Yowannisi 20 - Kafa Linguistics Project

Qitoochee Yesuusi Timo

¹ Shabaattee batti batti aaboobee maaddoona, showoo batt haraan beetaa, Magidalechi Maariyami maasho beetooch hammahan; maasheexi oppee kello keppheeti ooge xaqqo aroochee ikke badd bi ikoon beeggahan.

² Wocona hammaꞌa Pheexiroosinaa Yesuusichi dabbeenaꞌo daggoochee Yesuus shunniibeeti bare bi dabboona waan shaggaꞌa, “No Doonon oppoochee kichii daammitinaꞌone; amooch boonoshi geddito gaata ariyaano noone” iyan.

³ Ebina Pheexiroosinaa bare Yesuusichi dabboona kechiꞌi maasho beetooch woceheete.

⁴ Guttee qareꞌi woceheete; tunebaani bare Yesuusichi dabboo Pheexiroosin gubb duppiichii aaf besheꞌi wocona maasheexi oppooch shaggiye;

⁵ oppee kelloochaa yittiꞌi ciinniꞌi, bi kaappeti qoreddoon baach beeggiye; tunebaani oppee maac giyaanoone.

⁶ Simoon Pheexiroosi dabbii shaggiꞌi oppee maac ikkot wocona giyiꞌi arooch beeti andire kaafenoon beeggiye.

⁷ Wotta bi qellooch caacceeti kaafenee caaco ikke badd bi qelloona koteꞌi beemonalli kaafenoona tookkii bi beemi qayon beeggiye.

⁸ Arooba shiichiꞌi maashooch shaggiti Yesuusichi bare dabboo wotta bi hillooch oppee maac giyihe; beeggiꞌinoo iberiihe.

⁹ Tunebaani “Qitoochee timo biich qaawiihe” ii beeti Yaafe Macaafee qaaroon batt shalligaaneenaꞌone.

¹⁰ Aroochee are Yesuusichi dabbeenaꞌo wotteꞌi kexooch hammiyeete.

Magidalechi Maariyamich Yesuusi Bekko

¹¹ Tunetaa Maariyami eeppaabee oppee gaꞌooch neexaa beehan. Eeppaabee yittaꞌa oppee maac ciinnahan.

¹² Nacce qoreddoon taheti gutte maraakeenaꞌo Yesuusichi cahoo qeyiti xaaꞌooch, ikkoo qoyaa, ikkoo baataa koteꞌi boonoshi beetaa, beeggahan.

¹³ Boonoshiyoo “Haane, amoyichiye ne eeppaabeeto?” iyeete. Areyoo “Ta Doonon daammitinaꞌone; amooch boonoshi geddito gaata ariyaane taane” iyan.

¹⁴ Ishin gettaachaa gubb guuddaa ciinnaꞌa, neexeꞌi beeti Yesuusin beeggahan; tunebaani Yesuusi tunoon ariyaaneene.

¹⁵ Yesuusiyoo “Haane, amoyichiye ne eeppaabeeto? Koniniye ne qaawiibeeto?” iye. Areyoo becheeti mixinaꞌon quyeebeeti uro biich bi shaahaa, “Ta doonocho, biin ne daammeto gaata, amooch ne geddeto gaata taach get; hamiree daambone” iyan.

¹⁶ Yesuusi “Maariyame” iye. Areyoo guuddaa wottaꞌa Hibiree noonoona “Rabbuno!” iyan; ishi geto “Dojjechocho!” getone.

¹⁷ Yesuusiyoo “Taan yechaahine; batt Nihoo Yeer waan keyaan beeto taane. Tunebaani hamiree ta maneenaꞌoyich ‘ “Ta, ta Nihoonaa ittoshi Nihoona waan, ta Nuggishoonaa ittoshi Nuggishoona waan kechemmo taane” itone’ gete” iye.

¹⁸ Aroochee Magidalechi Maariyami hammaꞌa Doonon bi beegonaa biich bi gettitonon bi dabbeenaꞌoyich gettahan.

Bi Dabbeenaꞌoyich Yesuusi Bekko

¹⁹ Ebi are shabaattee batti batti aaboobee xum, Yesuusichi dabbeenaꞌo Ayihudee ukkireenaꞌon boonoshi shattitoyich, kelloon tuggeechii kiceeꞌi boonoshi beetaa, Yesuusi giyii boonoshi daggooch neexeꞌi, “Diggoo ittoshich tunebe” iye.

²⁰ Ishin gettiꞌi tiyii bi gutte kishoonaa bi naaboonon boonoshich bekkiihe. Bi dabbeenaꞌoo Doonon beeggiꞌi emiroona wucwucciyeete.

²¹ Yesuusi wochinnoon “Diggoo ittoshich tunebe. Nihoo Yeeri taan bi wochetoommon ta wotta ittoshin wochaabeeto taane” iye.

²² Ishin bi gettitoyee gubb boonoshi toommooch kachiichii, ishichiye: “Yaafe Ayaanoon deꞌote;

²³ konichi axaaxoonona ittoshi maarigaata, Yeeri boonoshin maaremmone; konichi axaaxoonona ittoshi maaroo qayigaata, Yeeriyoo boonoshin maaraachemmone” iye.

Toomaasich Yesuusi Bekko

²⁴ Tunebaani aaraa gutteenaꞌo daggoochee ikkoo Qaappoo boonoshi ii beeti Toomaasi, kexooch waa Yesuusi giyiyooba, boonoshi daggooch aalloone.

²⁵ Ebich bare Yesuusichi dabbeenaꞌo biich “No, Doonon beeggeto noone” iyeete. Tunetaa aroo “Bi kishooch bi xogeeti malletoon ta beegaan gaata, bi kishooch bi xogeeti malletooch ta yapheroon ta giijjaan gaata, ta kishoonoo ginoona kocheeti bi naabooch giijjaꞌa ta beegaan gaata, iberiyaache” iye.

²⁶ Shimitte qemoyee gubb, bi dabbeenaꞌo wochinnoon kechi daggooch beeheete; Toomaasiyoo boonoshina tookkii beehe. Kello tuggeechaa Yesuusi waahe; boonoshi daggoochoo neexeꞌi, “Diggoo ittoshich tunebe” iye.

²⁷ Aroyee gubb Toomaasin “Ne yapheroon deebiree ta kisheenaꞌon yeshiree beege; ne kishoon deebiree ta naabooch giijjibe. Iberiiton tunebaani iberiyaanoon tuneyaahine” iye.

²⁸ Toomaasi “Ta Doonocho, ta Nuggishoocho!” iꞌi wochiye.

²⁹ Yesuusiyoo “Taan ne beeggetoyichiye ne iberiito; beegaanoon iberii beetinaꞌo diireetinaꞌone” iye.

Hini Mishiraachoon Yowannisi Kooriti Naboo

³⁰ Yesuusi hini macaafooch kooreyaani bare wodde malleteenaꞌon bi dabbeenaꞌo aafoochaa tuniitone.

³¹ Tunebaani Yesuusi aroo Kiristoosi Yeerichi Bushoo bi tunoon ittoshi iberiyemmoyich, bi toommooch mulloon tooꞌiiree bi shigoona kashoon ittoshi danemmoyich, ebi kooreetone.