Yowannisi 2 - Kafa Linguistics Project

Yesuusi Aacon Woyinee Uyo Tuniyoo

¹ Keejjinnee qemooba Galiilee showooch beeti Qaani katemooch gaaro geddeehe. Yesuusichi indee are gaarooch beehan.

² Yesuusinaa bi dabbeenaꞌona wotta are gaarooch ceekkeꞌi hammitinaꞌone.

³ Woyinee uyo ciiretaa, Yesuusichi indee biich “Woyinee uyo boonoshich ciiretoche” iyan.

⁴ Yesuusiyoo “Ta indeene! Ta shuunee daggooch giyaahine. Ta saato batt shagaan beetone” iye.

⁵ Arooba Yesuusichi indee qoomechinaꞌoyich “Ittoshich bi gettimmo bullin tuniibote” iyan.

⁶ Ayihudeenaꞌo ceechiibeeti xallee doyoyich koteti shiritte xaqqee shareenaꞌo (gaaneenaꞌo) arooch beetinaꞌone; are shareenaꞌoo boonoshi qelli qelloona gutte woyee keejje geetee aacon yechii beetinaꞌone.

⁷ Yesuusiyoo qoomechinaꞌon “Shareenaꞌooch aacon ceechibote” iye. Shareenaꞌooch aacon cipphayii ceechiyeete.

⁸ “And kitiree qoomechinaꞌochi ukkiroyich imbote” iye. Boonoshiyoo kittii immiyeete.

⁹ Ukkiroo woyinee uyo tuneti aacon nappheꞌi, amoochee bi waato gaata ariyaanoone; tunebaani aacon kittiti qoomechinaꞌo arii beetinaꞌone. Ebich qoomechinaꞌochi ukkiroo woꞌee kenoon ceeggiꞌi,

¹⁰ “Asho bulli shiichiꞌi bi giddiibeeto shaawi wuure uyooniye; iibbeenaꞌo uchii michitoyee gubbiye waaroon bi giddiibeeto; tunebaani ebi shaawi woyinee uyoon and beddaahaa asheenaꞌoyich imaano neene” iye.

¹¹ Yesuusi hini malletoon shiichiꞌi Galiilee showooch beeti Qaani katemoochaa tuniihe; arooba bi oogee yiiroon bekkiihe. Ebich bi dabbeenaꞌo boonoshi mulloon bi toommooch tooꞌiiheete.

¹² Ebiyee gubb Yesuusi bi indee, bi maneenaꞌonaa bi dabbeenaꞌona tookkii Qifirinaahi katemooch kindiye; aroochoo giisheche aaboon koteheete.

Giixechinaꞌon Yaafee Kexoochee Yesuusi Kichoo

¹³ Ayihudeenaꞌochi Beshee Baaroo katinniye. Ebich Yesuusi Yerusaalem hammiye.

¹⁴ Yaafee kechi addibaaboochaa gatteenaꞌon, bageenaꞌonaa uggeenaꞌonon kemmii beetinaꞌon, wotta gijjoon shaddii beetinaꞌonoo kotee boonoshi beetaa danehe.

¹⁵ Woderee yaraafoon yexxiꞌi (woderiꞌi) bullin, bageenaꞌonoo, gatteenaꞌonoo, yaafee kechi kibboochee kichiye; gijjee shaddechinaꞌochi gijjoon shacciye; boonoshi madoon yangiye.

¹⁶ Uggoon kemmii beetinaꞌon “Ittoshi uggoon hiniichee kichibote! Ta Nihoo kexon giixee kexon tuniyaahote!” iye.

¹⁷ Bi dabbeenaꞌo “Ne kechi qanaato taan michemmone” getaa kooreyoon shalligiyeete.

¹⁸ Ayihudee ukkireenaꞌo Yesuusin, “Ebin tuniyee aalloo neech bi beemoyich amee malletoon nooch bekkiyenne?” iyeete.

¹⁹ Yesuusi wochiꞌi, “Hini yaafee kexon happibote; ta keejje qemona wochiree haggemmo taane” iye.

²⁰ Ebich Ayihudee ukkireenaꞌo “Hini yaafee kexo hagaa bi qannito aabbaa shiritte natonane; ne ebin keejje qemona wochiree haggenne?” iyeete.

²¹ Arooba Yesuusi “yaafee kexo” bi ito, bi ashittinooniye.

²² Ebich qitoochee bi tiyitoyee gubb, bi dabbeenaꞌo ebi bi gettiton shalligiyeete; Yaafe Macaafoochoo kooreetonaa Yesuusi gettiti qaaroonon iberiiheete.

Ashi Mullooch Beeton Yesuusi Ariyoo

²³ Beshee Baarooba Yesuusi Yerusaalem beebee bi tuniiti malleteenaꞌon beeggiꞌi meeti asheenaꞌo boonoshi mulloon bi toommooch tooꞌiiheete.

²⁴ Tunebaani Yesuusi asho bullin arii beetone; ebich boonoshin gibeneyaanoone.

²⁵ Biyoo bi qelloona ashi mullooch beeti mooyon bi arii beetoyich, ashi mooyon biich ashi miixo amolla qaawiyaanoone.