Yowannisi 19 - Kafa Linguistics Project

¹ Arooba Phelaaxoosi Yesuusin daammiꞌi arengoona xooppiihe.

² Ginee naayinaꞌo taatee malletoon tuneti gubbichoon angixoochee gengiꞌi bi qellooch ukiiheete; damere tahoon biich tajjiyeete.

³ Aroochee bi waan giddeebee, “Ayihudeenaꞌo taatoocho, ne taatittino manjibe!” ii cooqqiree diggiyoon diggiiheete; biinoo tappeheete.

⁴ Phelaaxoosi wochinnoon maaxooch kechiꞌi boonoshich “Bi toommooch amee gondoonona danee ta qayon ittoshi ariyemmoyich, biin maach ittoshich kichemmo taane” iye.

⁵ Arooba Yesuusi angichi gubbichoon bi uketonaa damere tahoon bi tahetona maaxooch kechiye; Phelaaxoosi boonoshich “Ebiyoche uro!” iye.

⁶ Qeeshee ukkireenaꞌonaa yaafee kechi kellechinaꞌona beeggiꞌi, “Yoode! Yoode!” iibee cookeeheete. Phelaaxoosiyoo “Ittoshi daamiree yoodote; bi toommooch ta nallemmi amee gondoonona daneyaano taane” iye.

⁷ Ayihudeenaꞌo wochiꞌi, “Nooch sheeroo beetone; bi qelloon Yeerichi Bushoo bi tuniitoyich, no sheeroochaa qita beddiye” iyeete.

⁸ Phelaaxoosi ishin waayeꞌi aafichoyee beshoon oogichii shattiye.

⁹ Wottee bi kibbooch giyiꞌi Yesuusin “Amoocheeniye ne waato?” iꞌi echehe. Tunebaani Yesuusi minnakanna getaanoone.

¹⁰ Phelaaxoosi “Amoyich taach getaachine? ‘Yooddebe’ woyee ‘Biichebe’ geto ta kishooch tunoon ariyaachine?” iye.

¹¹ Yesuusiyoo wochiꞌi, “Yeeri daaggaan gaata, ta toommooch amoonolla tuniyoon hakkaachesho neene; ebich neech taan beshiiꞌi immitochi axaaxoo beshoone” iye.

¹² Arooba Phelaaxoosi Yesuusin biicha qaawiye; tunebaani Ayihudeenaꞌo “Hinin ne biishigaata, Qesaari xiboo toono neene; bi qelloon taatiibeeto bulli Qesaarin biiꞌeya itone” iꞌi cookeeheete.

¹³ Phelaaxoosi ishin waayeꞌi Yesuusin maaxooch kichiye; aroochee Xaqqee Godo getteebeeti, woyee Hibiree noonoona Gabeta getteebeeti xaaꞌooch beeti nallee gabberooch kotehe.

¹⁴ Ebi aabo, Beshee Baaree Qanniyee aaboone; areddee shiritte saati bedoone. Phelaaxoosi Ayihudeenaꞌon “Ebiyoche, ittoshi taatoo!” iye.

¹⁵ Tunetaa boonoshi “Wokkiibe! Wokkiibe! Yoode!” iibee cookeeheete. Phelaaxoosi “Ittoshi taatoon yoodote?” iye. Qeeshee ukkireenaꞌo “Qesaariyee damba bare taatoo nooch aalloone” iꞌi wochiyeete.

¹⁶ Ebich arooba Phelaaxoosi Yesuusin boonoshi yooddemmoyich beshiiꞌi immiye.

Yesuusi Yooddeyoo

¹⁷ Aroochee Yesuusin yechiꞌi daammiyeete; bi yooddeyemmi masqaloon shaaggii katemoochee kechiꞌi Qellee Koofee Xaaꞌoo woyee Hibiree noonoona Golgooti gettee beetooch shaggiye.

¹⁸ Aroochaa biin masqalee toommooch yooddiyeete; biinna tookkii bare gutteenaꞌon qanninaa yoochinooch, Yesuusin daggooch tuniiꞌi yooddiyeete.

¹⁹ Phelaaxoosi wotta “Naazireetechi Yesuusi, Ayihudeenaꞌochi Taatoo” ii beeton kooriiꞌi masqalee toommooch xogiihe.

²⁰ Yesuusi yooddeti xaaꞌoo Yerusaalem katino bi tunetoyich, Ayihudeenaꞌo daggoochee meetinaꞌo hini are kooreeton shemmeheete; bi kooreetoo Hibiree noonoona, Roomee noonoonaa Giriikee noonoonane.

²¹ Ebich qeeshee ukkireenaꞌo Phelaaxoosin “ ‘Hini aroo “Ayihudeenaꞌo taatoo taane” iꞌi itone’ getiree kooriballi, ‘Ayihudeenaꞌochi Taatoo’ getiree kooriyaahine” iyeete.

²² Phelaaxoosiyoo “Ta kooriton koorito taane” iꞌi wochiye.

²³ Ginee naayinaꞌo Yesuusin boonoshi yoodditoyee gubb, bi taheenaꞌon daammii, boonoshi ikkikkoyich ikke qoodoo shaggemmoyich tuniiꞌi, awudde beera qoodiyeete. Kocheyaanoon baad shippeti genje bi tahoon wotta daammiyeete. Hini are genje taho ikke guude gawoani, guttoo xaaqqaa kocheto toonoone.

²⁴ Ebich ginee naayinaꞌo boonoshinaa boonoshina “Ixoo kuxaa konich bi kechemmo gaata, beegonalli keexxaayone” iyeete. Ebi bi tuneto, “Ta taheenaꞌon boonoshinaa boonoshina qoodeeheete; genje ta tahoochoo ixoon duppiyeete” ii beeti Yaafe Macaafee qaaro bi ceennemmoyichiye. Ginee naayinaꞌoo tuniito ebiniye.

²⁵ Yesuusi yooddeti masqalee gaꞌooch bi indee, bi indee manee, Qeliyoophi mechee Maariyaminaa Magidalechi Maariyamina neexee beeheete.

²⁶ Wotta bi indeenaa bi dabbeenaꞌo daggoochee bi shunniti ikkoona bi gaꞌooch neexee beetinaꞌon beeggiꞌi, bi indeen “Ta indeene, ebi ne bushoone” iye.

²⁷ Are bi dabboon “Meni ne indeene” iye. Aroochee tiyiꞌi are bi dabboo Yesuusichi indeen bi kexooch daammiye; are bi kexooch beehan.

Yesuusi Qitoo

²⁸ Ebiyee gubb, Yesuusi mooyo bulli ceenon ariiꞌi, Yaafe Macaafee qaaro ceennemmoyich “Shachewehoye” iye.

²⁹ Kiikkere woyinee uyoona ceenniti qiico arooch koteꞌi beehe; boonoshiyoo kiikkere uyee daggooch isponjoon hacciꞌi deebii hisoophee michi waamona bi noonooch giddiiheete.

³⁰ Yesuusiyoo kiikkeroon shuuciꞌi bi uchitoyee gubb, “Mooyo bulli ceennitone” iye; qelloochaa yittiye; bi kashoo abbetehe.

Yesuusichi Naaboo Kocheyoo

³¹ Ebi aabo Qanniyee aaboone; Ayihudee ukkireenaꞌo yooddeti asheenaꞌo boonoshi doshoon tiishaa dubeno masqalee toommoochee bi kindemmoyich Phelaaxoosin qolleheete. Ebin boonoshi tuniito, shambetee aaboon dubeno masqalee toommooch bi tuneyachemmoyich, wotta are shambetoo bariti shambetoo bi tunetoyichiye.

³² Ginee naayinaꞌo aafichochi doshoon, biinna tookkii yooddeti baroochi doshoonoo tiichiyeete.

³³ Tunetaa Yesuus waan boonoshi giddemmona, shiichiꞌi bi kasho abbetoon beeggiꞌi bi doshoon tiishaaneenaꞌone.

³⁴ Tunebaani ginee naayinaꞌo daggoochee ikkoo Yesuusichi naaboon ginoona kochiye; bekkech aroochee damoonaa aacona kechiye.

³⁵ Ebin beeggito miixetone; ittoshiyoo wotta Yeeri toommooch mulloon ittoshi tooꞌiyemmoyich miixetone. Bi miixeto iberoone; bi gettitoo iberoo bi tunoon arii beetone.

³⁶ Ebi bi tuneto, “Bi shaawushoochee ikkolla tiisheyaachemmone” getteeti Yaafe Macaafooch kooreeti qaaro ceennemmoyichiye.

³⁷ Wotta bare xaaꞌoochaa Yaafe Macaafooch kooreeti qaaro “Boonoshi kochiton beeggemminaꞌone” ii beetone.

Yesuusi Duukko

³⁸ Ebiyee gubb, Ayihudee ukkireenaꞌon bi shattitoyich aashoona Yesuusichi dabboo tuneti Arimaatechi Yooseefi Yesuusichi cahoon daamma Phelaaxoosin qollehe; Phelaaxoosiyoo Yooseefich daaggiye. Ebich Yesuusichi cahoon hammii kindiiꞌi daammiye.

³⁹ Wotta ebiyee aaf xumoona Yesuus waan waati Niqoodimoosi shaashaa awudde kiilo giraam bede hareboonaa ereetoonon yechiꞌi waahe.

⁴⁰ Yesuusichi cahoon daammiꞌi Ayihudeenaꞌo duukkeebeeti doyoommona hini are hareboonaa cinnechi bare buddinoonon geddiꞌi andire kaafenoona kaappiyeete.

⁴¹ Yesuusi yooddeti xaaꞌooch becheeti mixinaꞌo beetinaꞌone; are michi daggooch konichi dubenolla duukkeyaani andire oppo beehe.

⁴² Ayihudeenaꞌochi Qanniyee aabo bi tunetoyich, wotta are oppo katino bi tunetoyich, Yesuusichi cahoon arooch duukkiyeete.