Yoꞌeeli 3 - Kafa Linguistics Project

Aageteenaꞌo Toommooch Yeeri Nallemmo Tuno

¹ Doono Yeeri ishichiye: “Aroobee aaboonaa yemeenoonooch, Yihudee showoonaa Yerusaaleminochi kecoon wochemmo taane.

² Aageteenaꞌo bullin kiciree, Yoshafaaxi bambooch daammemmo taane. Ta asheenaꞌo tuneti Israꞌeeleenaꞌon, aageteenaꞌo daggooch boonoshi shaccitoyich, ta showoon boonoshi qoodeetoyich, boonoshi toommooch nallemmo taane.

³ Ta asheenaꞌon qoodeyoyich ixoon duppiyeete; yahechinaꞌon qemoyich, anaami bushiisheenaꞌon immiyeete; woyinee uyoon uyoyichoo maache bushiisheenaꞌon kemmiyeete.

⁴ “Xiroos, Sidoon, wotta Filsixeemee woraafeenaꞌooch beeti asheenaꞌote, aabichiiniye ittoshi beeto? Ta toommooch nichoon kichiya qaawii beetote? Ebi tunegaata, kaateree afaafinoona ittoshi shuuneton ittoshi toommooch shuunemmo taane.

⁵ Ta aachoonaa birewoonon daammito ittoshine. Aaxxe ta qiicoon shaaggii daammiꞌi, ittoshi yaafee kexooch giijjito ittoshine.

⁶ Yihudee showeexi asheenaꞌonaa Yerusaalemi asheenaꞌonon boonoshi showoochee wokkii daammiꞌi Giriikee asheenaꞌoyich kemmito ittoshine.

⁷ “Tunebaani and ta, ittoshi kemmiti showoochee boonoshin tiijji deebemmo taane. Ittoshi shuuneton ittoshi toommooch shuunemmo taane.

⁸ Ittoshi anaami bushiishoonaa maache bushiishoona Yihudee asheenaꞌoyich beshiitaa boonoshi kechemmoyich tuniyemmo taane. Boonoshiyoo wohooch beeti Sheebee asheenaꞌoyich kemmemminaꞌone. Ebin getteto Doono Yeeri taane.

⁹ “Aageteenaꞌo daggoochaa ishichi awaajjibote: ‘Koyoyich qannibote! Ginee anaaminaꞌonoo ceegote! Ginee naayinaꞌo bulli kiceeree, koyoyich qannibeete.

¹⁰ Ittoshi maaneshoo goraadoon ittoshi magaadoo ginoon bi tunemmoyich qicote! Yeexere ashoo “Ta kuppho taane” gete.

¹¹ Guudoona beeti aageteenaꞌote! Ittoshi bulli afaafinoona wobote! Waaree ebi are bambooch kiceebote’ getote” iye. Doono Yeero! Koyechi ne ginee naayinaꞌon, desh arooch daachiibe!

¹² “Aageteenaꞌo tibeete; guudoona beeti aageteenaꞌo toommooch nalloyich, arooch kotemmo ta tunetoyich, Yoshafaaxi bambooch hambeete.

¹³ Boonoshi shuunoo oogeti gondoone; maayi qecci goorooch maayoon magaadoona qecoommon, boonoshin qecote! Woyinee aafo oppooch ceennii beshiꞌi bi neexxeyoommon, waaree boonoshin neexote” iye.

¹⁴ Nalloo kindemmi bamboochaa bi nallemmi, Doono Yeerichi aabo shaggitone; ebich mattiqutte asho arooch kiceetone.

¹⁵ Aabeenaa ageneena manderemminaꞌone; xojjeneenaꞌoo aaxxeyaache gettemminaꞌone.

Bi Asheenaꞌon Doono Yeeri Diiremmo Tuno

¹⁶ Doono Yeeri Tsiyoonaa ciddiye; bi qaaroon oogichiꞌi cookiye. Yerusaalemaanoo gigehe. Shimaayoo, showoo shuuriye. Tunebaani Doono Yeeri bi asheenaꞌoyich shoobi xaaꞌoo tunemmone; Israꞌeeleenaꞌoyichoo mishigo tunemmone.

¹⁷ “Arooba, yaafeeti Tsiyooni ta geppooch beeti, ittoshi Nuggishoo Doono Yeeri ta tunoon ariyemmo ittoshine. Ebiyooba Yerusaalemi yaafeeti tunemmine; dallaaweenaꞌo biin koyi wochaachemminaꞌone.

¹⁸ Ebiyooba, guudinaꞌooch woyinee qomboo ceennemmone; geppeenaꞌoochoo shaappeebeeti miiminaꞌo gasheyemminaꞌone. Yihudee showooch beeti bamboo bulliich aaco ceennemmone; Doono Yeerichi yaafee kexoochee, aaco xuupphemmone; Shixiimi bamboonoo uchemmone.

¹⁹ Boonoshi showoochaa xalle ashi damoon boonoshi ukkitoyich, Yihudee asheenaꞌon boonoshi xuqqitoyich, Gibitsee showoo ashaalli xafo, Edoomee showoo barahoo, tunemmone.

²⁰ Tunebaani Yihudee showoo bulli aabooch, Yerusaalemi bushaa bushooch beddaahaa ashi beeyi xaaꞌoon tunemmine.

²¹ Hanaach beddaahaa ta gaacaani, xalle ashi damee nichoon kichemmo taane; Doono Yeeri ta, Tsiyoon beeyemmo taane” iye.