Yowannisi 18 - Kafa Linguistics Project

Yesuusichi Yecheyoo

¹ Yesuusi ishichiꞌi bi corootitoyee gubb, bi dabbeenaꞌona tookkii tiyiꞌi becheeti mixinaꞌo beeti xaaꞌooch, Qedirooni bamboyee beqach hammiye; biyoo, bi dabbeenaꞌoo are becheeti michi daggooch giyiyeete.

² Yesuusinaa bi dabbeenaꞌona meeti areddoon arooch kicee beeheete; ebich biin beshiiree immemmi Yihudi are xaaꞌoon arii beetone.

³ Ebina Yihudi, faanusoonaa ceechoonon, ginoonaa gaachoonon yechiti ginee naayinaꞌon, wotta qeeshee ukkireenaꞌonaa Fariseenaꞌona wocheti yaafee kechi kellechinaꞌon dabbiiꞌi waahe.

⁴ Arooba Yesuusi bi toommooch woyemmi mooyo bullin ariiꞌi kechii, “Koniniye ittoshi qaawiibeeto?” iꞌi echehe.

⁵ Boonoshiyoo “Naazireetechi Yesuusiniye” iꞌi wochiyeete. “Aroo taane” iye. Beshiiꞌi immiti Yihudi wotta boonoshina tookkii arooch neexee beetone.

⁶ Yesuusi boonoshich “Aroo taane” bi immona, gubb kisheꞌi showooch dihiyeete.

⁷ Wochinnoon Yesuusi “Koniniye ittoshi qaawiibeeto?” iꞌi echehe. Boonoshiyoo “Naazireetechi Yesuusiniye” iyeete.

⁸ Yesuusi wochiꞌi, “Aroo taane iyaꞌa ittoshich getaachote? Illa taan ittoshi qaawiibeeto gaata, hinoshin qayote, hambeete” iye.

⁹ Ishichii bi ito, “Hini taach ne immetinaꞌo daggoochee ikkoonolla aalliyaano taane” bi iti qaaro bi ceennemmoyichiye.

¹⁰ Simoon Pheexiroosi bi cuyeti goraadoon kaaccii daachiiꞌi qeeshee guudoochi guuno qanne waamon karii kindiihe; uroochi shigoo Malikoosine.

¹¹ Yesuusi Pheexiroosin “Ne goraadoon bi gonenooch wochibe; Nihoo Yeeri taach bi immiti xuuxee xoofoochee uchaayote?” iye.

Yesuusin Haanni Aafooch Boonoshi Neechoo

¹² Arooba hume ginee iraashoonaa bi ginee naayinaꞌona Ayihudee yaafee kechi kellechinaꞌona tookkii Yesuusin yechii cuchiyeete;

¹³ shiichiꞌi Haanni waan daammiyeete; Haanni aroobee natooba qeeshee guudo tuneti Qeyaafichi abboone.

¹⁴ Qeyaafiyoo “Ikke uro asheenaꞌochi keroyich bi qitoo gaawiye” iꞌi Ayihudee ukkireenaꞌoyich kocciti uroone.

Yesuusin Pheexiroosi Nookko

¹⁵ Simoon Pheexiroosinaa bare dabboona Yesuusin dabbiyeete. Are Yesuusichi dabboo qeeshee guudoona arichee beetone; ebich Yesuusina tookkii qeeshee guudoochi kibbooch giyiye.

¹⁶ Tunetaa Pheexiroosi kellee maach neexee beehe. Arooba qeeshee guudoona aricheebeeti bare Yesuusichi dabboo kechi kellechich gettiꞌi Pheexiroosin giijjiye.

¹⁷ Are kelloon quyaabeeti shaajjetee Pheexiroosin “Ne wotta hini uroochi dabbeenaꞌo daggoochee ikkoo ne toone?” iyan. “Ta toono taane” iye.

¹⁸ Arooba showoo aqqoo bi tunetoyich wocheyechinaꞌonaa kellechinaꞌona qaaqqoon shookkii gechiiꞌi neexee kachii beeheete; Pheexiroosiyoo wotta boonoshina tookkii neexeꞌi kachii beehe.

Yesuusin Qeeshee Guudo Echo

¹⁹ Qeeshee guudo Yesuusin bi dojjeechonaa bi dabbeenaꞌochonon echehe.

²⁰ Yesuusiyoo wochiꞌi, “Asheenaꞌo bullich kaacha getteto taane; Ayihudeenaꞌo kiceebeeti kexonaa boonoshi bulli ikkooch kiceebeeti yaafee kexonoochaa bulli aaboon dojjito taane; aashoona gettaa ariyaano taane.

²¹ Illa amoyichiye taan ne echaabeeto? Boonoshich ta gettaa beetaa waayeti asheenaꞌon echebe; boonoshich ta getteton arii beetinaꞌone” iye.

²² Yesuusi bi ishichimmona, arooch neexeebeeti yaafee kechi kellechinaꞌo daggoochee ikkoo “Qeeshee guudoyich ishichaꞌa wochinne?” iꞌi Yesuusin tappehe.

²³ Yesuusiyoo wochiꞌi, “Gondoon ta getteto gaata, ta gondoon miixebe; ta getteto tato gaata, amoyich taan tappenne?” iye.

²⁴ Aroochee Haanni Yesuusin bi cucheetona qeeshee guudo Qeyaaf waan daachiihe.

Yesuusin Wochinnoon Pheexiroosi Nookko

²⁵ Simoon Pheexiroosi andoo neexeꞌi qaaqqoon kachii beehe. Arooch neexee beetinaꞌo daggoochee ikkikkeenaꞌo “Ne wotta Yesuusi dabbeexi ikkoo toono neene?” iyeete. Biyoo “Ta toono taane” iꞌi nookkehe.

²⁶ Bi waamon Pheexiroosi kuxxiti uroochi xiboo, qeeshee guudoochi guuninaꞌo daggoochee ikkoo, Pheexiroosin “Becheeti michi daggoochaa Yesuusina tookkaa ne beetaa beegaachote?” iye.

²⁷ Pheexiroosi wochinnoon nookkehe; areegaata bekkech baakkoo kuukkiye.

Yesuusin Phelaaxoosi Aafooch Boonoshi Neechoo

²⁸ Yesuusin Qeyaaf waanee Yihudee iraashoo kibbooch daammiyeete. Showoo batt maaddoone; Ayihudeenaꞌo “Iraashoo kibbooch giyaꞌa no eeꞌegaata Beshee Baaree maayoon mamon hakkaachemmo noone” iꞌi boonoshi shattitoyich, iraashoo kibbooch giyaaneenaꞌone.

²⁹ Ebich Phelaaxoosi boonoshi beeti maaxooch kechiꞌi, “Hini uro toommooch ittoshi yaaqqiibeeti taggoo amoone?” iꞌi echehe.

³⁰ Boonoshiyoo wochiꞌi, “Hini uro gondoon bi shuunetaan gaata, ne waan deebaachesho noone” iyeete.

³¹ Phelaaxoosiyoo “Wochi daamiree ittoshi sheeroona nallibote” iye. Ayihudee ukkireenaꞌo “No koninolla no wuxemmoyich, ittoshi sheeroo daaggaanoone” iyeete.

³² Ebi bi tuneto, Yesuusi amoommi qitoon bi qitemmo gaata bekkiyoyich bi gettiti qaaro ceennemmoyichiye.

³³ Phelaaxoosi wochinnoon kibbooch giyii Yesuusin ceeggiꞌi, “Ne Ayihudeenaꞌo taatoo neene?” iꞌi echehe.

³⁴ Yesuusi wochiꞌi, “Ishichaa ne taan echaabeeto, ne qelloonanee asho neech getenane?” iye.

³⁵ Phelaaxoosiyoo wochiꞌi, “Ta Ayihudo taane? Ne asheenaꞌonaa qeeshee ukkireenaꞌonane neen taach beshiiꞌi immitinaꞌo. Halla amooniye ne hallito?” iye.

³⁶ Yesuusi wochiꞌi, “Ta taatittine hini alemeexi tooneene. Ta taatittine hini alemeexi bi tuneto gaata, Ayihudee ukkireenaꞌoyich beshiitaa ta icheyaachemmoyich ta dabbeenaꞌo koyeshinaꞌone; tunebaani ta taatittine hini alemeexi tooneene” iye.

³⁷ Phelaaxoosi “Ishigaata, taatoo neene?” iye. Yesuusi wochiꞌi, “Taatoo ta tunoon newolla gettaa beetine. Ta, ibereechon miixeya ebich shiijjeto taane, alemoochoo waato taane. Iberoochee tuneto bulli ta qaaroon waayemmone” iye.

³⁸ Phelaaxoosiyoo “Iberoo amoone?” iye. Phelaaxoosi ishichiichii, wochinnoon Ayihudee ukkireenaꞌo waan maach kechiꞌi, “Ta bi toommoochee gondoon daneyaano taane.

Qitee Nalloo Yesuusi Toommooch Nalleyoo

³⁹ Tunebaani Beshee Baarooba taan echeꞌi cuchetinaꞌo daggoochee ikkoon biichiyoo ittoshich doyoone. Ishigaata, Ayihudeenaꞌo taatoon ta biishon shunnehote?” iꞌi echehe.

⁴⁰ Boonoshiyoo wochiꞌi, “Barbaani biicheballi, hini uro biichaaye” iibee cookeeheete; ebi Barbaani bokkoone.