinaꞌo barahooch beebee mannoon maatinaꞌone” iyeete.

³² Yesuusiyoo “Iberoon ittoshich gettoye: Shimaayoochee ittoshich koshon immito, Muusi toonoone; tunebaani shimaayoochee ibere koshon ittoshich immiibeeto Yeeri ta Nihoone.

³³ Ebiyoo Yeeri immiibeeti kosho, shimaayoochee kindiꞌi alemooch beeti asheenaꞌoyich kashoon immii bi beetoyichiye” iye.

³⁴ Ebich asheenaꞌo “Doonocho, hini koshon bulli aaboon nooch imbe” iyeete.

³⁵ Yesuusi ishichiꞌi boonoshich wochiye: “Kashee kosho taane; ta waan waabeeto cir shaaceyaachemmone; bi mulloon ta toommooch tooꞌiibeeto, bulli yemeenoon cir shacheweyaachemmone.

³⁶ Ta ittoshich gettetoommon [taan] beeggito ittoshine; tunebaani ta toommooch mulloon tooꞌiyaachote.

^37-38 Shimaayoochee ta kindito, taan wocheti Yeerichi daaggoon tuniyoyichalli, ta daaggoon tuniyoyich toonoone. Ebich ta Nihoo Yeeri taach immito bulli ta waan woyemmone; ta waan waammo bullin cir maaxooch kichi dufaachemmo taane.

³⁹ Taan wochetochi daaggoo, taach bi immitoochee ikkoonolla ta aalliyaachemmonaa ciireexi aabooba qitoochee ta tiijjemmonoyichiye.

⁴⁰ Yeerichi Bushoo taan ciinniꞌi bi mulloon ta toommooch tooꞌiibeeto bulli, bulli yemeenee kashoon bi danemmoyich ta Nihoochi daaggoo ebine; tawoo ciireexi aabooba qitoochee biin tiijjemmo taane” iye.

⁴¹ Arooba Yesuusi “Shimaayoochee kinditi kosho taane” bi itoyich, Ayihudeenaꞌo bi toommooch guruuxeebee,

⁴² “Hini bi nihoonaa bi indeenon no ariibeeti Yooseefichi bushoo Yesuusi toone? Ishigaata, aabichiꞌi ‘Shimaayoochee kindito taane’ iye?” iyeete.

⁴³ Yesuusi boonoshich ishichiye: “Ittoshinaa ittoshina guruuxiyaahote.

⁴⁴ Taan wocheti Nihoo Yeeri yeepphitoyee beshetaa, ta waan womon hakkemmo koniyoona aalloone; tawoo ciireexi aabooba qitoochee biin tiijjemmo taane.

⁴⁵ ‘Boonoshi bulli Yeer waanee ariitinaꞌo tunemminaꞌone’ getaa keemechinaꞌochi macaafooch kooreetone. Illa Nihoo Yeer waanee waayeꞌi ariibeeto bulli ta waan woyemmone.

⁴⁶ Yeer waanee waatoyee damba, Nihoo Yeerin beeggito koniyoona aalloone; bi ikkeeto baachiye Nihoo Yeerin beeggito.

⁴⁷ Iberoon ittoshich gettoye: Bi mulloon ta toommooch tooꞌiibeeto, bulli yemeenee kashechone.

⁴⁸ Kashee kosho taane.

⁴⁹ Ittoshi qaabbechinaꞌo barahooch beebee mannoon maatinaꞌone; tunebaani qititinaꞌone.

⁵⁰ Shimaayoochee kinditi kosho ebine; aroochee maammo koniyoona qitaachemmone.

⁵¹ Shimaayoochee kinditi, kashoon immiibeeti kosho taane. Asho hini koshoochee bi maagaata, bulli yemeenoon beeyemmone. Showee toommooch beetinaꞌo kashoon boonoshi danemmoyich ta immemmi kosho ta meenone” iye.

⁵² Ebich Ayihudeenaꞌo “Hini uro bi meenon aabichiree nooch maanjoon hakkehe?” iꞌi boonoshinaa boonoshina hayeheete.

⁵³ Ebich Yesuusi boonoshich ishichiye, “Iberoon ittoshich gettoye: Ashi Bushoo meenon ittoshi mamo qayigaata, bi damoonoo ittoshi uyo qayigaata, ittoshi qelloona kasho ittoshich aalloone.

^54-55 Ta meeno ibere maayo, ta damoo ibere uyo bi tunetoyich, ta meenon maabeeto, ta damoonoo uchiibeeto, bulli yemeenee kashechone; tawoo ciireexi aabooba qitoochee biin tiijjemmo taane.

⁵⁶ Ta meenon maabeeto, ta damoonoo uchiibeeto taanna beeyemmone; tawoo biinna beeyemmo taane.

⁵⁷ Beeyechi Nihoo Yeeri taan wochetone; tawoo bi naboona beeyecho taane. Ebiyoommon taan maabeeto, ta naboona kashecho tuneree beeyemmone.

⁵⁸ Illa shimaayoochee kinditi kosho ebine; ittoshi qaabbechinaꞌo are koshon maaꞌi boonoshi qititoommon toonoone. Hini koshon maabeeto, bulli yemeenoon beeyemmone” iye.

⁵⁹ Ebin bi dojjito, Qifirinaaha beeti Ayihudeenaꞌo kiceebeeti kexoochaanane.

Bulli Yemeenee Kashee Qaaroon Yesuusi Geto

⁶⁰ Yesuusin dabbitinaꞌoochee meetinaꞌo ishin waayeꞌi, “Hini ashoon giiriibeeti yibbaatoone; hinin waayoon hakkemmo konine?” iyeete.

⁶¹ Tunetaa Yesuusi biin dabbitinaꞌo ebi mooyoyich boonoshi guruuxoon bi mulloona ariiꞌi boonoshich ishichiye: “Ebi ittoshich xugoone?

⁶² Illa Ashi Bushoo aaf bi waati xaaꞌooch wotteree bi keyaa ittoshi beegigaata, ama gettehote?

⁶³ Kashoon immiibeeto Yeerichi Ayaanoone; ashi giidoo amoonolla hallaache. Ta ittoshich getteti qaaro ayaanoonaa kashoonane.

⁶⁴ Tunebaani ittoshi daggoochee ebin iberiyaaneenaꞌo beetinaꞌone” iye. Yesuusi bi ishichito, bi toommooch mulloon tooꞌiyaaneenaꞌo aaboshigaata, biin beshiiree immemmo aabi gaata, shiichiꞌi bi arii beetoyichiye.

⁶⁵ Daakkiꞌi ishichiye: “Ebich ishichiyoye: ‘Nihoo Yeeri biich hakkoon imaan gaata, ta waan womon hakkemmo aalloone’ ” iye.

⁶⁶ Ebichi naboona biin dabbitinaꞌo daggoochee meetinaꞌo gubb wotteheete; aroyee gubb biin dabbaaneenaꞌone.

⁶⁷ Ebich Yesuusi aaraa gutte bi dabbeenaꞌoyich “Ittoshi wotta hamma qaawii beetote?” iye.

⁶⁸ Simoon Pheexiroosi wochiꞌi, “Ta Doonocho, koni waaniye no hammemmo? Bulli yemeenee kashee qaaro ne waaniye bi beeto.

⁶⁹ Nowoo, Yeerichi Yaafoo ne tunoon iberiito noone; ariinoo ito noone” iye.

⁷⁰ Yesuusi boonoshich “Ta, aaraa guttoo ittoshin kaacaachote? Tunetaa ittoshi daggeexi ikkoo daabiloosine” iꞌi wochiye.

⁷¹ Bi gettito, Simoonichi bushoo, Asqorootechi Yihudichoniye. Ebiyoo aaraa gutte bi dabbeenaꞌo daggoochee ikkoo tuneto biin beshiiree immemmo bi tunetoyichiye.