Yowannisi 4 - Kafa Linguistics Project

Shamaarechi Ureena Tookkii Yesuusi Yibbaato

¹ Arooba Yesuusi Yowannisiyee beshoon dofee asheenaꞌon bi dabbiyoonaa aacona bi afaalloonon Fariseenaꞌo waayeheete.

² Tunebaani aacona afaallii beetinaꞌo bi dabbeenaꞌoani, bi toonoone.

³ Yesuusi ebin ariiꞌi, Yihudee showoochee tiyii Galiilee showooch wottee hammiye.

⁴ “Shamaaree showooch shagaanoon hamaache” ii

⁵ aroona Shamaaree showooch beeti Sikaari katemooch shaggiye. Are katemoo beeto Yaaqobi bi bushoo Yooseefich bi immiti showee gaꞌoochiye.

⁶ Arooch Yaaqobichi aachi oppo beetone. Yesuusiyoo gommi shaꞌoona maraateꞌi arooch kasheya aachi oppee gashooch kotehe; arooba areddee shiritte saati bedoone.

^7-8 Bi dabbeenaꞌo manjeyemmi maayoon kemeya katemooch hammiyeete. Aree hillooch ikke Shamaarechi ure aacon kitta, are aachi oppo beetooch waahan. Yesuusi are ureen “Aacoochee kitiree taach imbe, uyone” iye.

⁹ Shamaarechi ure wochaꞌa, “Ne Ayihudee asho tunaachaa, Shamaarechi ta waanee aabichaꞌa aacon ucha qollenne?” iyan. Bi ishichito, Ayihudeenaꞌoyich Shamaareenaꞌona tookkii yesho aallo bi tunetoyichiye.

¹⁰ Yesuusi wochiꞌi ureyich “Yeeri immiibeeti wojjoon, wotta ‘Aacon taach imbe, uyona’ ii beeti ta koni ta tunoonon, ne ariito gaata, ne taan qolleshi neene; tawoo kashee aacon neech immesho taane” iye.

¹¹ Ure “Ta doonocho, ne kittemmi qiico neech aalloone; aachi oppoo genjoone. Illa kashee aacon amoochee deebenne?

¹² Hini aachi oppoon nooch immito no qaabbechi nihoo Yaaqobine; biyoo, bi bushiishoo, bi miimo bulliyoo hiniichee uchitinaꞌone. Newochi biyee besho neene?” iyan.

¹³ Yesuusiyoo wochiꞌi, “Hini aacoochee uchiibeeto bulli wochinnoon shachewemmone;

¹⁴ tunebaani ta immaabeeti aacoochee uchiibeeto koniyoona bulli yemeenoon shacheweyaachemmone. Ta immaabeeti aaco bi maacooch bulli yemeenee kasho xuupphiibeeti tunoo tunemmone” iye.

¹⁵ Ure “Ta doonocho, ta shacheweyaachemmoyich, wochinnoon aacon kitta hiniich ta waataachemmoyich, are aacon taach imbe” iyan.

¹⁶ Yesuusi “Hamiree ne kenoon ceegiree wobe” iye.

¹⁷ Ure wochaꞌa, “Keno taach aalloone” iyan. Yesuusiyoo “ ‘Keno taach aalloone’ ne geto iberoone.

¹⁸ Ebiyee aaf uuche kenechi neene; tunebaani and neenna tookkii beeto ne keno toonoone. Ebich ne getteto iberoone” iye.

¹⁹ Ure “Ta doonocho, keemecho ne tuno taach bekkeebeete.

²⁰ No qaabbechinaꞌo hini guudoochaa Yeerich goyinneheete. Ayihudo ittoshiyoo ‘Asho Yeerich goyinni bede xaaꞌoo Yerusaalem ikkeetoani, baroo aalloone’ iyote” iyan.

²¹ Yesuusi ureyich ishichiye: “Haane, ta gettaa beeton iberiibe; hini guudoochaa tuneba Yerusaalemaa, Nihoo Yeerich ittoshi goyinneyaachemmi yemeeno woyemmone.

²² Ittoshi, ittoshi ariyaanoyich goyinneebeeto ittoshine; tunebaani no, no arii beetoyich goyinnaabeeto noone. Ebiyoo wodoo bi daneebeeto Ayihudeenaꞌo waanaa bi tunetoyichiye.

²³ Tunebaani iberittinoona goyinnee beetinaꞌo, Nihoo Yeerich Yaafe Ayaanee hakkoonaa iberittinoona boonoshi goyinnemmi yemeeno woyemmone; andoo waatone; Nihoo Yeeri biich boonoshi goyinnemmoyich eboshiyoomminaꞌon qaawii beetone.

²⁴ Yeeriyoo Ayaanoone; biich goyinnee beetinaꞌo Yaafe Ayaanee hakkoonaa iberittinoona goyinno boonoshich qaawiihe” iye.

²⁵ Ure “Kiristoosi getteebeeti Masihi bi woyemmon ariibeeti taane; bi waahooba bullin kaachiree nooch gettemmone” iyan.

²⁶ Yesuusiyoo “And neech gettaabeeto, aroo taane” iye.

²⁷ Arooba bi dabbeenaꞌo boonoshi hammitoochee wottee waaꞌi, Yesuusi ureena tookkii bi yibbaatoyich worganeheete; tunebaani boonoshi daggoochee koniyoona ureen “Amoon qaawii beetine?” woyee Yesuusin “Amoyichiye ureena tookkaa ne yibbaataabeeto?” ito aalloone.

²⁸ Ure arooch aachi qondoon duppaachaa katemooch hammahan. Arooch beeti asheenaꞌoyich

²⁹ “Ta tuniito bullin taach gettiti uroon waaree beegote! Aroo Kiristoosi tunehe?” iyan.

³⁰ Ebina waayetinaꞌo katemoochee kechiꞌi are Yesuusi beetooch hammiyeete.

³¹ Ebi tunee beetaa, bi dabbeenaꞌo “Dojjechocho, maayoon mame” iꞌi ataalliyeete.

³² Tunebaani aroo “Ittoshi ariyaani maayo taach beetone” iye.

³³ Ebich bi dabbeenaꞌo boonoshinaa boonoshina “Bi maayemmi maayoon asho biich deebiꞌi tunehe?” iyeete.

³⁴ Yesuusi wochiꞌi boonoshich ishichiye: “Taach maayo geto, taan wochetochi daaggoon ceechoonaa bi shuunoon ciichoonane.

³⁵ Ittoshi ‘Batt maayi qecoyich awudde ageno echete’ ii beetaachote? Ittoshich gettoye: Gocheti maayoon manjii ciinote; maayo qecceya bedditone.

³⁶ Andolla qecciibeeto bi caajjee gatiyoon deqqii beetone; shookkechonaa qeccechona ikkooch tookkiree boonoshi emiremmoyich, qecciibeeto aafeti maayoon bulli yemeenee kashoyich kicii beetone.

³⁷ Ebich ‘Ikkoo shookkiye; ikkoo qecciye’ immi yibbaatoo iberoo tunetone.

³⁸ Tawoo ittoshi maraateyaanoon ittoshi qeccemmoyich ittoshin daachiihoye. Bareenaꞌo maraateheete; ittoshiyoo boonoshi maraateton qecciyote” iye.

³⁹ Arooba ure “Ta tuniito bullin taach gettiye” iyaꞌa bi miixeti qaaroona are katemooch beeti Shamaaree asheenaꞌo daggoochee meetinaꞌo boonoshi mulloon Yesuusi toommooch tooꞌiiheete.

⁴⁰ Shamaaree asheenaꞌo Yesuus waan waaꞌi, “No waan kotebe” iꞌi qolleheete. Yesuusiyoo arooch gutta qeyiye.

⁴¹ Bi noonoochee waayetinaꞌo daggoocheenoo meetinaꞌo boonoshi mulloon bi toommooch tooꞌiiheete.

⁴² Ureyichoo “And no mulloon bi toommooch no tooꞌiito, ne noonoochee no waayetoyich toonoone; no qelloona no bi noonoochee waayaꞌa, iberoon alemooch beetinaꞌo bullin Wodiyecho bi tunoon no ariitoyichiye” iyeete.

Taatee Naayochi Bushoon Yesuusi Wodiyoo

⁴³ Gutte qemoyee gubb Yesuusi aroochee kechiꞌi Galiilee showooch hammiye.

⁴⁴ Ebiyee aaf Yesuusi “Keemechon bi shiijjee showeexi asheenaꞌo oogiyaachemminaꞌone” iꞌi gettitone.

⁴⁵ Galiilee showooch bi shaggimmona, Galiilee asheenaꞌo kechiꞌi biin giijjiyeete. Ebin boonoshi tuniito, boonoshi qelloona wotta Beshee Baaroyich Yerusaalem boonoshi hamiyooba Yesuusi aroochaa bi shuuneto bullin boonoshi beeggitoyichiye.

⁴⁶ Yesuusi aacon woyinee uyo bi tuniiti, Galiilee showooch beeti, Qaani katemooch wochinnoon wotteꞌi hammiye. Arooba Qifirinaaha bi bushoo biiyeti ikke taatee naayo beehe.

⁴⁷ Biyoo Yesuusi Yihudee showoochee Galiilee showooch bi womon waayehe; bi bushoo qitiya bi mawiitoyich Yesuus waan hammiꞌi, “Ta kexooch waaree, biiyeti ta bushoon wodiibe” iꞌi qollehe.

⁴⁸ Ebich Yesuusi “Worganikkiti malletoonaa gaakkechi shuunoonon ittoshi beego qayigaata, ta toommooch mulloon cir tooꞌiyaachote!” iye.

⁴⁹ Taatee naayoo “Ta doonocho, ta bushoo qitaan beetaa, hambone” iye.

⁵⁰ Yesuusiyoo “Hambe; ne bushoo kashoona beeyemmone” iye. Uroo Yesuusichi qaaroon iberiiꞌi hammiye.

⁵¹ Aroo hammii bi beetaa, bi aafee bushiisheenaꞌo gommoochaa biinna daneꞌi, “Ne bushoo woditone” iyeete.

⁵² Biyoo “Ambiche saatoochiye ta bushoo wodito?” iꞌi echehe. Boonoshiyoo “Yiich shabaatte saatoochiye bi achee gaamoo aqqeto” iyeete.

⁵³ Nihoo “Ne bushoo kashoona beeyemmone” Yesuusi ito areegaata bi tunoon shalligiye. Ebich biinnaa bi kechi asheenaꞌo bullina boonoshi mulloon Yesuusi toommooch tooꞌiiheete.

⁵⁴ Ebiyoo Yesuusi Yihudee showoochee Galiilee showooch wottee waaꞌi bi tuniiti guttinnee malletoone.