Yibbaatoo 9 - Kafa Linguistics Project

Israꞌeeleenaꞌon Doono Yeeri Gaachemmi Naboo

¹ “Israꞌeeleenaꞌote, elle waayebote. Hanaach ittoshiyee beshe giidechinaꞌonaa meetinaꞌona tuneti aageteenaꞌon yoohiichi, boonoshi showoon hajjiya Yoordaanoosi aacon kimma ii beeto ittoshine. Boonoshi katemeenaꞌo ogoogeenaꞌonaa shimaayooch shage xaqqee uxerechinaꞌonane.

² Asheenaꞌo boonoshi qelloona giidechinaꞌonaa neex genjeenaꞌonane. Eboshiyoo ne ariibeeti Anaaqeenaꞌo, wotta ‘Anaaqee yareenaꞌo aafooch neexoon hakkemmo, konine?’ getaa ne waayeti asheenaꞌone.

³ Michii aalliibeeti qaaqqoochoommon ne aafooch shiichiꞌi hammiibeeto ne Nuggishoo Doono Yeeri bi tunoon hanaach ariibe. Biyoo boonoshin ne aafoochee koyi wochiree aalliyemmone. Doono Yeeri neech bi gibenikkitoommon, boonoshin yoohi kichemmo neene; kaateree boonoshi aallemmoyichoo tuniyemmo neene.

⁴ “Ne Nuggishoo Doono Yeeri boonoshin ne aafoochee yookkii bi kichitoyee gubb, ‘Doono Yeeri hini showoon ta hajjemmoyich hiniich taan bi deebito, ta cadiqittinoochee tiyitonane’ getiree ne mulloona gabiyaahine. Doono Yeeri ne aafoochee ebi aageteenaꞌon yookkii bi kichiibeeto gonde asheenaꞌo boonoshi tunetoyichani, ne cadiqittinoochee tiyitona toonoone.

⁵ Boonoshi showoon woraashiya arooch ne giyaabeeto, cadiqe asho ne tunetoyich woyee ne mullee kaamoyich toonoone. Ne Nuggishoo Doono Yeeri ne aafoochee boonoshin yookkii bi kichiibeeto, gonde asheenaꞌo boonoshi tunetoyich, wottoo ne qaabbechinaꞌo tuneti Abrahamich, Yisaaqinaa Yaaqobinoyich bi wogeti wogoon ceechoyichiye.

⁶ Illa ebich, ne Nuggishoo Doono Yeeri ebi gaawe showoon ne woraashemmoyich neech bi immiibeeto, ne cadiqittinoyich tunee bi qayon ariibe. Ne babberoo neene” iye.

Israꞌeeleenaꞌo Aachoochee Maamon Shuuno

⁷ Muusiyoo daakkiꞌi ishichiye: “Barahoochaa ne Nuggishoo Doono Yeeri shine bi kaaremmoyich am shaahoon ne tuniito gaata shalligibe. Ebin batteyaahine. Gibitsee kechaꞌa hiniich ne shaggemmi wottoon, Doono Yeeri toommooch hukkoon tiijjito neene.

⁸ Kooreebi guudooch no beehoobolla, Doono Yeerichi kaaree shiixxoo no toommooch bi kindemmoyich tuniito neene. Ittoshin aalliiya iꞌi oogichii kaarehe.

⁹ Tawoo Doono Yeeri ittoshina tookkii bi giyiti wogo kooreeti yalle xaqqeenaꞌon deeboyich guudi toommooch ta keyiyooba, are guudi toommooch aabbe areddoonaa aabbe xumoonon yagiyo. Maayoon tuneba uyoon, amoonolla ta noonooch bechaano taane.

¹⁰ Aroochee Doono Yeeri bi hajjee kishoona kooreeti gutte yalle xaqqeenaꞌon taach immiye. Iitoo kiceehooba, Doono Yeeri ebi are guudoochaa, qaaqqee daggoochaa tuneꞌi ittoshich bi gettiti mooyo bulli arooch beetone.

¹¹ Aabbe areddoonaa aabbe xumoonoyee gubb ittoshina tookkii bi giyiti wogo kooreeti yalle xaqqeenaꞌon Doono Yeeri taach immiye.

¹² “Aroochee Doono Yeeri taach ishichiye: ‘Tibe; kaateree hiniichee hambe. Gibitsee ne deebeti asheenaꞌo gonde mooyon shuunoona duubetinaꞌone; boonoshich ta getteti ta getoochee kaateꞌi badd wottetinaꞌone; boonoshichoo shahalloon shuunetinaꞌone’ iye.

¹³ “Doono Yeeriyoo daakkiꞌi ishichiye: ‘Ebi asheenaꞌon beeggeto taane. Iberoon babbereenaꞌone.

¹⁴ Ne qayaa boonoshin hidi aalliibona; boonoshi shigoonoo showee toommoochee aalliibona. Neennaa ne shiijjeroonon boonoshiyee beshe meetonaa giidechona tuneti aagetoon tuniyemmo taane’ iye.

¹⁵ “Tawoo noonna tookkii bi giyiti wogo kooreeti gutte yalle xaqqeenaꞌon ta gutte kishoona yechaa, ta hilla wottaꞌa guudi toommoochee kindiyo. Areegaata, guudi toommooch qaaqqoo conjii beetone.

¹⁶ Ta ciinnahaa, ittoshiyoo ittoshi Nuggishoo Doono Yeeri toommooch axaaxoon shuuneꞌi, beehote; aachoon ukkii maanji misiloon ittoshi qellich shuuneꞌi, Doono Yeeri ittoshich gettiti bi gommoochee kaateꞌi badd wottetote.

¹⁷ Ebich gutte yalle xaqqeenaꞌon ittoshi aafooch ta kishoochee ceqqaꞌa kewuccehoye” iye.

Muusi Israꞌeeleenaꞌoyich Yeerin Qollo

¹⁸ Muusiyoo daakkiꞌi ishichiye: “Aroochee aafichoommon, aabbe areddoonaa aabbe xumoonon Doono Yeeri aafooch baroona showooch guufoye. Maayoon tuneba uyoon, amoonolla ta noonooch bechaano taane. Ebin ta tuniito, ittoshi shuuneti axaaxoo bullich, Doono Yeeri aafooch gondo tuneti mooyon shuunoona bi kaaremmoyich ittoshi tuniitoyichiye.

¹⁹ Doono Yeeri oogichii kaareꞌi ittoshin aalliiya bi itoyich, tawoo bi kaaree shiixxoon shattoye. Tunebaani Doono Yeeri arooboo ta qolloon waayehe.

²⁰ Doono Yeeri Haroonin aalliiya bi gabimmi wottoon, oogichiꞌi kaarehe. Wotta Haroonichoo arooba corootiyo.

²¹ Ebi aroon shuunoona Doono Yeeri toommooch axaaxoon ittoshi shuuneti, maanji misiloon daammaꞌa qaaqqoona michiyo. Aroonoo tiichaꞌa, buddino bi tunemmi wottoon, yiikkaa qacichiyoye. Ebi buddino tuneton daammaa guudoochee kindiibeeti woce aacooch shacceho.

²² “Ebiyoommon wotta Tabeeri, Masaahinaa Qibiroot Hataawinoochaa Doono Yeeri shine kaaremmoyich tuniihote.

²³ “Doono Yeeri Qadeesh Barina ittoshi hammemmoyich bi tuniihooba, ‘Hamiree ittoshich ta immeti showoon woraashibote’ iye. Tunebaani ittoshi Nuggishoo Doono Yeerichi getoon deꞌa getaache iꞌi bi toommooch hukkoon tiijjihote. Bi toommoochoo ittoshi mulloon tooꞌiyaano ittoshine; bi qaaroonoo waayeyaano ittoshine.

²⁴ Ittoshin ta ariiti aaboochee tiijjiꞌi and beddaahaa, wochii wochiꞌi Doono Yeeri toommooch hukkoon tiijjito ittoshine.

²⁵ “Ebich aabbe areddoonaa aabbe xumoonon Doono Yeeri aafooch baroona showooch guufoye. Ebiyoo Doono Yeeri ittoshin aalliyemmo bi tunoon bi gettitoyichiye.

²⁶ Tawoo Doono Yeer waan ishichaꞌa corootiyo: ‘Nuggishoo Doono Yeero, ne oogoonaa kupphe ne kishoonon bekkiyoona biishaꞌa, Gibitsee kichaa ne deebeti ne hajjee asheenaꞌon aalliyaahine.

²⁷ Ne guuninaꞌo Abrahamin, Yisaaqinaa Yaaqobinon shalligibe. Hini asheenaꞌochi babberittinoon, gondoonaa axaaxoonon ciinnaahine.

²⁸ Ebi tuno qayigaata, noon kichaa ne deebeti showooch beeti asheenaꞌo, “Doono Yeeri boonoshich imma bi gibenikkiti showooch boonoshin daamon bi mawiitoyich, boonoshinoo bi shixxitoyich, wuxiya barahooch daammite” gettemminaꞌone.

²⁹ Ebiyeenoo wotta, ebi asheenaꞌo ooge ne giidoonaa giidechi ne mochoonon bekkiyoona Gibitsee kichaa ne deebeti, ne hajjee asheenaꞌone’ iyoye.