Yoꞌeeli 2 - Kafa Linguistics Project

Doono Yeerichi Aaboon Gecheenaꞌo Bekkiyoo

¹ Doono Yeerichi aabo waa beetone; ebiyoo katinnitone. Tsiyoonaa tiroon (waaringoon) hugote! Shametoonoo Doono Yeerichi yaafe geppoochaa hugote! Yihudee showooch beetinaꞌo bulli qewebeete.

² Ebi aabo shitirippimii mandereti aabo, quboonaa dunne manderoona tuneti aaboone. Maaddee aabo guudinaꞌooch kooyoommon giidechi meeti ginee naayo woyemmone. Wonnee tiijjiꞌi ebiyoommi mooyo bekkee ariyaanoone; ebiyee bekkoo bekkeyaachemmone.

³ Boonoshi aaf beeton qaaqqoo maahe; boonoshi gubb beetonoo qaaqqoo michiye. Showoo boonoshi aafaa Edeni beeti bechee mixoommone; tunebaani boonoshi gubbaa amolla aalli barahoon tunehe. Boonoshiyee muriccemmi amee mooyolla aalloone.

⁴ Boonoshiyoo hareshoon shaaheenaꞌone; ginee hareshoochoommonoo guufeheete.

⁵ Gaarinaꞌochi qaaroommi qaaroon waayiibee, guudi toommona capheheete; galloon yechiti qaaqqoo tatoommon, tatiyeete; giidechi ginee naayinaꞌo koyoyich qanniꞌi yaaroona keyoommon, kechiyeete.

⁶ Boonoshi aafoochaa asheenaꞌo qewemminaꞌone; asho bullichi aafo shaddeyemmone.

⁷ Ginee koyechinaꞌochoommon koyemminaꞌone; ginee naayinaꞌochoommon xaqqee uxeree toommooch kechemminaꞌone; bulliyona okk hach getaanoon, boonoshi gommon yeshiree qaxiremminaꞌone.

⁸ Boonoshinaa boonoshina xuꞌeyaanoon, boonoshi woreti woretoona qaxiremminaꞌone. Mishigoon tiishi beshe hammemminaꞌone; boonoshin yeshi neechemmo amolla daneyaachemmone.

⁹ Katemoon tuqqemminaꞌone; uxeree toommona capphi beshemminaꞌone; kexinaꞌooch deshee damba kechemminaꞌone; gaayoochomonoo mallee kelloona giyemminaꞌone.

¹⁰ Boonoshi aafaa showoo qewehe; shimaayoo shuuriye. Aabeenaa ageneena mandereheete; xojjeneenaꞌoo aaxxemmon qajjiyeete.

¹¹ Bi ginee naayinaꞌo aafoochaa, Doono Yeeri gigeebee, bi qaaroon waayiihe; bi ginee naayo mattiquttoone; ebi bi getoon ceechii beetinaꞌo giidechinaꞌone. Doono Yeerichi aabo oogeton shattii giiriitone; ebi aaboochee wodemmo konine?

Doono Yeer Waan Wotto

¹² Doono Yeeri ishichiye: “Andoo tunetaa coomoona, eefona, muushenoona, ceeni ittoshi mulloona ta waan wottebote” iye.

¹³ Ittoshi mulloonalli ittoshi tahoon keexxaahote. Ittoshi Nuggishoo Doono Yeer waan wottebote; biyoo maarecho, ariqqecho, kaaroyich nibbecho, wodde shoodecho, sheeroyich nibbechone.

¹⁴ Diqqich ittoshi Nuggishoo Doono Yeeri, bi kaaroochee qayi wotteree, ittoshin diiremmo tunemmone; ittoshiyoo maayi buuroonaa uyee deejjoonon biich giddiyemmo ittoshine.

¹⁵ Tsiyoonaa tiroon hugote! Asho coomemmoyich awaajjibote! Yaafeeti kiceyoon kicibote!

¹⁶ Asheenaꞌon kicibote! Iitoonoo yaafibote! Geeneenaꞌon kicibote! Bushiisheenaꞌon kicibote! Xammii beetinaꞌon beddaahaa kicibote! Woꞌee keno bi kollee kexoochee; woꞌeyoo ebi aroochee, keyeete.

¹⁷ Doono Yeerich maddeebeeti qeesheenaꞌo, deejjee gudoonaa yaafee kechi godoonochi gutte daggoochaa eefeete! “Doono Yeero, ne hajjee asheenaꞌoyich ariqqebe. Aageteenaꞌo ‘Boonoshi Nuggishoo aaye?’ geti boonoshi coonemmonaa hoxemmonoyich tuniyaahine” geteete.

Doono Yeeri Bi Asheenaꞌoyich Gibenikkiti Gibeno

¹⁸ Doono Yeeri bi showoyich qanaatehe; bi asheenaꞌonoo ariqqehe.

¹⁹ Boonoshichoo ishichiye: “Maayoon, woyinee uyoonaa zayitoonon ittoshich immemmo taane; ittoshiyoo michemmo ittoshine. Ebiyee bekk, aageteenaꞌo daggoochaa, ittoshi cooneyemmoyich tuniyaachemmo taane.

²⁰ “Dambi-waanee waabeeti ginee naayinaꞌon, ittoshi waanee wokkiyemmo taane; barahoonaa shuuꞌi showoonooch yookkemmo taane. Aaf beetinaꞌon aabi-keyo waanee baharooch, gubb beetinaꞌonoo aabi-gimo waanee baharooch, daachiyemmo taane. Boonoshi dubeno shaaqqemmone; bi shaaꞌo hooggemmone. Ebiyoo geececho bi tunetoyichiye.

²¹ “Showeene, shattaahine; emiribe! Doono Yeeri ta, worganikkiti mooyon ta tuniitoyich, oogichi emiribe!

²² Kubbi cooxinaꞌote, shattaahote! Gaddeexi moceenaꞌo cammitinaꞌone; mixinaꞌo aafoon aafetinaꞌone; balaasee mixonaa woyinee qomboona woddii aafetone.

²³ Tsiyoonee asheenaꞌote, emiribote! Ittoshi Nuggishoo Doono Yeeri taanna oogichi emiribote! Marehee amiyon, cadiqoona ittoshich immeto taane. Marehee amiyonaa naawee amiyonon, woddii ittoshich dichito taane.

²⁴ Maayi buchi xaaꞌeenaꞌooch maayeenaꞌo ceennemminaꞌone; woyino hiicheebeeti oppeenaꞌoo woyinee uyoonaa zayitoona ceeniree aphiremminaꞌone.

²⁵ Giidechi ginee naayo tuneti, shiwureebeeti gechoon, huggii aalliibeeti gechoon, gurimaashe gechoonaa temichoonon, ittoshich ta deejjiti natinaꞌooch boonoshi aalliiti maayoon, ta ittoshich qoccemmo taane.

²⁶ Ittoshi qettee wottoon maaree michemmo ittoshine; ittoshich worganikkiti shuunoon shuuneti, ittoshi Nuggishoo Doono Yeeri taan galletemmo ittoshine. Ta asheenaꞌo ciroona wochinnoon yeelleyaachemminaꞌone.

²⁷ Israꞌeelee asho ittoshi daggooch ta beemon, Doono Yeeri ta, ittoshi Nuggishoo ta tunoon, tayee bare nuggishoo aallo bi tunoon, ariyemmo ittoshine. Ta asheenaꞌo ciroona wochinnoon yeelleyaachemminaꞌone” iye.

Doono Yeerichi Aabo

²⁸ Doono Yeeri ishichiye: “Ebiyee bekk, ta Ayaanoon meeno taheti asho bulli toommooch woniyemmo taane; ittoshi anaami bushiisheenaꞌonaa maache bushiisheenaꞌona keemoon keemmemminaꞌone; ittoshi daggeexi geeneenaꞌo gumon gummemminaꞌone; gurimaasheenaꞌoo yaaꞌoon beeggemminaꞌone.

²⁹ Aroobee yemeenooch, guuninaꞌonaa gonneenaꞌonochi toommooch ta Ayaanoon woniyemmo taane.

³⁰ “Worganikkiti mooyon shimaayoochaa, showoochaanoo bekkiyemmo taane; damoonaa qaaqqoona, cufee duulloo tunemmone.

³¹ Oogoonaa shattiitona tuneti, Doono Yeerichi aabo womoyee shiichi, aabe manderemmine; ageneyoo damoo tunemmine.

³² Doono Yeerichi shigoon ceeggiibeeto bulli wodemmone. Doono Yeeri gettitoommon Tsiyooni guudonaa Yerusaaleminoochaa wodoo danemmone; Doono Yeeri gettitoommon, ebi woditinaꞌo bi ceeggitinaꞌone” iye.