Yoonaasi 1 - Kafa Linguistics Project

Doono Yeeri Aafoochee Yoonaasi Maxxo

¹ Ikke areddoon Doono Yeeri Amitaayi bushoo Yoonaasich ishichiye:

² “Tiyiree ooge katemoo Nanawa hambe; are katemeexi asheenaꞌochi axaaxoo ta aafooch bi bekketoyich, hamiree boonoshich ‘Magge axaaxoon shuuneto ittoshine’ gete” iye.

³ Tunebaani Yoonaasi Doono Yeeri aafoochee maxxeya iꞌi, Tarishesh hamma tiyiye. Markaboon qaawiꞌi, baharee gashooch beeti, Yoopphi katemooch hammiye. Tarishesh hammiibeeti markaboon danehe. Doono Yeeri aafoochee maxxeya iꞌi, markabechinaꞌona tookki Tarishesh hamma gijjoon qocciꞌi markabooch giyiye.

⁴ Doono Yeeriyoo baharee toommooch giidechi yongoon deejjiye; giidechi aachi aayo baharee toommooch tiyiye; markaboo tiisheya beddiye.

⁵ Markabechinaꞌo oogeton shattiyeete; asho bi qelli qelloona bi nuggishi nuggishoo biin bi gaachemmoyich cookiye. Markabo kettemmoyich, bi maacooch beeti qiicoon baharooch kichii duppiyeete. Areegaata, Yoonaasi markabee dechiich beeti gatooch kindiꞌi tokketetone; magge tokketoo biin daammitone.

⁶ Markabechinaꞌochi ukkiroo bi waan hammiꞌi, “Aabichaa tokketenne? Tiyiree ne nuggishoon ceege; diqqich nooch ariqqeree aalloochee noon wodiyemmone” iye.

⁷ Aroochee markabechinaꞌo boonoshinaa boonoshina, “Hini gonde mooyo no toommooch bi waato, konichi naboona gaata no ariyemmoyich, ittoshi waataa ixoon dufone” iyeete. Ixoonoo duppiyeete; ixoo Yoonaasin yechiye.

⁸ Aroochee biich ishichiyeete: “Hini gonde mooyo no toommooch bi waato, koni naboona gaata, nooch gete; ne shuunoo amoone? Amoocheeniye ne waato? Ne showoo aabiichiye? Ne yaroo amoone?” iyeete.

⁹ Biyoo “Ta Hibiree asho taane. Baharoonaa showoonon halliti, shimaajji Nuggishoo Doono Yeerichiye ta goyinnaabeeto” iye.

¹⁰ Markabechinaꞌo oogeton keqqiyeete. Biinoo “Ebin aabichaa tuniinne?” iyeete. Ebiyoo Yoonaasi boonoshich getaa Doono Yeeri aafoochee maxxeebeeto bi tunoon boonoshi ariitoyichiye.

¹¹ Aachi aayo beshii beshii bi hammitoyich, “Aachi aayo qajjemmoyich, neen aabichibona?” iyeete.

¹² Biyoo “Hini giidechi aachi aayo ta naboona ittoshi toommooch bi womon ariibeeto taane. Ebich taan tiijjiree, baharooch dufote; aachi aayoo cikki qajjemmone” iye.

¹³ Tunebaani markabechinaꞌo markaboon baharee gashooch daamoyich, aacon boojjetoona (matoona) yoppeebee oogeton qiicceheete. Tunetaa aachi aayo beshii beshii bi hammitoyich, hakkaaneenaꞌone.

¹⁴ Boonoshiyoo ishichiꞌi Doono Yeer waan cookiyeete: “Doono Yeero, hini uroochi kashee naboyich noon wuxi aalliyaahine; xalle ashi damee mangoonoo no toommooch deebaahine! Doono Yeero, ebi bulli tunemmoyich daaggito neene” iyeete.

¹⁵ Aroochee Yoonaasin tiijjiꞌi baharooch duppiyeete. Aachi aayo bekkech shashewimiye.

¹⁶ Ebina markabechinaꞌo Doono Yeerin oogichiꞌi shattiyeete; Doono Yeerichoo deejjoon deejjiyeete; biichoo mookkeheete.

¹⁷ Doono Yeeri Yoonaasin ooge haashoo qooxxemmoyich tuniitone. Biyoo haashee maacooch keejje areddoonaa keejje xumoonon beehe.