Yihudi 1 - Kafa Linguistics Project

Diggiyoo

¹ Yesuus Kiristoosichi guuno, Yaaqobichi manoo Yihudi waanee, Nihoo Yeeri shunnitinaꞌonaa ceeggitinaꞌonoyich, Yesuus Kiristoosina quyeebeeti kittinneenaꞌo bullich:

² Yeerichi ariqqoonaa diggoona, bi shunoo ittoshich woddebe.

Koote Dojjechinaꞌo

³ Ta shunechinaꞌote! No qoodeebeeti wodeechon ittoshich kooroyich oogeti gabee toommooch beechaa, Yeeri yaafeenaꞌoyich ikke wottoon bi immiti, shaddeyaani gibenoyich ittoshi qiiccemmoyich, ittoshin ciicciibee kooroo taach qaawiibeeto tuneꞌi bekkehe.

⁴ Ikkikke asheenaꞌo ittoshi daggooch shokiibee giyitinaꞌone; hukkechinaꞌo tuneꞌi no Nuggishoochi wojjoon boonoshi meechi qaatoona shaddiyeete; bi ikkeeto baach no Taatoonaa no Doonona tuneti Yesuus Kiristoosin nookkeheete; boonoshi toommooch shaggemmi nalloo wodde yemeenoyee aaf Yaafe Macaafooch kooreetone.

⁵ Ebiyee aaf ebi bullin ittoshi ariitaanolla, Doono Yeeri Gibitsee Israꞌeeleenaꞌon kichii wodiichii, bi toommooch mulloon tooꞌiyaaneenaꞌon gubb bi aalliyoon ittoshich shalligichoon shunnaabeeto taane.

⁶ Ebiyoommon wotta boonoshich icheti ukkirittinoon qajjiꞌi boonoshi beeyi xaaꞌoochee kechiti maraakeenaꞌon dechi manderooch bulli yemeenoon sansalatoona cuchiꞌi, ooge nallee aabooba boonoshi toommooch bi nallimmi wottoon boonoshin quyee beetone.

⁷ Ebiyoommon wotta shuno maati, hallooch aalli, yeelliibeeti mooyon tuniiti, Sodoomi, Gomoorinaa boonoshi guudoonooch beeti katemeexi asheenaꞌo, bulli yemeenee qaaqqoona micciibee bullich cuuꞌiyoo tunetinaꞌone.

⁸ Ebiyoommon wotta ebi asheenaꞌo gumon gummiibee boonoshi hajjee ashittinoon eeꞌii beetinaꞌone; boonoshiyee damba beeton qallayii beetinaꞌone; damba shimaayooch beeti oogee yiirechinaꞌon naaggii beetinaꞌone.

⁹ Maraakeenaꞌochi iraashoo tuneti Mikaꞌeeliyolla daabiloosina tookkii Muusichi caheechon bi taggehooba, “Doono Yeeri neen kaarebe” iyalli, naageebee nalloyich aafoon kuppheyaanoone.

¹⁰ Tunebaani eboshi boonoshi ariyaani mooyo bullina naagee beetinaꞌone; shalligoon hakkaani kubbi cooxochoommon, boonoshi halloona boonoshi ariibeeti mooyo bi beetaanona, ciiroochaa ebi are mooyona aallemminaꞌone.

¹¹ Boonoshich woowo! Qayeeli tuniitoommon tuniitinaꞌone; gijjoon danoyicha iꞌi Balaami shuuneti muricooch boonoshi qelloon beshiiꞌi immitinaꞌone; Qoraahi hukkoon bi shuunoommon hukkoon shuunetinaꞌone; bi aalloommon aallemminaꞌone.

¹² Eboshi yeelleyaanoon woddiiꞌi uchii maa boonoshi beegaata, ittoshi ikkittinee madoochaa kiinoomminaꞌone; boonoshi qellichon baachiye boonoshi gabiibeeto; yongo shaccii aalliibeeti, amiyo deebaani quboomminaꞌone; bi gooroona aafeyaani, cammona waaxaa ciroona shuuqqiti mixoomminaꞌone.

¹³ Yeelliibeeti boonoshi shuunoo umboommo tunemmona, umboon aapphiibeeti giidechi baharee aachi aayoomminaꞌone; boonoshi gommon gawukkiꞌi yallyallimiibeeti xojjeneenaꞌoomminaꞌone; boonoshichoo bulli yemeenoon dunne manderooch boonoshi beeyemmi xaaꞌoon Yeeri qanniitone.

^14-15 Addaamiichee tiijjiꞌi shabaattinnee shiijjeroo tuneti Henooki wotta eboshichon ishichii keemmiꞌi, “Ebiyoche, Doono Yeeri asho bulli toommooch nalliya, hukkechinaꞌo tuneꞌi boonoshi shuuneti hukkee shuunoo bullich, hukkechi axaaxechinaꞌoo bi toommooch boonoshi yibbaateti gonde mooyo bullich boonoshi bulli toommooch nalliya, wodde hume yaafeenaꞌona tookkii bi waa beetaa beego” iꞌi gettiye.

¹⁶ Eboshi guuqqii guruuxii beetinaꞌone; boonoshi hajjee qaatoon dabbii beetinaꞌone; geeciibee boonoshi qellichon yibbaatee beetinaꞌone; ashi waanee gaacoon daneya, ashoon naadii beetinaꞌone.

Shalligichoonaa Ciicoona

¹⁷ Tunebaani ta shunechinaꞌote! Ittoshi no Doono Yesuus Kiristoosi wocheti mishiraachechinaꞌo ebiyee aaf boonoshi gettiti qaaroon gabibote.

¹⁸ Boonoshiyoo ittoshich “Yemeenee ciirooba boonoshi hajjee gonde qaatoon dabbemmi cooqqirechinaꞌo woyemminaꞌone” itinaꞌone.

¹⁹ Eboshi kittinnee guuphinaꞌon barbarii beetinaꞌone; meechi qaatoyich hajjee beetinaꞌo, Yaafe Ayaano boonoshich aalli asheenaꞌone.

²⁰ Tunebaani ta shunechinaꞌote! Ittoshiyoo bulliyee beshoon yaafeeti gommona Yeeri toommooch mullee tooꞌiyoona dico ittoshich bi daakkeyemmoyich, ittoshinaa ittoshina gaacheyoona kupphebote; Yaafe Ayaanoona yaabeeree corootibote.

²¹ No Doono Yesuus Kiristoosi bi ariqqoona bulli yemeenee kashoon ittoshich bi immemmi aaboon quyebee, Yeeri ittoshin shunniibeeto bi tunoon shalligibee beebote.

²² Gaabbiibeeti asheenaꞌoyich ariqqebote;

²³ shiweree qaaqqooch hammii beeti asheenaꞌonoo shotte kichiree wodiibote; bareenaꞌon wotta meechi qaatoona eeꞌeti boonoshi tahoon tiyaarebee, shatona maaribote.

Yeerin Galleto

²⁴ Giinnii dihoochee ittoshin quyebee, bachaallo tuniiree bi oogee yiiree aafooch oogeti emiroona ittoshin neechoon hakkiibeeti,

²⁵ bi ikkeeto baach Nuggishoo tuneti, noon Wodiyechi Yeerich, bulli yemeenoyee aaf, andoo, bulli yemeenoonoo no Doono Yesuus Kiristoos waanaa oogee yiiroo, oogo, giidoonaa hakkoona tunebe. Ameena.