Yowannisi 14 - Kafa Linguistics Project

Nihoo Yeer Waan Bechiibeeti Gommo Yesuusi Baach Tuno

¹ Yesuusi daakkiꞌi bi dabbeenaꞌoyich ishichiye: “Ayini xuuxeyaahote; ittoshi mulloon Yeeri toommooch tooꞌiibote; wotta ta toommoochoo tooꞌiibote.

² Ta Nihoo kexooch wodde beeyi xaaꞌoo beetone. Ebi toonee gaata, ittoshich gettesho taane. Ta hammaabeeto ittoshich xaaꞌoon qanniyoyichiye.

³ Hammaꞌa xaaꞌoon ittoshich ta qanniitoyee gubb, ta beetooch ittoshi tunemmoyich wotteree waa ta waan ittoshin daammemmo taane.

⁴ Ta hammaabeeti xaaꞌooch shakkiyemmi gommon ariibeeto ittoshine” iye.

⁵ Aroochee Toomaasi “Ta Doonocho, ne hammaabeeti xaaꞌoon ariyaano noone; aabichiree gommon ariyehone?” iye.

⁶ Yesuusi wochiꞌi, “Gommonaa iberoona, kashoonoo taane; ta waanaa tuno bi qayigaata Nihoo Yeer waan womon hakkemmo koniyoona aalloone.

⁷ Taan ittoshi ariito gaata, wotta ta Nihoon ariyesho ittoshine. Hanaachina tiijjiꞌi biin ariito ittoshine; biinoo beeggito ittoshine” iye.

⁸ Filipphoosi “Ta Doonocho, Nihoo Yeerin nooch bekkiibe; aroo nooch beddiye” iye.

⁹ Yesuusi biich ishichiye: “Haano Filipphooso, meeti aaboon neenna tookkaa koteto taane; hanaach beddaahaa taan ariyaachine? Taan beeggito Nihoo Yeerin beeggitone. Aabichaꞌa, ‘Nihoo Yeerin nooch bekkiibe’ inne?

¹⁰ Tawoo Nihoo Yeerina ta beemon, Nihoo Yeeriyoo taanna bi beemon iberiyaachine? Ittoshich ta gettaabeeti qaaroon ta gettaabeeto, ta waanee toonoone; tunebaani ebi bi shuunoon shuuneebeeto, taanna beeti Nihoo Yeerine.

¹¹ Tawoo Nihoo Yeerina ta beemon, Nihoo Yeeriyoo taanna bi beemon iberiibote. Ebi tuno qayigaata, ta shuuneti shuunee naboona iberiibote.

¹² Iberoon ittoshich gettoye: Bi mulloon ta toommooch tooꞌiimmo ta shuunaabeeti shuunoon aroo wotta shuunemmone; ta, Nihoo Yeer waan hammaa ta beetoyich ebiyee beshe shuunoonolla shuunemmone.

¹³ Bi Bushoo tawoo, Nihoo Yeerichi oogee yiiroon asheenaꞌoyich ta bekkiyemmoyich, ta shigoona ittoshi qolleebeeto bullin tuniyemmo taane.

¹⁴ Amoonolla ta shigoona ittoshi qollegaata, tuniyemmo taane” iye.

Yaafe Ayaaneechon Yesuusi Gibenikkoo

¹⁵ “Taan shunniibeeto ittoshi tunegaata, ‘Tuniibote’ iyaꞌa ta getteton ceechemmo ittoshine.

¹⁶ Tawoo Nihoo Yeerin qollemmo taane; bulli yemeenoon ittoshina tookki bi beeyemmoyich, bare Kupphiyechon ittoshich deejjemmone.

¹⁷ Biyoo iberoon bekkiibeeti Ayaanoone; alemo biin beegaanoonaa ariyaanoona bi tunetoyich, bi mullooch qeejjiꞌi biich hajjeyoon hakkaache; tunebaani ittoshi waan beeyemmone; ittoshi mulloochoo qeyemmone; ebich biin ariibeeto ittoshine.

¹⁸ Nihaalli bushiishoommon ittoshin dufaachemmo taane; ittoshi waan woyemmo taane.

¹⁹ Ta hammemmo katinnitone; ebiyee gubb, alemo guttinnoon taan beegaachemmone; tunetaa ittoshi taan beeggemmo ittoshine. Kashecho ta tunetoyich, ittoshiyoo kashecho tunemmo ittoshine.

²⁰ Ta, ta Nihoona ta beemoommon, ittoshiyoo taanna ittoshi beemon, tawoo ittoshina ta beemon arooba ariyemmo ittoshine.

²¹ ‘Tuniibe’ iyaꞌa ta getteton deꞌa iꞌi tuniibeeto, taan shunniibeeto aroone; taan shunnii beeton ta Nihoo shunnemmone; tawoo shunnemmo taane; biichoo bekkemmo taane” iye.

²² Arooba Asqorootechi Yihudiyee bare Yihudi tiyiꞌi, “Ta Doonocho, alemoyich bekkeyaanoon nooch ne bekkemmo aabichireeshiye?” iye.

²³ Yesuusi wochiꞌi biich ishichiye: “Taan shunniibeeto koniyoona bi beegaata, ta getteton ceechemmone; ta Nihoo biin shunnemmone; bi waanoo woyemmo noone; bi waanoo beeyemmo noone.

²⁴ Taan shunaano ta qaaroon ceechaachemmone. Hini ittoshi waayeebeeti qaaro taan wocheti Nihoo Yeerichoani, taacho toonoone.

²⁵ “Ittoshina tookkaa beebee, ittoshich ishin getteto taane.

²⁶ Tunebaani Nihoo Yeeri ta shigoona bi deejjemmi Yaafe Ayaano tuneti Kupphiyecho, aroo bulli mooyon ittoshich dojjemmone; ittoshich ta getteto bullin ittoshich shalligichemmone.

²⁷ Diggoon ittoshich wojjaabeeto taane; ta diggoon ittoshich immaabeeto taane. Hini ittoshich ta immaabeeti diggoo alemo immii beetoommo toonoone. Ittoshi mullo keqqaaye, shatishoo gettaaye.

²⁸ “ ‘Ta hammemmo taane; ittoshi waanoo wotteree woyemmo taane’ iyaꞌa ittoshich ta getteton waayeto ittoshine. Iberoon taan ittoshi shunigaata, Nihoo Yeer waan ta hamona emiresho ittoshine. Ebiyoo Nihoo Yeeri tayee besho bi tunetoyichiye.

²⁹ Ebi mooyo bi tunehooba taan ittoshi iberiyemmoyich, waataan bi beetaa, and ittoshich getteto taane.

³⁰ Hini alemoon hajjiibeeti taatoo waabeeto bi tunetoyich, ebiyee gubb, ittoshina tookki woddii yibbaateyaachemmo taane. Tunetaa aroo taan hajjoon hakkaachemmone.

³¹ Tunebaani Nihoo Yeerin ta shunon alemo ariyemmoyich, Nihoo Yeeri ‘Tuniibe’ bi ito bullin shuunaabeeto taane. “And tibote; hiniichee hambone” iye.