Yowannisi 21 - Kafa Linguistics Project

Baharee Gashoochaa Bi Dabbeenaꞌoyich Yesuusi Bekko

¹ Ebiyee gubb, Yesuusi Xibaaridoosee baharee gashoochaa bi dabbeenaꞌoyich wochinnoon bekkehe; bi bekketoo eechiꞌiniye:

² Simoon Pheexiroosinaa Qaappoo getteebeeti Toomaasina, Galiilee showeexi Qaani katemoochee tuneti Naatinaꞌeeliyoo, Zebidiyoosi bushiisheenaꞌo, bi dabbeenaꞌo daggoocheenoo bare gutteenaꞌo eboshi tookkii beeheete.

³ Simoon Pheexiroosi boonoshich “Haashoon yecha hammaabeeto taane” iye. Boonoshiyoo “Wotta nowoo neenna tookki hambone” iyeete. Hammiꞌi giishi markabeech giyiyeete; aroobee xum haashoo amoonolla yeshaanoon hariiheete.

⁴ Haree maaddoona, Yesuusi baharee gashooch neexee beehe; tunebaani bi dabbeenaꞌo Yesuusi bi tunoon ariyaaneenaꞌone.

⁵ Yesuusi “Ta bushiisheenaꞌote, haashoo ittoshich beete?” iꞌi echehe. Boonoshiyoo “Amolla aalloone” iꞌi wochiyeete.

⁶ Biyoo “Ittoshi dabboon markabee qanne badd dufote; danemmo ittoshine” iye. Boonoshiyoo dabboon duppiyeete; bekkech meeti haashoo yechetoyich, geechi kichemmon mawiiheete.

⁷ Yesuusi shunniibeeti bi dabboo Pheexiroosich “Hini no Doonone!” iye. Simoon Pheexiroosi Doono bi tunoon waayeꞌi, shokkaachoon beeto bi tahoon taheꞌi baharee daggooch awureehe.

⁸ Boonoshiyoo aachi gashoochee gutte balle hira bedoani oogichii wohaaneenaꞌone. Ebich bare Yesuusichi dabbeenaꞌo haashoo ceenniti dabboon geechiibee markaboona aachi gashooch kechiyeete.

⁹ Showooch boonoshi kinditoyee gubb, koshonaa shoohaa gecheti qaaqqee toommooch beeti haashoonon beeggiyeete.

¹⁰ Yesuusi “And ittoshi yechiti haashoochee taach deebote” iye.

¹¹ Simoon Pheexiroosiyoo markabee toommooch kechiꞌi balli aachaa keejje ogooge haasheenaꞌo ceenniti dabboon showooch geechiye; ebi shaahoon haashoo woddetaanona dabbo keexeyaanoone.

¹² Yesuusiyoo “Waa shaafiroon mamote” iye. Doono bi tunoon boonoshi ariitoyich, bi dabbeenaꞌo daggoochee ikkolla “Ne koni neene?” iꞌi echoyich aafoon kuppheto aalloone.

¹³ Yesuusiyoo giddee koshon tiijjiꞌi boonoshich immiye; daakkiꞌi haashoonoo immiye.

¹⁴ Yesuusi qitoochee bi tiyitoyee gubb, bi dabbeenaꞌoyich bi bekketo hinina keejjinnoone.

Pheexiroosin Yesuusi Echo

¹⁵ Maayoon boonoshi maatoyee gubb, Yesuusi Simoon Pheexiroosin “Yoonichi bushoo Simoono, eboshiyee beshoon taan shunnenne?” iꞌi echehe. “Eeha ta Doonocho, neen ta shunon ne ariibeeto neene” iye. “Ta bagee bushiisheenaꞌon qiddebe” iye.

¹⁶ Wochii guttinnoon “Yoonichi bushoo Simoono, taan shunnenne?” iꞌi echehe. “Eeha ta Doonocho, neen ta shunon ne ariibeeto neene” iye. “Ta bagee hageenaꞌon quyebe” iye.

¹⁷ Keejjinnoon “Yoonichi bushoo Simoono, taan shunnenne?” iꞌi echehe. Keejjinnoon “Taan shunnenne?” iꞌi bi echetoyich, Pheexiroosi ayiniꞌi, “Ta Doonocho, bullin ariibeeto neene; neen ta shunon ne ariibeeto neene” iye. Yesuusiyoo “Ta bageenaꞌon qiddebe.

¹⁸ Iberoon neech gettoye: Gurimaashoo ne beehooba, ne kishoona tahaꞌa ne shunnemmooch hammaa beehine. Tunebaani ne geenehooba, ne kishoon yaggemmo neene; baroo neech tajjemmone; ne shunaanooch neen daammemmone” iye.

¹⁹ Ebin bi gettito, Pheexiroosi am shaahe qitoona Yeerin bi oogiyemmo gaata bekkiyoyichiye. Ishichiꞌi tiyii, “Taan dabbibe” iye.

Bi Shunniibeeti Bi Dabboochon Yesuusi Geto

²⁰ Pheexiroosi guuddii wotteꞌi Yesuusi shunniibeeti bi dabboo Yesuusin bi dabboon beeggiye; aroo ebiyee aaf gifiree mami saatooch Yesuusichi gaꞌooch katinniꞌi, “Ta Doonocho, neen beshiiree immemmo konine?” iꞌi echetone.

²¹ Pheexiroosiyoo biin beeggiꞌi Yesuusin “Ta Doonocho, ebiyochi aabichiree tunehe?” iꞌi echehe.

²² Yesuusiyoo “Wottaꞌa ta waammi wottoon bi beeyemmoyich ta shuni gaatochi, neen amo qaaqqiye? Ne taan dabbibe” iye.

²³ Ebich “Are bi dabboo qitaachemmone” immi woroo maneenaꞌo waan waayeehe; tunebaani Yesuusi “Wottaꞌa ta waammi wottoon bi beeyemmoyich ta shuni gaatochi, neen amo qaaqqiye?” iyalli, “Qitaachemmone” getaanoone.

²⁴ Eboshin miixeebeeto, hininoo koorito hini bi dabboone; bi miixeto iberoo bi tunoon ariibeeto noone.

²⁵ Yesuusi shuuneti wodde bare mooyo wotta beetone; bulli ikka gutta getaa bi kooreeto gaata, kooreeti macaafeenaꞌoyich alemo bedaachemmo taach shaahii beete.