Yoonaasi 4 - Kafa Linguistics Project

Asheenaꞌoyich Doono Yeeri Ariqqetoyich Yoonaasi Ippo

¹ Yoonaasi ebi mooyona oogeton ayiniꞌi ippehe.

² Doono Yeer waan ishichiꞌi corootiye: “Doono Yeero, ta showooch beechaa, ta getteto ebin toone? Kaataꞌa Tarishesh maxxiya ta tiyeto, ebichiye. Ne, ariqqechonaa deꞌe Nuggishoona, kaaroyich nibbecho, wodde shoodechonaa maarechona, naxoon kindiyoochee qajjaa wottaabeetoo ne tunoon ariito taane.

³ Andoo Doono Yeero, beemoyee qitoo taach gaaweto bi tunetoyich, ta kasheen ne daammemmoyich neen qollehoye” iye.

⁴ Doono Yeeriyoo “Ebich kaar beddenne?” iye.

⁵ Aroochee Yoonaasi are katemoochaa aabi-keyo waan hammiꞌi kotehe. Arooch biich bashoon bashiꞌi, are katemee toommooch tunemmi mooyon bi beeggimmi wottoon, are bashee yiirooch kotehe.

⁶ Arooba Nuggishoo Doono Yeeriyoo boto colle dici yiiroo tuneree, bi xuuxoochee biin bi kashiyemmoyich tuniihe. Yoonaasiyoo ebi botoyich oogeton emiriye.

⁷ Tunebaani bi dechara maaddoona Yeeri hippereen deejjaa, botoon maahan; botoo shoolliye.

⁸ Aabe kechemmona, Yeeri aabi-keyo waanee gaame yongoon deejjiye. Aabeyoo Yoonaasichi shimboon michaa kashooch qeechehe. Ebich qitiya qaatiꞌi, “Beemoyee qitoo taach gaawiye” iye.

⁹ Tunebaani Yeeri Yoonaasich, “Ebi botoyich kaar beddenne?” iye. Biyoo “Iberoon qitooch beddaahaa kaar beddoye” iye.

¹⁰ Doono Yeeri biich ishichiye: “Ikke xumoon colleꞌi ikke xumoon aalleti, bi collemmoyich woyee bi diccemmoyich ne aayaani botoyich ebi shaahoon ayinito neene.

¹¹ Ishigaata, qannoonaa yoochoonon barbariiꞌi ariyaani, balli hiye humoyee beshiti asheenaꞌonaa meeti gijjeenaꞌona beeti, ebi ooge katemoo Nanawich ariqqi bedaachote?” iye.