Yowannisi 15 - Kafa Linguistics Project

Ibere Woyinee Qombee Indo Yesuusi Tuno

¹ “Ibere woyinee qombee indoo taane; gochiꞌi bechitoo ta Nihoone.

² Ta toommooch beechii aafeyaani ato bullin kuxi wokkiyemmone; aafoon aafeebeeto bullinoo woddiiree bi aafemmoyich qephemmone.

³ Ittoshich ta getteti qaaroona and xalleto ittoshine.

⁴ Taanna tookki ikkottebote; tawoo ittoshina tookki ikkottemmo taane. Woyinee ato bi indo aalloon bi qelloona aafoon aafo hakkoo bi qayoommon, ebiyoommon taanna tookkii ikkotto ittoshi qayigaata, aafoon aafo hakkaachemmo ittoshine.

⁵ “Woyinee qombee indoo taane; ittoshiyoo ato ittoshine. Ta aalloon amoonolla halloon hakkaachemmo ittoshine. Ebich taanna beemmo, tawoo biinna beemmo, aroo wodde aafoon aafemmone.

⁶ Koniyoona taanna beetaano bi tunegaata, kuxxii maaxooch dufaa shuuqqiibeeti ateenaꞌoommon tunemmone; boonoshinoo kiciree qaaqqooch duppemminaꞌone; michishoo gettemminaꞌone.

⁷ Taanna ittoshi beegaata, ta getteti qaaroo ittoshi mullooch bi beegaatoo, ittoshi shunnimmo bullin qollebote; ittoshich ichemmone.

⁸ Wodde aafoon ittoshi aafegaata, ta dabboonoo ittoshi tunegaata, ebina ta Nihoo oogemmone.

⁹ “Nihoo Yeeri taan shunoommon ta wotta ittoshin shunneto taane; ta shunoona beebote.

¹⁰ Ta Nihoo ‘Tuniibe’ iꞌi bi gettiton ta ceechoommon, bi shunoonoo ta beemoommon, ‘Tuniibote’ iyaꞌa ta getteton ittoshi ceechigaata, ta shunoona beeyemmo ittoshine.

¹¹ Ta emiraabeeti emiroona ittoshi emiremmoyich, ittoshi emiroo bi ceennemmoyich, ebi bullin ittoshich getteto taane.

¹² Ittoshin ta shunnetoommon, ittoshinaa ittoshina shunebote. Tuniibote ta ii beeto ebine.

¹³ Asho bi shunechinaꞌochi keroyich bi kashoon beshii bi imigaata, ebiyee beshe shuno konichona aalloone.

¹⁴ ‘Tuniibote’ iyaꞌa ittoshich ta getteto bullin ittoshi tuniigaata, ta shunecho ittoshine.

¹⁵ Guuno bi doono tuniiya gabiton ariyaanoone; ebich ebiyee damba ittoshin guuno getaache. Tunetaa ittoshin ‘Ta shunechinaꞌo’ ito taane; ta Nihoo waanee ta waayeto bullinoo ittoshich getteto taane.

¹⁶ Ta ittoshin kaaccehoani ittoshi taan kaacaano ittoshine. Nihoo Yeeri ta shigoona ittoshi qolleto bullin ittoshich bi immemmoyich, hamiree beeyemmi aafoon ittoshi aafemmoyich ittoshin ukkiriito taane.

¹⁷ Illa ittoshinaa ittoshina shunebote. Tuniibote iyaꞌa ittoshich ta gettaabeeto ebine” iye.

Kiristoosichi Dabbeenaꞌon Alemo Shixo

¹⁸ “Alemo ittoshin bi shixigaata ittoshiyee aaf taan bi shixon ariibote.

¹⁹ Hini alemeexo ittoshi tuneto gaata, biicho tuneton shunneshone; tunebaani alemee daggoochee ittoshin kaacceto taane; ebich bi magecho toono ittoshine; ebichi naboonane alemo ittoshin bi shixxiibeeto.

²⁰ ‘Guuno bi doonoyee beshaanoone’ iyaꞌa ittoshich ta getteton batteyaahote. Taan boonoshi duꞌiigaata, ittoshin wotta duꞌiyemminaꞌone. Ta getteti qaaroon boonoshi ceechigaata, ittoshi gettemmi qaaroon wotta ceechemminaꞌone.

²¹ Taan wochee deejjiton boonoshi ariyoo qajjitoyich, ebi bullin ta naboona ittoshi toommooch shuunemminaꞌone.

²² Ta waaꞌa boonoshich getaan gaata, boonoshich axaaxoo tuneyaacheshone; tunetaa and boonoshi shuuneti axaaxee naboyich boonoshi wochemmi noonoo aalloone.

²³ Taan shixxiibeeto, ta Nihoon wotta shixxii beetone.

²⁴ Asho koniyoona shuuneyaani shuunoon boonoshi daggooch ta shuuneyaan gaata, boonoshich axaaxoo tuneyaacheshone; tunebaani and hini ta shuuneto bullin beeggitinaꞌone; taanoo ta Nihoonoo shixxitinaꞌone.

²⁵ Ebi tuneto, boonoshi Sheeree Macaafoochaa ‘Naboo aalloon taan shixxiyeete’ getaa kooreeto bi ceennemmoyichiye.

²⁶ “Nihoo Yeer waanee ittoshich ta deejjemmi Kupphiyecho, iberoon bekkiibeeti Ayaano, Nihoo Yeer waanee kechiꞌi bi waahooba, aroo taachon miixemmone.

²⁷ Ittoshiyoo wotta shiichiꞌi taanna tookkii ittoshi beetoyich, taachon miixemmo ittoshine” iye.