Yowannisi 10 - Kafa Linguistics Project

Bagee Qiddee Shaahiyoo

¹ “Iberoon ittoshich gettoye: Bageenaꞌochi maggooch kelloona giyaano, bare gommona capphiꞌi giyimmo, aroo gaayoonaa bokkoonane.

² Tunetaa kelloona giyimmoo bageenaꞌochi qiddoone.

³ Biich kellecho qechemmone. Bageenaꞌoo bi qaaroon waayemminaꞌone; bi bageenaꞌon boonoshi shigi shigoona ceegiree kichemmone.

⁴ Bi bageenaꞌo bullin bi kichitoyee gubb boonoshi aafooch shiichemmone; bi bageenaꞌoo bi qaaroon boonoshi arii beetoyich, biin dabbemminaꞌone.

⁵ Tunebaani baroo waanee xuuppheheetani biin dabbaachemminaꞌone; ebiyoo baroochi qaaroon ariyaano boonoshi qajjitoyichiye” iye.

⁶ Yesuusi ishin arooch beeti asheenaꞌoyich shaahiyoona gettiye; tunetaa bi gettito ama geto gaata boonoshich giyaanoone.

Gaawe Qiddoo Yesuusi Tuno

⁷ Ebich Yesuusi daakkiꞌi boonoshich ishichiye, “Iberoon ittoshich gettoye: Ta, bageenaꞌochi kello taane.

⁸ [Tayee aaf] waatinaꞌo bulli gaayeenaꞌonaa bokkeenaꞌonane; tunetaa bageenaꞌo boonoshi qaaroon waayeyaaneenaꞌone.

⁹ Kello taane. Taanna giyimmo koniyoona wodemmone; giyemmone, kechemmone, bi maayemmonoo danemmone.

¹⁰ Gaayo bi waabeeto gaayoyich, guuroonaa aalliyoonoyichalli, baroon halloyich toonoone. Tunebaani ta waato, kashoon boonoshi danemmoyich, ebiyoo ceeni kashoon boonoshi danemmoyichiye.

¹¹ “Deꞌe qiddoo taane. Deꞌe qiddoo bi bageenaꞌo keroyich qitemmone.

¹² Tunebaani gijjoon deqqiꞌi qiddeebeeto biicho tuneti bagee qiddoo tuno bi qajjitoyich, okeroo waataa bi beegigaata bageenaꞌon dufiichi woccemmone; arooba okeroo bageenaꞌon yechemmone; boonoshinoo shaccemmone.

¹³ Are qiddoo bi woccito, gijjoon deqqiꞌi qiddeebeeto bi tunetoyichiye; bageenaꞌoyichoo maaxo bi qajjitoyichiye.

^14-15 “Deꞌe qiddoo taane. Nihoo Yeeri taan bi arii beetoommon, tawoo Nihoo Yeerin ta arii beetoommon ta bageenaꞌon ariibeeto taane; ta bageenaꞌoo taan arii beetinaꞌone; boonoshi keroyichoo qitemmo taane.

¹⁶ Hini maggooch giyaani bare bageenaꞌo taach beetinaꞌone. Boonoshinoo wotta deebo taach qaawiihe; ta qaaroonoo waayemminaꞌone; ikke qiddoo boonoshin ikkochiree quyemmone.

¹⁷ Qitoochee wochinnoon ta tiyemmoyich, ta daaggoona qitemmo taane; ebich Nihoo Yeeri taan shunnii beetone.

¹⁸ Ta shuniree qitehoani, ta shunaanoon taan wuxemmo aalloone. Qitoonaa qitoochee timonoyich hakkoo taach beetone; ta Nihoo ‘Ebin tuniibe’ itone” iye.

¹⁹ Arooba hini yibbaatee naboona Ayihudeenaꞌo daggooch wochinnoon shaco giyiye.

²⁰ Boonoshi daggoochee meetinaꞌo “Yinnechone; geyetone; amoyich bi yibbaatoon waayee beetote?” iyeete.

²¹ Bareenaꞌo “Bi yibbaatoo yinnechi ashi yibbaatoommo toonoone. Yinno aaf doogeenaꞌo aafoon ciichiyoon hakkehe?” iyeete.

Yesuusin Wuxiya Ayihudeenaꞌo Qaawoo

²² Yerusaalem beeti yaafee kexon Yeerich boonoshi diiriibeeti baaroo katinniye. Showoo yooyone.

²³ Yesuusi yaafee kexooch beeti Solomoonichi Genje Gaaddaafoona shaꞌee beehe.

²⁴ Ayihudeenaꞌo biin giichii guuddiꞌi, “Aati wottoon nooch aachenne? Ne Kiristoosi ne gaata, kaacha nooch gete” iyeete.

²⁵ Yesuusiyoo ishichiꞌi boonoshich wochiye: “Ta ittoshich getteto taane; tunebaani iberiyaachote. Ta, ta Nihoo waanee wocheeꞌa ta tuniyaabeeti shuunoo taachon miixee beetone.

²⁶ Tunetaa ittoshi ta bago ittoshi tuno qajjitoyich iberiyaachote.

²⁷ Ta bageenaꞌo ta qaaroon waayee beetinaꞌone; tawoo boonoshin ariibeeto taane; boonoshiyoo taan dabbii beetinaꞌone.

²⁸ Tawoo boonoshich bulli yemeenee kashoon immemmo taane; boonoshiyoo cir aalleyaachemminaꞌone. Boonoshin ta kishoochee boggemmo koniyoona aalloone.

²⁹ Boonoshin taach immiti ta Nihoo bulliyee beshoone; ta Nihoo kishoochee bogon koniyoona hakkaachemmone.

³⁰ Taannaa Nihoo Yeerina ikkoo noone” iye.

³¹ Arooba Ayihudeenaꞌo biin yexiree wuxiya wochinnoon xaqqoon tiijjiyeete.

³² Yesuusi boonoshich “Ta Nihoo waanee wocheeꞌa wodde deꞌe mooyon ittoshich bekkiito taane; hini ta shuuneti shuunoochee aabichiye taan xaqqoona ittoshi yexxemmo?” iye.

³³ Ayihudeenaꞌo wochiꞌi, “Ne naagoyichalli deꞌoon ne shuunetoyich neen yexaachone; ne ashi bushoo tunaachaa ne qelloon Yeeri ne tuniitoyichiye” iyeete.

³⁴ Yesuusi ishichiꞌi boonoshich wochiye: “Yeeri ‘ “Ittoshiyoo nuggishoo ittoshine” ito taane’ iꞌi bi gettito ittoshi sheerooch kooreyaanoone?

³⁵ Yaafe Macaafee qaaro shaddeyoon hakkaache; hini bi qaaroon waayetinaꞌon, Yeeri ‘Ittoshiyoo nuggishoo ittoshine’ bi itoyeena,

³⁶ ‘Yeerichi Bushoo taane’ ta itoyich Nihoo Yeeri yaafiton, alemoochoo bi deejjiton ‘Naagahine’ iyote?

³⁷ Illa ta, ta Nihoo shuuneti shuunoon ta shuuno qayigaata, taan iberiyaayote.

³⁸ Tunetaa ta shuunegaata, taanolla ittoshi iberiyoo qayigaata, Nihoo Yeeri taanna tookkii bi tunoon, tawoo Nihoo Yeerina tookkii ta tunoon xiishiree ittoshi ariyemmoyich, ta shuunoon iberiibote” iye.

³⁹ Ebich wochiꞌi biin yecha qaawiyeete; tunetaa boonoshi kishoochee muricciye.

⁴⁰ Arooba Yesuusi shiichiꞌi Yowannisi aacona afaalliibee echeti xaaꞌoo Yoordaanoosi aachee beqach wochinnoon hammiꞌi arooch kotehe.

⁴¹ Wodde asheenaꞌo bi waan waaheete. Boonoshinaa boonoshina “Yowannisi ikke malletoonolla bekiyaanoone; tunebaani Yowannisi hini uroochon bi gettito bulli iberoone” iyeete.

⁴² Aroochaa meeti asheenaꞌo boonoshi mulloon Yesuusi toommooch tooꞌiiheete.