Yowannisi 5 - Kafa Linguistics Project

Baata Yeshe Uroon Yesuusi Wodiyoo

¹ Ebiyee gubb, Ayihudeenaꞌochi baaroo bi tunetoyich Yesuusi Yerusaalem hammiye.

² Yerusaalem, Bageenaꞌochi Kellee gaꞌooch Hibiree noonoona Beetisayidi getteebeeti ikke kote aaco beehe; uuche bashoo (yambaaro) bi guudoona beehe.

³ Eboshichi daggooch meeti biiyechinaꞌo, aaf doogeenaꞌo, baata yesheenaꞌo, boonoshi ashittino qititinaꞌoo qeyii beeheete. [Eboshi aachi shuuroon quyee beeheete.

⁴ Ikkikkoochaa Doonochi maraakoo ebi kote aacooch kindiꞌi aacon shuurikkii beehe. Ebi aaco shuuritoyee gubb shiichiꞌi are aacooch giyimmo amee biiyoocheenolla wodii beehe.]

⁵ Arooch shaashaa shimitte naton biiyeti ikke uro beehe.

⁶ Yesuusi hini qeyiibeeti uroon ciinniꞌi, and beddaahaa wodde naton eechiꞌi bi beemon ariiꞌi, “Wodoon qaawii beetine?” iꞌi echehe.

⁷ Biiyeti uroo “Ta doonocho, aaco shuurimmona, aacooch taan giijjemmi asho aalloone; ta giya iyaa, baroo tayee shiichii giyiye” iꞌi wochiye.

⁸ Yesuusiyoo “Tiyi ne yeebboon qodi shaagiree hambe” iye.

⁹ Bekkech aroochee uro wodiye; bi yeebboonoo qoddii shaaggiꞌi hammiye. Are aabo shambetoone.

¹⁰ Ebich Ayihudee ukkireenaꞌo woditi uroon “Hanaach shambetoone; shambetoona yeebboon qoddii shaagon no sheeroo daaggaanoone” iyeete.

¹¹ Tunetaa uro wochiꞌi, “Taan wodiiti uro ‘Ne yeebboon qodi shaagiree hambe’ iꞌi taach gettitone” iye.

¹² Boonoshiyoo “ ‘Ne yeebboon qodi shaagiree hambe’ iꞌi neech gettiti uro aabine?” iꞌi echeheete.

¹³ Tunebaani arooch beeti asho meeto bi tunetoyich, wotta Yesuusi asheenaꞌo daggoona aricheyaanoon beshee bi hammitoyich, woditi uro koni biin wodiito gaata ariyoon hakkaanoone.

¹⁴ Ebiyee gubb, Yesuusi uroon yaafee kexoochaa daneꞌi, “And wodito neene; ebiyee beshe mooyo ne toommooch bi waataachemmoyich, ebiyee bekk axaaxoon shuuneyaahine” iye.

¹⁵ Uro hammiꞌi Ayihudee ukkireenaꞌoyich “Taan wodiito Yesuusine” iꞌi gettiye.

¹⁶ Ebich shambetooba eboshin bi shuunetoyich, Ayihudee ukkireenaꞌo Yesuusin duꞌii beeheete.

¹⁷ Tunetaa boonoshich Yesuusi “Ta Nihoo hanaach beddaahaa shuunee beetone; tawoo ta qelloona shuunaabeeto taane” iꞌi gettiye.

¹⁸ Ayihudee ukkireenaꞌo shambetoon bi shaaddetoyich baach tuneyaanoon, bi qelloon Yeerina tachiꞌi, “Yeeri ta Nihoone” bi itoyich, biin beshoon wuxiya qaawiyeete.

Bi Bushoon Yeeri Doonjiyoo

¹⁹ Ebich Yesuusi wochiꞌi boonoshich ishichiye, “Iberoon ittoshich gettoye: Nihoo Yeeri tuniibeeto bullin bi Bushoo wotta biichoommon tunii beetone; ebich Nihoo Yeeri tuniitaa bi beeggitonalli, Bushoo bi qelloona amoonolla shuunoon hakkaache.

²⁰ Ebiyoo Nihoo Yeeri bi Bushoon shunnii bi beetoyichiye; wotta bi shuuneebeeto bullin biich bekkii bi beetoyichiye; ittoshiyoo ittoshi worganemmoyich ebiyee beshe shuunoon biich bekkiyemmone.

²¹ Nihoo Yeeri qititinaꞌon tiijjiꞌi kashoon bi imoommon, ebiyoommon bi Bushoo wotta imma bi qaawitinaꞌoyich kashoon immemmone.

^22-23 Wotta Nihoo Yeeri ikke ashi toommoochona nallaachemmone; asheenaꞌo bulli Nihoo Yeerin boonoshi oogii beetoommon ebiyoommon bi Bushoon boonoshi oogiyemmoyich, nalloo bullin bi Bushoyich immitone; ebich bi Bushoon oogiyaano biin deejjiti bi Nihoo Yeerin oogiyaanoone.

²⁴ “Iberoon ittoshich gettoye: Ta qaaroon waayeebeeto, taanoo deejjiti Yeeri toommooch mulloon tooꞌiibeeto, bulli yemeenee kashechone; qitoochee kashooch kimmitalli, nalloo bi toommooch kindaachemmone.

²⁵ Iberoon ittoshich gettoye: Qititinaꞌo Yeerichi Bushoo qaaroon boonoshi waayemmi aabo woyemmone; ebiyoo andiye; waayemminaꞌo kashoon danemminaꞌone.

²⁶ Nihoo Yeeri bi qelloona kashecho bi tunoommon ebiyoommon wotta bi Bushoyich bi qelloona kasho bi beeyemmoyich immitone.

²⁷ Biyoo Ashi Bushoo bi tunetoyich, bi nallemmoyich, Nihoo Yeeri biin doonjiitone.

^28-29 “Qititinaꞌo bulli bi qaaroon boonoshi waayemmi aabo woyemmone; deꞌoon shuunetinaꞌo kashoona boonoshi beeyemmoyich, gondoon shuunetinaꞌoo boonoshi toommooch bi nalleyemmoyich qitoochee tiyemminaꞌone. Ebich worganeyaahote” iye.

Yesuusi Koni Bi Gaata Miixeebeeti Miixeenaꞌo

³⁰ Yesuusi daakkiꞌi ishichiye: “Ta, ta qelloona ikke mooyonona tuniyoon hakkaano taane; Yeer waanee ta waayetoniye ta nallaabeeto. Taan deejjitochi daaggoonalli, ta daaggoon qaawaano ta tunetoyich, ta nalloo tatoone.

³¹ “Ta wochaꞌa ta qellichon ta miixegaata, ta miixoon iberiyemmo aalloone.

³² Taachon miixeebeeti baroo beetone; biyoo taachon miixee bi beeti miixo iberoo bi tunoon ariibeeto taane.

³³ “Ittoshiyoo Yowannis waan wocheto ittoshine; biyoo ibereechon miixetone.

³⁴ Ishichii ta ii beeto, ittoshi wodemmoyichalli, ta, ta qelloona ashi miixoon qaawaꞌa toonoone.

³⁵ Yowannisi micciibee aaxxeebeeti bekkoone; ittoshiyoo giisheche yemeenoon bi bekkoona emiriya shunnito ittoshine.

³⁶ “Tunetaa Yowannisi miixetoyee beshoon miixeebeeto taach beetone. Ebi ta tuniyaabeeti, Nihoo Yeeri shuune ta ciichemmoyich bi immiti shuunoo, Nihoo Yeeri taan bi deejjoon taachon miixee beetone.

³⁷ Wotta taan wocheti Nihoo Yeeri taachon miixetone; tunebaani bi qaaroon cir waayeyaano ittoshine; bi aafoonoo beegaano ittoshine.

³⁸ Bi wocheton ittoshi iberiyoo qajjitoyich, bi qaaro ittoshi mullooch aalloone.

³⁹ Ittoshiyoo ‘Yaafe Macaafeenaꞌoochee bulli yemeenee kashoon danemmo noone’ iibee, galliꞌi boonoshi daggooch qaawiyote; boonoshiyoo taachon miixee beetinaꞌone.

⁴⁰ Tunebaani kashoon danoyich ta waan womoyich shunaachote.

⁴¹ “Ta, ta qelloona asho taan bi oogiyemmoyich qaawaache.

⁴² Tunebaani ta ittoshin ariibeeto taane; Yeerin ittoshi mulloona shunni ittoshi qayon ariibeeto taane.

⁴³ Ta, ta Nihoochi shigoona waato taane; tunebaani ta yibbaatoon iberiyaano ittoshine. Baroo bi shigoona bi waagaata, bi yibbaatoon iberiibeeto ittoshine.

⁴⁴ Ittoshi, ittoshi qelli qelli oogoon daneya qaawiyote; tunebaani bi ikkeeto tuneti Yeer waanee danemmi oogoon qaawaachote. Illa aabichiree taan iberiyoon hakkehote?

⁴⁵ “Taan ‘Nihoo Yeer waan hamiree noon taggemmone’ getiree gabiyaahote. Ittoshin taggemmo beetone; aroo ittoshi gibeneebeeti Muusine.

⁴⁶ Bi taachon kooritone; ebich biin ittoshi iberiito gaata, taan iberiyesho ittoshine.

⁴⁷ Bi kooriton iberiyaanoon ittoshi qajjitoyee, ta yibbaatoon aabichiree iberiyehote?” iye.