Yowannisi 12 - Kafa Linguistics Project

Maariyami Shittoon Yesuusichi Baatooch Ukkoo

¹ Yesuusi, Beshee Baaroon shiritte qemooch geddiichii, qitoochee bi tiijjiti Alazaari beeti Bitaaniya hammiye.

² Aroochaanoo Yesuusin iibbiyoyich gifiroon qanniiheete; Maarittiyoo boonoshich giddiihan; Alazaariyoo biinna tookkii kotetinaꞌo daggoochee ikkoone.

³ Maariyami qachi neetira bede oogeti aaxxe naaridoosi shittoon deebaa Yesuusichi baatooch ukkiyan; bi qelli eexona bi baatoon hidiyan. Ebi shittee cinno kechi ikkottehe.

⁴ Tunebaani Yesuusichi dabbeenaꞌo daggoochee ikkoo, biin beshiiree immemmi Asqorootechi Yihudi,

⁵ “Hini shittoon keejje balle diinaaroona kemaa, girechinaꞌoyich amoyich icheyaache?” iye.

⁶ Ishin bi gettito, gaayo bi tunetoyichalli, girechinaꞌoyich ariqqeꞌi toonoone; gijje yeshe kolloon kalleꞌi kollee daggooch kicee beetoochee bi qellich bi deqqii beetoyichiye.

⁷ Yesuusiyoo “Qaye! Hini shittoon ta duukkeyemmi aaboyich qanniiꞌa quyetine.

⁸ Girechinaꞌo bulli aaboon ittoshina tookkiiniye boonoshi beeto; tunebaani ta bulli aaboon ittoshina tookki beetaachemmo taane” iye.

Alazaarin Wuxoyich Gabeeti Gaboo

⁹ Ayihudeenaꞌo daggoochee meeti asheenaꞌo Yesuusi Bitaaniya bi beemon ariiꞌi waaheete; boonoshi waato, qitoochee bi tiijjiti Alazaarinoo beeggalli Yesuusi ikkeeton baach toonoone.

¹⁰ Ebich qeeshee ukkireenaꞌo Alazaarin wotta wuxiya echeeheete.

¹¹ Ebiyoo Ayihudeenaꞌo daggoochee meetinaꞌo bi naboona boonoshin qajjiichii boonoshi mulloon Yesuusi toommooch boonoshi tooꞌitoyichiye.

Yesuusi Oogoona Yerusaalem Gimo

¹² Dechara Beshee Baaroon baaroyich waati meeti asheenaꞌo “Yesuusi Yerusaalem woyemmone” getaa waayeꞌi,

¹³ yeebbee waamon dappii yechii Yesuusin giijjiya kechiꞌi, “Hosaana! Doonochi shigoona waabeeti Israꞌeelee taatoo diireebe!” iibee cookeeheete.

^14-15 “Tsiyooni asheenaꞌote, shattaahote! Ebiyoche, ittoshi taatoo kuree bushoon yebberee woyemmone” getaa bi kooreetoommon Yesuusi kuree bushoon daneꞌi yebbehe.

¹⁶ Yesuusichi dabbeenaꞌo arooba ebin shalligaaneenaꞌone; tunebaani kooreeti bi mooyonaa biich boonoshi tuniitonon boonoshi shalligito Yesuusi oogoona shimaayooch bi kechitoyee gubbiye.

¹⁷ Yesuusi Alazaarin bi duukketi oppoochee ceeggiꞌi qitoochee bi tiijjiyooba, biinna tookkii beeti asheenaꞌo tuneti mooyon miixee beeheete.

¹⁸ Ebich hini malletoon bi tuniyoon waayeti dofee asheenaꞌo wotta biin giijjiya kechiyeete.

¹⁹ Ebichi naboona Fariseenaꞌo boonoshinaa boonoshina “Andoo ikke mooyonona tuniyoon hakkaachone. Ebin beegote! Ashoo bulli bi waan wottetone” iyeete.

Yesuusina Tookkii Danoyich Ikkikke Giriikeenaꞌo Qaawoo

²⁰ Ebi baarooba Yeerich goyinneya Yerusaalem hammiti asheenaꞌo daggooch ikkikke Giriikeenaꞌo beeheete.

²¹ Boonoshiyoo Galiilee showooch beeti Beetisayidechi Filipphoos waan giddeꞌi, “No doonocho, Yesuusin beegga qaawaabeeto noone” iyeete.

²² Ebina Filipphoosi hammiꞌi Indiriyaasich gettiye; aroochee gutteꞌi hammii Yesuusich gettiyeete.

²³ Yesuusiyoo ishichiꞌi boonoshich wochiye: “Ashi Bushoo oogoon bi danemmi saato shaggitone.

²⁴ Iberoon ittoshich gettoye: Ikke teepphee aafe showooch hollaꞌa bi qitaan gaata, bi ikkeeti echemmine; tunetaa bi qitigaata, wodde aafoon aafemmine.

²⁵ Bi kasheen shunniibeeto muccemmone; hini alemooch beebee bi kasheen shunaano, bulli yemeenee kashoon danemmone.

²⁶ Taach maddoon qaawiibeeto, taan dabbibe; ta beetooch hini are ta maddecho wotta beeyemmone; taach maddee beetoyich Nihoo Yeeri oogoon immemmone” iye.

Bi Qitemmon Shiichiꞌi Yesuusi Geto

²⁷ “And ta kashe xuuxetine; ama getote? ‘Ta Nihoocho, hanaach ta toommooch woyemmi xuuxoochee taan wodiibe’ getote? Tunetaa hini hanaachi xuuxoon beegoyichiye ta waato.

²⁸ Ta Nihoocho, ne shigoon oogiibe!” iye. Arooba shimaayoochee “Oogiito taane; andoo oogiyemmo taane” immi qaaro waayeehe.

²⁹ Arooch neexeebeeti meeti asheenaꞌo hini qaaroon waayeꞌi, “Xeeyoone gigeebeeto” iyeete. Bareenaꞌoo “Maraakoone biich yibbaateto” iyeete.

³⁰ Yesuusi ishichiye: “Ebi qaaro waayeeto, ittoshi naboyichalli ta naboyich toonoone.

³¹ And hini alemee toommooch nalloo kindiya bedditone; and hini alemoon hajjiibeeti taatoo maach yookkeyemmone.

³² Tawoo showoochee ta tiijjeehooba, asho bullin ta waan yeepphemmo taane” iye.

³³ Ishin bi gettito, aabichiree bi qitemmo gaata bekkiyoyichiye.

³⁴ Ebich dofee asheenaꞌo “No, Kiristoosi bulli yemeenoon beeyemmo bi tunoon Sheeree Macaafoochee waayeto noone. Newochi ‘Ashi Bushoo showoochee tiijjeyemmone’ iyaꞌa aabichaꞌa gettenne? Ishi Ashi Bushochi konine?” iꞌi echeheete.

³⁵ Yesuusiyoo “Batt giisheche aabee wottoon bekko ittoshina tookki beeyemmone. Manderoona shaꞌeebeeto amooch bi hammiibeeto gaata ariyaanoone; ebich ittoshich bi mandereyaachemmoyich, bekke beetaa shaꞌebote.

³⁶ Bekkoochi bushiishoo ittoshi tunemmoyich, bekke bi beetaa, ittoshi mulloon hini bekkoochi toommooch tooꞌiibote” iye. Yesuusi ishin bi gettitoyee gubb kechii hammiꞌi bi qelloon aachiye.

Ayihudeenaꞌochi Daggoochee Meetinaꞌo Yesuus Waan Wottee Qayo

³⁷ Tunebaani ebi shaahe malletoon boonoshi aafoochaa bi bekkiiteenolla, bi toommooch mulloon tooꞌiyaaneenaꞌone.

³⁸ Ebich keemechi Isiyaasi “Doonocho, no miixeton koni iberiite? Doonochi giidochi konich bekkete?” iꞌi bi gettiti qaaro ceenniye.

^39-40 Isiyaasi wotta “Yeeri ishichitone: ‘Ta waan boonoshi wottetaa boonoshin ta wodiyaachemmoyich, boonoshi aafoona boonoshi ciinaachemmoyich, boonoshi mulloona boonoshi shalligaachemmoyich, boonoshi aafoon daayiito taane; boonoshi mulloonoo muumiitoo taane’ itone” iye. Ebich bi toommooch mulloon tooꞌiyemmon mawiitinaꞌone.

⁴¹ Isiyaasi ishichiꞌi bi gettito, Yesuusichi oogee yiiroon shiichiꞌi bi beeggitoyichiye; wotta Yesuusichon gettiye.

⁴² Arooba Ayihudee ukkireenaꞌo daggoocheenolla meetinaꞌo boonoshi mulloon Yesuusi toommooch tooꞌiiheete; tunebaani Fariseenaꞌo Ayihudeenaꞌo kiceebeeti kexoochee boonoshi yoohaachemmoyich, xalla kichii getaaneenaꞌone.

⁴³ Ebiyoo Yeeri boonoshin oogiyoyee beshoon asho boonoshin oogiyemmoyich boonoshi qaawitoyichiye.

Ciireexi Aabooba Kindemmi Nalleechon Yesuusi Geto

⁴⁴ Ebichi hillooch Yesuusi bi qaaroon oogichiꞌi ishichiye: “Bi mulloon ta toommooch tooꞌiibeeto, taan wocheto toommooch tooꞌiitalli, ta ikkeeto toommooch toonoone.

⁴⁵ Taanoo beeggiibeeto, taan wocheton beeggii beetone.

⁴⁶ Bi mulloon ta toommooch tooꞌiibeeto bulli, manderooch bi beetaachemmoyich, bekko tunaꞌa hini alemooch waato taane.

⁴⁷ “Alemoon wodiyoyichalli, bi toommooch nalloyich waataano taane. Ebich koniyoona ta qaaroon waayeꞌi ebi bi waayeti qaaroon quyo bi qayigaata, bi toommooch nallemmo ta toono taane.

⁴⁸ Taanoo qajje iꞌi ta qaaroon iberiyaano toommooch nallemmo beetone; ciireexi aabooba hini ta getteti qaaro bi toommooch nallemmone.

⁴⁹ Ta qellee hakkoona getaano taane; tunebaani amoon ta gettemmo gaata, aabichiree ta gettemmo gaatoo taach gettito taan deejjiti Nihoo Yeerine.

⁵⁰ Aroo ‘Hamiree gete’ iꞌi taach bi gettiti qaaro, bulli yemeenee kasho bi tunoon ariibeeto taane. Illa ta gettaa beeton Nihoo Yeeri taach gettitoommon ebiyoommon gettoye” iye.