Yowannisi 11 - Kafa Linguistics Project

Alazaari Qitoo

¹ Maariyaminaa bi manee Maarittina beeti Bitaaniya Alazaari getteebeeti ikke uro beehe; biyoo biiyehe.

² Hini are Maariyami shittoon Doono Yesuusichi baatooch ukkaachaa bi qelli eexona hiditi ureene; wotta biiyeti Alazaariyoo bi manoone.

³ Ebich bi maneenaꞌo Maarittinaa Maariyamina “Ta Doonocho, ne shunnaabeeti Alazaari biiyetone” iꞌi bi waan wochoon daachiiheete.

⁴ Yesuusiyoo ishin waayeꞌi ishichiye: “Hini biiyo Yeerichi Bushoo ebina bi oogemmoyich Yeerichi oogoyichani, qitooch bechemmo toonoone” iye.

⁵ Yesuusi Maarittinaa bi maneenon, Alazaarinoo oogichii shunnii beetone.

⁶ Alazaarichi biiyoon Yesuusi waayetoyee gubb, arooba bi beeti xaaꞌooch gutta qeyiye.

⁷ Ebiyee gubb, bi dabbeenaꞌoyich “Yihudee showooch wotteree hambone” iye.

⁸ Bi dabbeenaꞌo “Dojjechocho, arooch beeti Ayihudeenaꞌo giisheche aaboyee aaf neen xaqqoona yexiree wuxiya qaawitinaꞌone; and arooch wotteree hamma inne?” iyeete.

⁹ Yesuusiyoo wochiꞌi, “Ikke heeyo aaraa gutte saato toone? Areddoona shaꞌeebeeto koniyoona bi beegaata, hini alemeexi bekkoon beeggemmone; ebich tepheyaachemmone.

¹⁰ Tunetaa xumoona shaꞌeebeeto, biich bi manderetoyich tepheyemmone” iye.

¹¹ Ebin bi gettitoyee gubb wochinnoon “No shunechi Alazaari tokketetone; tunebaani biin tokketoochee tiijjiya hammaabeeto taane” iye.

¹² Ebich bi dabbeenaꞌo “Doonocho, tokketoo biin yechito tunegaata, wodemmone” iyeete.

¹³ Tunetaa Yesuusi tokketetone iꞌi bi gettito, qititone getone; tunebaani tokketeechon bi gettito boonoshich shaahiye.

¹⁴ Ebich arooba Yesuusi kaacha “Alazaari qititone.

¹⁵ Ta toommooch mulloon ittoshi tooꞌiyemmoyich arooch ta beemi qayoyich emirihoye; ebi bulli ittoshich bi gaaccemmoyichiye. And bi waan hambone” iye.

¹⁶ Ebich Qaappoo getteebeeti Toomaasi bare Yesuusichi dabbeenaꞌoyich “Biinna tookkiree qitibone; hambone” iye.

Alazaarichi Maneenaꞌon Yesuusi Goggiyoo

¹⁷ Yesuusi Bitaaniya shaggiꞌi, “Alazaari bi duukketo hanaach awudda qemone” geton waayehe.

¹⁸ Hini Bitaaniyi Yerusaalemee bi wokkiibeeto keejje kiilo meetir bedoone.

¹⁹ Boonoshi manoo qititoyich Maarittinaa Maariyaminon goggiyoyich, Ayihudeenaꞌo daggoochee meetinaꞌo waaheete.

²⁰ Maaritti Yesuusi womon waayaꞌa biin giijjiya kechahan; tunetaa Maariyami kexooch kotaa beehan.

²¹ Maarittiyoo Yesuusich “Ta Doonocho, hiniich ne beeto gaata, ta manoo qitaacheshone.

²² Andoo bi tunetaa, Yeeri ne qollemmo bullin neech tuniyemmo bi tunoon ariibeeti taane” iyan.

²³ Yesuusiyoo “Ne manoo qitoochee tiyemmone” iye.

²⁴ Maarittiyoo “Ciireexi aabooba qititinaꞌona tookki tiyemmo bi tunoon ariibeeti taane” iyan.

²⁵ Yesuusiyoo “Qititinaꞌoyich kashoon imiree tiijjemmo taane. Bi mulloon ta toommooch tooꞌiibeeto bi qititaanona kashechon tunemmone;

²⁶ kashecho tuneꞌi bi mulloon ta toommooch tooꞌiibeeto bulli, cir qitaachemmone. Ebin iberiinne?” iꞌi echehe.

²⁷ Areyoo “Eeha, ta Doonocho, ne ‘Hini alemooch woyemmone’ getteeti Kiristoosi Yeerichi Bushoo ne tunoon iberiiti taane” iyan.

Alazaarich Yesuusi Eefo

²⁸ Maaritti ishichaachaa wottaꞌa kexooch giyahan. Bi manee Maariyamin ceeggaa badd wochaꞌa, “Dojjecho waatone; neen ceeggii beetone” iyan.

²⁹ Aree ishin waayaꞌa afaafinoona tiyaa bi waan hammahan.

³⁰ Yesuusi Maarittina tookkii bi daneti xaaꞌoochani bi beeto batt gafooch giyaanoone.

³¹ Biin goggiiya tookkii kexooch koteebeeti Ayihudeenaꞌo Maariyami afaafinoona tiyaa bi hamon beeggiꞌi, “Maashoochaa eeppaniye tiyaa bi hammeto” iꞌi kechii biin dabbiyeete.

³² Maariyami Yesuusi beetooch waa biin ciinnaa bi baatooch dihaꞌa, “Ta Doonocho, hiniich ne beeto gaata, ta manoo qitaacheshone” iyan.

³³ Yesuusi aree eefaa, wotta biinna tookkii waati Ayihudeenaꞌo eefaa ciinniꞌi bi giidoo qacheꞌi ayiniye; goggemmonoo mawiihe.

³⁴ Biyoo “Aabiichiye ittoshi duukkito?” iye. Boonoshiyoo “No Doonocho, waaree beege” iyeete.

³⁵ Yesuusi acimoon ukkiye.

³⁶ Arooba arooch beeti Ayihudeenaꞌo “Aabichiꞌi biin bi shunniibeeto gaata beegote” iyeete.

³⁷ Tunetaa boonoshi daggoochee ikkikkeenaꞌo “Hini aaf doogoo aafoon ciichiiti uro, hinin wotta bi qitaachemmoyich tuniyoon mawiihe?” iyeete.

Qitoochee Alazaarin Yesuusi Kichoo

³⁸ Yesuusi wochinnoon oogichii ayiniꞌi Alazaari duukketi maasho beetooch hammiye. Oppoo xaqqee kexone; kelloo xaqqoona keppheetone.

³⁹ Yesuusi “Xaqqoon tiijji bayote” iye. Qititi uroochi manee Maaritti “Ta Doonocho, bi duukketo hanaach awudde qemone; and shaaꞌo qayaachemmone” iyan.

⁴⁰ Yesuusi “ ‘Ta getteton ne iberiigaata, Yeerichi oogee yiiroon beeggemmi neene’ getaachote?” iye.

⁴¹ Asheenaꞌoo xaqqoon tiijjiyeete. Yesuusi kaama wottee ciinniꞌi, “Ta Nihoocho, taachon ne waayetoyich neen galletehoye.

⁴² Bulli aaboon ne waayoon ariibeeto taane; tunebaani taan ne deejjoon boonoshi iberiyemmoyich, hini ta guudoona neexeti asheenaꞌoyicha iyaꞌa ishin gettoye” iye.

⁴³ Ishichiꞌi bi corootitoyee gubb bi qaaroon oogichiꞌi, “Alazaaro, waa keye” iꞌi ceeggiye.

⁴⁴ Qititi uro bi kishoo, bi baatoo kaafaa duukketi kaafenoona tookkii, bi aafoo bi kaappetona kechiye. Yesuusi “Biishote; hambe” iye.

Yesuusin Wuxiya Ayihudee Ukkireenaꞌo Echeyoo

⁴⁵ Arooba Maariyam waan waaꞌi Yesuusi tuniiton beeggiti Ayihudeenaꞌoochee meetinaꞌo boonoshi mulloon bi toommooch tooꞌiiheete.

⁴⁶ Tunetaa boonoshi daggoochee ikkikkeenaꞌo Fariseenaꞌo waan hammiꞌi Yesuusi tuniiton gettiyeete.

⁴⁷ Ebich qeeshee ukkireenaꞌonaa Fariseenaꞌona Ayihudee nallechinaꞌon kiciꞌi, “Aabichibona? Hini uro meeti malletoon bekkii beehe amoone!

⁴⁸ Cikkii no qayigaata, asheenaꞌo bulli boonoshi mulloon bi toommooch tooꞌiyemminaꞌone; Roomee ukkireenaꞌo waaree Yeerich no goyinnaabeeti yaafee kexo beeti xaaꞌoon, no aagetoonoo aalliyemminaꞌone” iyeete.

⁴⁹ Aroobee natooba qeeshee guudo tuneti Qeyaafi getteebeeti, boonoshi daggoochee ikkoo “Ittoshi amoonolla ariyaachote.

⁵⁰ Asheenaꞌo bulli boonoshi aalloyee, ikke uro boonoshi keroyich bi qitoo ittoshich kettoo tunoon shalligaachote?” iye.

⁵¹ Ishin bi gettito, bi qelloona ariiꞌi toonoone; tunebaani aroobee natooba qeeshee guudo bi tunetoyich, Yesuusi Ayihudeenaꞌochi keroyich bi qitemmon keemmiye.

⁵² Bi qitemmo, shaceꞌi baribare showooch beeti Yeerichi bushiisheenaꞌon wotta ikkooch bi kicemmoyichalli, Ayihudeenaꞌoyich baach toonoone.

⁵³ Aroobee aaboochee tiijjiꞌi Yesuusin wuxoyich echeeheete.

⁵⁴ Ebich aroyee gubb Yesuusi Ayihudeenaꞌo daggooch xalla bekkeꞌi shaꞌeyaanoone; tunebaani aroochee tiyiꞌi barahee gaꞌooch beeti showoo, Efreemi getteebeeti katemooch hammiye; arooch bi dabbeenaꞌona tookkii kotehe.

⁵⁵ Ayihudeenaꞌo baariibeeti Beshee Baaroo katinniye. Dofee asheenaꞌo boonoshi qelloon boonoshi xalliyemmoyich, ebi Beshee Baaroyee shiichiꞌi boonoshi beeti showoochee Yerusaalem waaheete.

⁵⁶ Boonoshiyoo Yesuusin qaawii beeheete; yaafee kexooch neexeechii boonoshinaa boonoshina “Ittoshich amo shaahii beete? Baarooch waataachehe?” iibee yibbaateheete.

⁵⁷ Aroyee aaf qeeshee ukkireenaꞌo, Fariseenaꞌoo biin yecha qaawiꞌi, “Yesuusi beeti xaaꞌoon ariibeeti asho bi beegaata, waaree nooch gete” itinaꞌone.