Yibbaatoo 6 - Kafa Linguistics Project

Bulliyee Beshe Geto

¹ “Ittoshich ta dojjemmoyich ittoshi Nuggishoo Doono Yeeri taach immiti geto, qociyoonaa doyoona ebine. Arooch giyi ittoshi hajjemmi showoochaa eboshin quyebote.

² Kashoona ittoshi beemmi yemeeno bullin ittoshi, ittoshi bushiisheenaꞌonaa bushaa bushiisheenaꞌona ittoshi Nuggishoo Doono Yeerin shatote. Ittoshich ta immaabeeti qociyoo bullinaa geto bullinon quyebote. Ebin ittoshi tuniigaata, are showooch koteree yagemmo ittoshine.

³ Ebich Israꞌeeleenaꞌote, ebi ta getoon elle waayebote. Quyeshoo getote. Ebin ittoshi tuniigaata, mooyo ittoshich kaamemmone; ittoshi qaabbechinaꞌochi Nuggishoo Doono Yeeri gibenikkitoommon, ejjoonaa eeyona xuupphiibeeti showoochaa oogichi meettemmo ittoshine.

⁴ “Israꞌeelo, elle waayebe. No Nuggishoo Doono Yeeri ikke Nuggishoone.

⁵ Newoo ne Nuggishoo Doono Yeerin ceeni ne mulloona, ceeni ne kashoona, ceeni ne giidoona shune.

⁶ Ebi hanaach neech ta gettaabeeti getoon ne mullooch kotiibe.

⁷ Ne bushiishoyichoo manjii dojjibe. Kexooch ne kotaa beegaata, gommona ne hammaa beegaata, ne qeyaa beegaata, ne tiyaa beegaatoo, ne noonoochee kuxaanoon gete.

⁸ Ebi sheeroon batteyaanoon shalligi ne beeyemmoyich kooriree ne kishoonaa ne baree gutte daggoonooch tife.

⁹ Ne kechi kellee qoomeenaꞌooch, ne katemee uxeree kelloochoo kooribe.

¹⁰ “Ne Nuggishoo Doono Yeeri ebi showoon neech imoyich, ne qaabbechi Abrahamich, Yisaaqinaa Yaaqobinoyich wogetone. Ebi showooch ne hagaani, ogoogeenaꞌonaa gaawetinaꞌona tuneti katemeenaꞌo beetinaꞌone.

¹¹ Ne gedaani gaawe mooyo bi maacooch ceenniti kexinaꞌo arooch beetinaꞌone; ne iiyaani aachi oppeenaꞌo, ne bechaani woyinee qombeenaꞌonaa zayitee mixinaꞌona arooch beetinaꞌone. Doono Yeeri arooch neen bi giijjaa, maa ne miyiyooba,

¹² guuno tunaꞌa beebee ne echeti Gibitsee neen kichii deebiti Doono Yeerin ne batteyaachemmoyich ne qelloon ariibe!

¹³ “Ne Nuggishoo Doono Yeerin shate. Biich baach goyinne maddebe. Bi shigoona baach wogebe.

^14-15 Ittoshina tookkii beeti ittoshi Nuggishoo Doono Yeeri qanaatechi Nuggishoo bi tunetoyich, Nuggishoo Doono Yeeri kaaro ittoshi toommooch bi cufaachemmoyich, showee toommoocheenoo ittoshin bi aalliyaachemmoyich, ittoshi guudoona beeti asheenaꞌo goyinnee maddeebeeti bare nuggisheenaꞌoyich goyinne maddeyaahote.

¹⁶ “Masaahaa Doono Yeeri ittoshin gaachoon hakkemmo bi tunoon xiishi bi bekkiyemmoyich ittoshi qaawoommon, ebiyoommon tuniyaahote.

¹⁷ Ittoshi Nuggishoo Doono Yeeri ittoshich gettiti getoon, doyoonaa qociyoonon manjii quyebote.

¹⁸ Mooyo neech bi kaamemmonaa Doono Yeeri ne qaabbechinaꞌoyich wogeꞌi bi gibenikkiti gaawe showooch giyi ne woraashemmonoyich, Doono Yeeri aafooch tatoonaa gaawetona tuneti mooyon tuniibe.

¹⁹ Ebin ne tuniigaata, Doono Yeeri bi gibenikkitoommon, ne etteenaꞌon ne aafoochee yoohi kichemmone.

²⁰ “Woyemmi yemeenooch, ne bushiishoo ‘No Nuggishoo Doono Yeeri ittoshich gettiti arichiyeenaꞌo, qociyeenaꞌonaa doyeenaꞌonochi mooyo, ama getone?’ iꞌi neen boonoshi echehooba,

²¹ boonoshich ishichibe: ‘No, Gibits beechaa, Faroonichi guunon tunaꞌa beehone. Doono Yeeri kupphe bi kishoona aroochee noon kichii deebiye.

²² Doono Yeeriyoo no ciinnaa beetaa, Gibitsee showoonaa Farooni kechi asheenaꞌo bullinochi toommooch worganikkiti malletoonaa gaakkechi shuunoonon tuniihe.

²³ Doono Yeeri, no qaabbechinaꞌoyich bi wogetoommon, Gibitsee noon bi kichito, hini showooch noon giijji showoon nooch immane.

²⁴ Aroochee Doono Yeeri ebi geteenaꞌon no quyemmoyich, no Nuggishoo tuneti biinoo no shattemmoyich, gettiye. Ebiyoo hanaach nooch bi tunee beetoommon, gaawe mooyo nooch bi tunemmonaa kashoona no beeyemmonoyichiye.

²⁵ No Nuggishoo Doono Yeeri nooch gettito bullin, bi aafoochaa gaawichaa no quyegaata, ebi nooch cadiqoo tunemmone’ gete” iye.