Yoꞌeeli 1 - Kafa Linguistics Project

¹ Fetuꞌeelichi bushoo Yoꞌeelich waati Doono Yeerichi qaaro:

Gechoo Showoon Yexo

² Geeneenaꞌote, ebin waayebote! Yihudee showooch beeti bulli asheenaꞌote, ebin ellebote! Ittoshi yemeenooch tuneba ittoshi qaabbechinaꞌochi yemeenooch, ebiyoommi mooyo tunee ariihe?

³ Ebin ittoshi bushiisheenaꞌoyich getote! Ittoshi bushiisheenaꞌoo boonoshi bushiisheenaꞌoyich geteete; boonoshi bushiisheenaꞌoo gubbi shiijjeroyich geteete.

⁴ Temicho maataa echeti maayoon shiwureebeeti gechoo maahe; shiwureebeeti gechoo maataa echeton, huggii aalliibeeti gechoo maahe; huggii aalliibeeti gechoo maataa echeton, gurimaashe gechoo maahe.

⁵ Mashechinaꞌote, tiyi eefebote! Woyinee uyoon uchii beetinaꞌote, kewi eefote! Ebiyee gubb, ittoshi noonooch, andire woyinee uyo shagaachemmone.

⁶ Mattiqutte gechoo, no showoon tuqqitone; ginee naayo womoommon giidoona waatone; boonoshi gasho, daaheree gashoommone; boonoshi gammo, maache daaherechoommone.

⁷ No woyinee qomboon shokko echiiheete; no balaasee mixinaꞌonoo kuxxii aalliiheete; boonoshi ateenaꞌo naccemmi wottoon, gorii kichiyeete.

⁸ Biin shaagga maakkiiti bi keno qitaa, dookoon tahaꞌa eeppaabeeti gidiidechoommon eefote!

⁹ Maayi buuroonaa uyee deejjoona, Doono Yeerichi yaafee kexoochee kuxetone; Doono Yeeri aafooch maddeebeeti qeesheenaꞌo eefeheete.

¹⁰ Maayo aalletoyich, woyinee qomboo shuuqqitoyich, zayitee mixoo shuuqqitoyich, goyee budo shokko echetoyich, showoo eefehe.

¹¹ Gochechinaꞌote, sheqoon, teepphoon, maayo bullin qeco echetoyich, ayinibote! Woyinee bechechinonaꞌote, ittoshiyoo eefote!

¹² Woyinee qomboonaa balaasee mixona shuuqqitone; romaanoo, yeebbee mixo, appilo, aafeebeeti mixo bulliyoo shuuqqii qititone; ebich emiroo ashi waanee wokkitone.

¹³ Maayi buuroonaa woyinee uyee deejjoona, ittoshi Nuggishoochi yaafee kexoochee bi kuxetoyich, qeesheenaꞌote, dookoon taheree eefote! Deejjee gudee aafooch maddee beetinaꞌote, cooki eefote! Ta Nuggishoochi maddechinaꞌote, dookoon tahe waaree qebote!

¹⁴ Asho coomemmoyich awaajjibote! Yaafeeti kiceyoon kicibote! Geeneenaꞌonoo kicibote! Yihudee asheenaꞌo bullin, ittoshi Nuggishoo Doono Yeerichi yaafee kexooch kicibote! Doono Yeer waanoo cookibote!

¹⁵ Beshe Hakkechi Yeeri aalliyoon deebemmi, Doono Yeerichi aabo shaggitone. Ebi aaboyich woowo!

¹⁶ Maayo aafoona beegoyichona aalletone; emiroonaa ililoona no Nuggishoochi yaafee kexoocheenoo ciroona aalletone.

¹⁷ Maayi yaroo showoochaa qititone; maayo aalletoyich, maayi kicee kexinaꞌo shokkoon echetinaꞌone; goteenaꞌoo tiishetinaꞌone.

¹⁸ Boonoshi maayemmi mocoo aalletoyich miiminaꞌo giiqqiyeete; bageenaꞌoo shaaceꞌi shaawshaawimmiyeete.

¹⁹ Qaaqqoo gaddeexi mocoon bi maatoyich, shaareexi mixinaꞌonoo bi michitoyich, Doono Yeero, ne waan cookiyoye.

²⁰ Aaco tahitoyich, kubbi daggeexi mocoonoo qaaqqoo maatoyich, kubbi cooxinaꞌona ne waan cookiyeete.