Yowannisi 13 - Kafa Linguistics Project

Bi Dabbeenaꞌochi Baatoon Yesuusi Mayo

¹ Beshee Baaroyee aaf, Yesuusi hini alemoochee Nihoo Yeer waan bi hammemmi aabo shagon ariihe. Hini alemooch beeti bi dabbeenaꞌon shunniye; ciirooch beddaahaanoo boonoshin shunniye.

² Yesuusinaa bi dabbeenaꞌona gifiroon maa beeheete; daabiloosiyoo shiichiꞌi Asqorootechi Simoonichi bushoo Yihudi Yesuusin beshiiree bi immemmoyich gonde shalligoon bi mullooch giijjitone.

³ Yesuusi Nihoo Yeeri bi kishooch bulli mooyon bi imon, Yeer waanee bi womonoo, Yeer waanoo wotteree hammemmo bi tunoon arii beetone.

⁴ Ebich madee toommoochee tiyii, toommeexi bi tahoon shoottiꞌi kotiichii, hidee qoreddoon tiijjii eddehe.

⁵ Aree hillooch aachi kite qiicoona aacon uubbiꞌi bi dabbeenaꞌochi baatoon mayonaa bi eddeti qoreddoona hidii shokkiyoonooch giyiye.

⁶ Aroochee Simoon Pheexiroos waan giddehe; biyoo “Ta Doonocho, ne ta baatoon machaniye ne ii beeto?” iye.

⁷ Yesuusiyoo wochiꞌi, “Ta tuniyaa beeton and ariyaano neene; tunetaa gubb ariyemmo neene” iye.

⁸ Pheexiroosiyoo “Ta baatoon cir mayaachine” iye. Yesuusiyoo “Ne baatoon ta mayo qayigaata, taanna tookkii ikkittino neech aalloone” iꞌi wochiye.

⁹ Simoon Pheexiroosiyoo “Ta Doonocho, ishigaata, ta kishoonaa ta qelloonon daakkiree mayalli ta baatoo baach machaaye” iye.

¹⁰ Yesuusi “Bi qeddoon macheto, bi ashittino bulli xalloo bi tunetoyich, bi baatoon machoyee damba biich baroo qaawiyaache. Ittoshi xalloo ittoshine; tunebaani ittoshi bulli toonoone” iye.

¹¹ Biin beshiiree immemmo aabi gaata bi arii beetoyich, “Ittoshi bulli xalloo toono ittoshine” iye.

¹² Boonoshi baatoon machii bi ciichitoyee gubb, bi tahoon taheꞌi hammii bi xaaꞌooch kotehe. Boonoshichoo ishichiye: “And ittoshich ta tuniiton shalligitote?

¹³ Ittoshi taan ‘Dojjechone, Doonone’ ii beetote; eeha taane. Ebich ittoshi gettito iberoone.

¹⁴ Illa ta ittoshi Doononaa Dojjechona tunaachaa ittoshi baatoon ta machetoyee, ittoshinaa ittoshina ittoshi baatoon macheya beddiyote.

¹⁵ Ebi ittoshich ta tuniitoommon ebiyoommon wotta ittoshinaa ittoshina ittoshi tuniyemmoyich bekkiito taane.

¹⁶ Iberoon ittoshich gettoye: Guuno bi doonoyee beshaanoone; wocheetoo biin wochetoyee beshaanoone.

¹⁷ And ebin ariiꞌi ittoshi tuniigaata, diireeto ittoshine.

¹⁸ “Ittoshi bullichon toonoone ta gettaabeeto; ta kaacceti asheenaꞌon ariibeeto taane. Tunebaani Yaafe Macaafoochaa ‘Taanna tookkii geecheꞌi maabeeto taan kocha tiyiye’ iibeeti qaaro ceeno qaawiihe.

¹⁹ “Ebi tunehooba aroo ta tunoon ariiree ittoshi iberiyemmoyich hanaach mooyo waataan beetaa ittoshich getteto taane.

²⁰ Iberoon ittoshich gettoye: Ta wocheto koninolla shunniibeeto taan shunnii beetone; taanoo shunniibeeto taan wocheton shunnii beetone” iye.

Biin Beshii Immemmi Uroochon Yesuusi Shiichiꞌi Geto

²¹ Yesuusi ishin bi gettitoyee gubb, bi kashe xuuxehan. “Iberoon ittoshich gettoye: Ittoshi daggoochee ikkoo taan beshiiree immemmone” iꞌi xalla gettiye.

²² Bi dabbeenaꞌo “Koniniye bi gettiibeeto?” iꞌi boonoshi gaboon guttiiꞌi boonoshinaa boonoshina ciineeheete.

²³ Bi dabbeenaꞌo daggoochee Yesuusi shunniibeeti ikkoo Yesuusichi gaꞌooch koteꞌi beehe.

²⁴ Ebich Simoon Pheexiroosi are uroon qillifeꞌi, “ ‘Koniniye ne gettaabeeto?’ getiree Yesuusin echebe” iye.

²⁵ Ebich aroo Yesuus waan katinniꞌi, “Ta Doonocho, arochi konine?” iꞌi echehe.

²⁶ Yesuusi wochiꞌi, “And dukkeree ta qapphiyemmo aroone” iye. Aroochee dukkeꞌi Asqorootechi Simoonichi bushoo Yihudich qapphiihe.

²⁷ Yihudi bi qapphetoyee gubb bekkech Sheexaanoo bi mullooch giyiye. Arooba Yihudin Yesuusi “Shuuneya ne gabiton kaateree shuunebe” iye.

²⁸ Tunebaani kotetinaꞌo daggoochee koniyoona amoyich ebin bi gettito gaata ariito aalloone.

²⁹ Yihudi koolla yesho bi tunetoyich, ikkikkeenaꞌo Yesuusi “Baaroyich qaawiimmon kemebe” woyee “Girechinaꞌoyich ikke mooyon imbe” ito boonoshich shaahiye.

³⁰ Yihudi dukkoon bi qapphetoyee gubb bekkech kexoochee kechiye; areegaata showoo xumoone.

Yesuusi Gettiti Andire Mooyo

³¹ Yihudi kechitoyee gubb Yesuusi ishichiye: “And Ashi Bushoo oogoon danetone; Yeeriyoo biinna oogetone.

³² Yeeri biinna bi ooge gaata, Yeeri bi qelloona biin oogiyemmone; andoo bekkech oogee yiiroon biich immemmone.

³³ “Ta bushiisheenaꞌote, batt giisheche saatoon ittoshina tookkaa beeto taane. Taan qaawemmo ittoshine; Ayihudee ukkireenaꞌoyich ‘Ta hammaa beetooch womon hakkaachote’ ta itoommon, andoo ittoshich wotta gettoye.

³⁴ “ ‘Ittoshinaa ittoshina shunebote’ iyaꞌa ittoshich andire mooyon gettoye; ta ittoshin ta shunnetoommon, ittoshi wotta ittoshinaa ittoshina shunebote.

³⁵ Ittoshinaa ittoshina shunegaata, ebina ta dabboo ittoshi tunoon asheenaꞌo bulli ariyemminaꞌone” iye.

Pheexiroosi Biin Nookkemmo Tunoon Yesuusi Geto

³⁶ Simoon Pheexiroosi “Ta Doonocho, amoochiye ne hammemmo?” iꞌi echehe. Yesuusi wochiꞌi, “Ta hammaa beetooch and taan dabboon hakkaachine; tunebaani gubb taan dabbemmo neene” iye.

³⁷ Pheexiroosiyoo “Ta Doonocho, and neen dabboon amoyich hakkaachote? Neecha getiree qitoyich qannito taane” iye.

³⁸ Yesuusiyoo wochiꞌi ishichiye: “Iberoon taacha getiree qitenne? Iberoon neech gettoye: Keejje wottoon taan nookkeyaan ne beetaa, hanaach baakkoo kuuhaachemmone” iye.