Yowannisi 1 - Kafa Linguistics Project

Asho Bullich Kashoon Immiibeeti Qaaro

¹ Shiichiꞌi Qaaro beehe; hini Qaaro Yeer waan beehe; biyoo bi qelloona Yeerine.

² Aroo shiichiꞌi Yeerina tookkii beehe.

³ Yeeri bulli mooyon biinna halliihe; halleetinaꞌo daggoochee ikkolla bi aalloon halleeto aalloone.

⁴ Aroo bi qelloona kashechone; are kasho ashoyich bekkoone.

⁵ Hini are bekko manderoon bekkii beetone; manderoo biin qeroon hakkaanoone.

⁶ Yeer waanee wocheeti, Yowannisi getteebeeti ikke uro beehe.

⁷ Biyoo asho bulli waayeree bi mulloon bekkoochi toommooch bi tooꞌiyemmoyich, are bekkoochon miixeya waahe.

⁸ Ebi bekkoochon miixeya waahalli, aroo bi qelloona are bekko toonoone.

⁹ Are bekko alemooch waabee, asho bullich bekkiibeeti ibere bekkoone.

¹⁰ Are Qaaro alemooch beehe; alemo halleeto biinnane; tunetaa alemo biin ariyaanoone.

¹¹ Bi asheenaꞌo waan waahe; bi hajjee asheenaꞌo biin qajjiyeete.

¹² Tunebaani Yeer waanee bi womon iberiiꞌi boonoshi mulloon bi toommooch tooꞌiitinaꞌo bullich Yeerichi bushiishoo tunee hakkoon immiye.

¹³ Yeerichi bushiishoo boonoshi tuneto, Yeer waanee boonoshi shiijjoonalli, ashi yaroochee woyee ashi qaatoochee woyee anaamochi gaboochee shiijjoona toonoone.

¹⁴ Are Qaaro ashoon tunehe; Yeerichi wojjoonaa iberoona bi toommooch meettiꞌi bekketaa noonna tookkii beehe; bi Nihoyich ikke mixxe Bushoo bi tunetoyich, bi waanee bi deqqiti oogee yiiroon beeggehone.

¹⁵ Ebin Yowannisi bi qaaroon oogichiꞌi gettiye; ishichiinoo iye: “ ‘And ta hillooch waabeeto, ta shiijjetaan beehooba beetone; ebich tayee beshoone’ iyaꞌa ta getteto ebine” iibee miixehe.

¹⁶ Bi toommooch meettiꞌi bekketi wojjoochee no bulli wojjee toommooch wojjoon deqqeto noone.

¹⁷ Yeerichi sheeroo Muus waanaa nooch ichehe; tunebaani wojjoonaa iberoona Yesuus Kiristoos waanaa nooch ichehe.

¹⁸ Yeerin bi aafoona beeggito koniyoona aalloone; tunebaani bi Nihoochi sheenooch beeti ikke bi Bushoo kindiꞌi bekkiitone.

Aacona Afaallechi Yowannisi Miixeti Miixoo

¹⁹ Yerusaalem beeti Ayihudee ukkireenaꞌo qeesheenaꞌonaa Leweenaꞌonon “Hamiree Yowannisin ‘Ne koni neene?’ getiree echebote” iꞌi wocheheete. Arooba wocheetinaꞌoyich Yowannisi ishichiꞌi miixehalli,

²⁰ nookkeyaanoone; boonoshich “Kiristoosi toono taane” iꞌi xallayii gettiye.

²¹ “Ishigaata, ne koni neene? Eliyaasi neene?” iꞌi echeheete. “Ta Eliyaasi toono taane” iye. “ ‘Woyemmone’ getteebeeti Keemecho neene?” iꞌi echeheete. “Toono taane” iꞌi wochiye.

²² “Ishigaata, ne koni neene? Noon wochetinaꞌoyich no gettemmon nooch gete; koni taane gettenne?” iyeete.

²³ Biyoo wochiꞌi, keemechi Isiyaasi gettitoommon “ ‘Doonochi gommon kaachi qaxxebote’ iibee barahoochaa cookiibeeti ashi qaaro taane” iye.

²⁴ Arooba Fariseenaꞌo waanee wocheetinaꞌo

²⁵ “Ishigaata, ne Kiristoosi woyee Eliyaasi woyee ‘Woyemmone’ getteebeeti keemecho ne toonee gaata, amoyichiye asheenaꞌon aacona ne afaallaabeeto?” iꞌi echeheete.

²⁶ Yowannisi wochiꞌi, “Ta, aacona afaallaabeeto taane; tunebaani ittoshi ariyaano ittoshi daggooch neexee beetone.

²⁷ Ta bi caammee cuyoon biich ta bedaani, ta hillooch waabeeto aroone” iye.

²⁸ Hini mooyo bulli bi tuneto, Bitaaniyanane; Bitaaniyi bi beeto, Yowannisi aacona afaalliibee bi echeti Yoordaanoosi aachee beqachiye.

Alemeexi Axaaxoon Hidii Wokkiyecho

²⁹ Bi dechara Yowannisi bi waan Yesuusichi womon beeggiꞌi ishichiye: “Ebiyoche, alemee axaaxoon hidi wokkiyemmi Yeerichi Bago!

³⁰ ‘Ikke uro ta hillooch waa beetone; aroo ta shiijjoyee aaf beetone; ebich tayee beshoone’ iyaꞌa ta getteto ebine.

³¹ Tawoo ta qelloona biin ariyaano taane; tunebaani Israꞌeeleenaꞌoyich bi bekkemmoyich aacona afaallaabee waahoye” iye.

³² Daakkiꞌi ishichii miixehe: “Yeerichi Ayaano bi ashittinee halloo uggechoommon tuneꞌi shimaayoochee kindii bi toommooch bi kotoon beeggeto taane.

³³ Tawoo koni bi gaata arooba ariyaan beeto taane; tunebaani aacona ta afaallemmoyich shiichiꞌi taan deejjiti aroo ‘Ayaano kindiree bi toommooch bi kotetaa ne beeggemmo, Yaafe Ayaanoona afaallemmo aroone’ iꞌi taach gettiye.

³⁴ Tawoo ebin ta aafoona beeggeto taane; biyoo Yeerichi Bushoo bi tunoon miixeto taane” iye.

Shiichiꞌi Yesuusin Gutte Asheenaꞌo Dabboo

³⁵ Wotta bi dechara Yowannisi gutte bi dabbeenaꞌona tookkii neexee beehe.

³⁶ Neexeebee, Yesuusin hammii bi beetaa beeggiꞌi, “Ebiyoche, Yeerichi Bago!” iye.

³⁷ Gutte bi dabbeenaꞌo Yowannisi ishichoon waayeꞌi Yesuusin dabbii hammiyeete.

³⁸ Biin dabbiibeeti asheenaꞌon Yesuusi gubb wottee ciinniꞌi, “Amooniye ittoshi qaawiibeeto?” iye. Boonoshiyoo “Rabbo, ne beeto aabiichiye?” iꞌi echeheete. Rabbi geto “Dojjecho” getone.

³⁹ Yesuusi boonoshin “Waaree beegote” iye. Boonoshiyoo hammiꞌi bi beeti xaaꞌoon beeggiyeete. Arooba boonoshi hammito aashire saati bedoochiye. Bi waanoo xumeheete.

⁴⁰ Yowannis waanee waayeꞌi Yesuusin dabbiti gutteenaꞌoochee ikkoo Simoon Pheexiroosichi manoo Indiriyaasine.

⁴¹ Biyoo Yesuus waanee kechii hammii shiichii bi hajjee manoo Simoon waan shaggii, “Masihin daneto noone” iye. Masihi geto “Kiristoosi” getone.

⁴² Aroochee Indiriyaasi Simoonin Yesuus waan deebiye. Yesuusiyoo beeggiꞌi, “Ne Yooni bushoo Simooni neene; and Keefi getaa ceekkemmo neene” iye. Keefi geto “Pheexiroosi” woyee “Xaqqo” getone.

Daakkiꞌi Yesuusin Gutte Asheenaꞌo Dabboo

⁴³ Bi dechara Yesuusi Galiilee showooch hamma tiyiye; Filipphoosinoo daneꞌi, “Taan dabbibe” iye.

⁴⁴ Filipphoosiyoo Indiriyaasinaa Pheexiroosina beeti Beetisayidi katemeexi ashoone.

⁴⁵ Aroo Naatinaꞌeelin daneꞌi, “Muusi bi Sheeree Macaafooch, keemechinaꞌo wotta biichon boonoshi kooriti Yooseefichi bushoo, Naazireetechi Yesuusin daneto noone” iye.

⁴⁶ Naatinaꞌeeliyoo “Naazireetee deꞌe mooyo kechehe?” iꞌi echehe. Filipphoosiyoo “Waaree beege” iye.

⁴⁷ Naatinaꞌeeli bi waan womon Yesuusi beeggiꞌi ishichiye: “Dawushoon ariyaani ibere Israꞌeelee asho hinine” iye.

⁴⁸ Naatinaꞌeeli Yesuusin “Amoochaa taan ariinne?” iꞌi echehe. Yesuusiyoo wochiꞌi, “Filipphoosi neen ceegaan beetaa, balaasee michi yiirooch kotaa ne beetaa, neen beeggeto taane” iye.

⁴⁹ Naatinaꞌeeli wochiꞌi, “Dojjechocho, ne Yeerichi Bushoo neene! Ne Israꞌeelee taatoo neene!” iye.

⁵⁰ Yesuusi wochiꞌi, “ ‘Balaasee michi yiirooch kotaa ne beetaa, neen beeggoye’ iyaꞌa ta gettetoyich iberiinne? Gubb ebiyee beshe mooyon beeggemmo neene” iye.

⁵¹ “Iberoon ittoshich gettoye: Shimaayoo qecheetaa, Yeerichi maraakeenaꞌo Ashi Bushoo toommooch keyi kindi boonoshi beetaa, beeggemmo ittoshine” iye.