Yowannisi 16 - Kafa Linguistics Project

¹ Daakkiꞌi Yesuusi ishichiye: “Xugo ittoshin bi dichaachemmoyich ebi bullin ittoshich getteto taane.

² Ayihudeenaꞌo kiceebeeti kexoochee ittoshin yookkemminaꞌone; ebiyeenoo wotta ittoshin wuxemminaꞌo bullich boonoshi shuunoo Yeerich gaacheebeeto bi shaahemmi aabo woyemmone.

³ Ebin ittoshi toommooch boonoshi tuniyemmo, Nihoo Yeerinoo taanoo boonoshi tuushitoyichiye.

⁴ Ebin boonoshi tuniyemmi aabo waahooba, ittoshich ta getteton ittoshi shalligemmoyich, ebin ittoshich getteto taane” iye. “Ittoshina tookkaa batt ta beetoyich, shiichaꞌa ittoshich ebin getaano taane.

Yaafe Ayaano Shuunemmi Shuunoo

⁵ Tunetaa and taan wocheto waan hammaabeeto taane; ittoshi daggoocheenoo ‘Amoochiye ne hammaabeeto?’ getiree taan echemmo aalloone.

⁶ Tunebaani ebin ittoshich ta gettetoyich, ittoshi maacoona oogichii ayinito ittoshine.

⁷ Tunetaa iberoon ittoshich gettoye: Ta hamo qayigaata, Kupphiyecho ittoshi waan waataachemmone; ebich ta hamo ittoshich gaawiye. Ta hamigaata, biin ittoshich deejjemmo taane.

⁸ Aroo waaree, alemoon axaaxeechon, cadiqeechonaa nalleechonon boonoshin ittibatemmone.

⁹ Bi ittibatemmo axaaxeechon, ta toommooch mulloon tooꞌiyoon boonoshi qajjitoyichiye.

¹⁰ Cadiqeechon, Nihoo Yeer waan ta hammaa beetoyich, ebiyee gubb, taan beegaachemmo ittoshi tunetoyichiye.

¹¹ Nalleechonoo, alemoon hajjiibeeto toommooch nalloo kinditoyichiye.

¹² “Batt ittoshich ta gettemmi wodde mooyo beetone; tunebaani and ittoshich ta getigaata, ittoshich maggemmone.

¹³ Tunebaani iberoon bekkiibeeti Ayaano bi waahooba, iberoo bulliich ittoshin yaabemmone. Bi waayeton baach gettehalli, bi qellee aalloona getaachemmone; woyemmi mooyon ittoshich gettemmone.

¹⁴ Aroo ta waanee bi waayeton ittoshich gettemmone; ebina taan oogiyemmone.

¹⁵ Nihoo Yeerich beeto bulli taachone; ebich ‘Ta waanee bi waayeton ittoshich gettemmone’ iyoye” iye.

Ayinoyee Gubb Emiroo

¹⁶ Ebichi hillooch Yesuusi “Giisheche aaboyee gubb taan beegaachemmo ittoshine; aree hillooch wotta giisheche aaboyee gubb taan beeggemmo ittoshine” iye.

¹⁷ Bi dabbeenaꞌo daggoochee ikkikkeenaꞌo boonoshinaa boonoshina “ ‘Giisheche aaboyee gubb taan beegaachemmo ittoshine; wotta giisheche aaboyee gubb taan beeggemmo ittoshine; ebiyoo Nihoo Yeer waan ta hammaa beetoyichiye’ iꞌi nooch bi gettiibeeto ebi mooyo amoone?” iyeete.

¹⁸ “Illa ‘Giisheche aabo’ bi ii beeto ebi amoone? Ama bi ii beeto gaata nooch aricheyaache” iyeete.

¹⁹ Yesuusiyoo ebi mooyon bi waanee echeya boonoshi qaawoon ariiꞌi boonoshich ishichiye: “Ittoshinaa ittoshina echeebeeto, ‘Giisheche aaboyee gubb taan beegaachemmo ittoshine; wotta giisheche aaboyee gubb taan beeggemmo ittoshine’ ta itoyichiye?

²⁰ Iberoon ittoshich gettoye: Eeppemmo ittoshine; muushenemmo ittoshine; tunebaani alemo oogichi emiremmone. Ittoshi muushenemmo ittoshine; tunebaani ittoshi muusheno emirooch shaddeyemmone.

²¹ Shiyemmi ure maaxoo biin maammona maacerahane; tunebaani bushoon bi shiyetoyee gubb, bushoo hini alemooch bi shiijjetoyich emiraꞌa, aafi bi xuuxoon battahan.

²² Illa ittoshi and ayiniibeeto ittoshine; tunebaani wochinnoon ittoshin beeggemmo taane; arooba emiroona wucwuccemmo ittoshine; ittoshi emiroonoo boggemmo aalloone.

²³ Arooba amoonolla taan echeyaachemmo ittoshine. Iberoon ittoshich gettoye: Nihoo Yeeri ta shigoona ittoshi qollemmo bullin ittoshich immemmone.

²⁴ Hanaach beddaahaa ta shigoona amoonolla qolleyaano ittoshine; ittoshi emiroo bi ceennemmoyich qollebote. Ittoshi qollemmon danemmo ittoshine” iye.

Alemoon Yesuusi Kochii Wochoo

²⁵ “Hini mooyo bullin ittoshich ta getteto shaahiyoona bi tunetaanoona, Nihoo Yeerichon shaahiyoona tuneyaanoon kaacha ta gettemmi aabo woyemmone.

²⁶ Arooba Nihoo Yeerin ta shigoona qollehotalli, ta ittoshi keroyich qollemmo taane getiree getaache.

²⁷ Ebiyoo taan ittoshi shunnitoyich, Yeer waanee ta womon ittoshi iberiitoyich, Nihoo Yeeri bi qelloona ittoshin bi shunnii beetoyichiye.

²⁸ Nihoo Yeer waanee kechaꞌa hini alemooch waato taane; wochinnoon hini alemoochee wotteree Nihoo Yeer waan hammemmo taane” iye.

²⁹ Bi dabbeenaꞌo “And kaacha gettaabeeto neene; hini ne gettaabeeto shaahiyoona toonoone.

³⁰ Bulli mooyon ariibeeto ne tunoon, koniyoona neen echo qaawiyee bi qayonoo and ariito noone; ebich Yeer waanee ne womon iberiito noone” iyeete.

³¹ Yesuusiyoo boonoshich ishichiꞌi wochiye: “And iberiitote?

³² Waayebote! Ittoshi qelli qelloona ta ikkeeton dufiichi ittoshi kexi kexooch ittoshi shacemmi aabo woyemmone; andoo shaggitone. Tunebaani Nihoo Yeeri taanna tookkii bi tunetoyich, ta ikkeeto toono taane.

³³ “Taanna diggoo ittoshich bi tunemmoyich, ebi bullin ittoshich getteto taane. Alemo ittoshin duꞌiyemmone; tunebaani kupphebote; ta alemoon kochaa wochito taane” iye.