Yibbaatoo 5 - Kafa Linguistics Project

Aashire Geteenaꞌo

¹ Muusiyoo Israꞌeeleenaꞌo bullin ceeggiꞌi boonoshich ishichiye: “Israꞌeeleenaꞌote, hanaach ittoshich ta gettaabeeti ebi qociyeenaꞌonaa doyeenaꞌonon elle waayebote. Eboshin doyibote; manjiireeshoo quyebote.

² No Nuggishoo Doono Yeeri Kooreebi guudoochaa noonna tookkii wogoon giyiye.

³ Doono Yeeri ebi wogoon bi giyito, no niheenaꞌona tookkii tuneyaanoon, hanaach kashoona hiniich beeti noonna tookkiiniye.

⁴ Doono Yeeri guudi toommoochaa, qaaqqee daggoochaa ittoshina tookkii baroona daneꞌi ittoshich yibbaatehe.

⁵ Qaaqqoon shattiꞌi guudi toommooch ittoshi keyo qajjitoyich, arooba ta, Doono Yeerichi qaaroon ittoshich getoyich ittoshinaa Doono Yeerinochi gutte daggooch neexehoye. “Doono Yeeriyoo ishichiye:

⁶ ‘Gibitsee showeexi guuchittinoochee kichaꞌa neen deebeti ne Nuggishoo Doono Yeeri taane.

⁷ “ ‘Tayee besh bare nuggishoyich goyinne maddeyaahine.

⁸ “ ‘Damba shimaayooch, desh showooch, showoyee deshi aacooch beeti mooyoochee amee shaahoonona shuuneeti shahalloochi misiloon neech shuuneyaahine.

⁹ Aroyichoo goyinne maddeyaahine. Ne Nuggishoo Doono Yeeri ta, qanaatechi Nuggishoo taane; taan shixxii beetinaꞌon keejjinnee shiijjeroonaa awuddinnee shiijjeroonooch beddaahaa, niheenaꞌo shuuneti axaaxee naboyich naxemmo taane.

¹⁰ Tunebaani taan shunnii beetinaꞌonaa ta getoon waayee beetinaꞌonoyich hume shiijjerooch beddaahaa ta shunoon bekkiibeeto taane.

¹¹ “ ‘Doono Yeeri ta shigoon duuboon ceeggii beeton naxeyaanoon qayaachemmo ta tunetoyich, Doono Yeeri ne Nuggishoo ta shigoon duuboon ceeggaahine.

¹² “ ‘Ne Nuggishoo Doono Yeeri ta, neech gettetoommon, shambetee aaboon yaafeeti aabo tunii quyebe.

¹³ Shiritte qemi daggooch ne shuunemmi shuunoo bullin shuunebe.

¹⁴ Tunebaani shabaattinnee qemo ne Nuggishoo Doono Yeeri ta shambetoone. Ebi aabooba koniyoona shuunoon shuunaaye. Newoo tuneb, ne anaami bushoo, ne maache bushee, ne guuno, ne gonnee, ne gattoo, ne kuro, ne gijjoo aabiyona, ne katemee daggooch beeti shiqqoo amee shuunoonolla shuuneyaahote. Ne kashaa heeyoommon, ne guunonaa ne gonneena kashe heeyeete.

¹⁵ Gibits beechaa newoo guuno ne tunoon, ebi aroochee ne Nuggishoo Doono Yeeri ta, kupphe ta kishoonaa giidechi ta mochoonon bekkiyaꞌa neen kichaa ta deebon shalligibe. Ne Nuggishoo ta, shambetoon ne quyemmoyich ta gettaabeeto, ebichiye.

¹⁶ “ ‘Ne Nuggishoo Doono Yeeri ta, neech gettetoommon, neech ta immaabeeti showooch koteree ne yagemmoyich, mooyo bulli neech bi kaamemmoyichoo, ne nihoonaa ne indeenon oogiibe.

¹⁷ “ ‘Ashoon wuxiyaahine.

¹⁸ “ ‘Shunoon maayaahine.

¹⁹ “ ‘Gaajjaahine.

²⁰ “ ‘Asho koni toommoochona kootoon miixeyaahine.

²¹ “ ‘Ashi mecheen qaatiyaahine. Ashi kexon woyee goyoon, ashi guunon woyee gonneen, bi gattoon woyee bi kuroon, ashi gijjoo amoonolla qaatiyaahine’ iye.

²² “Doono Yeeri guudi toommooch kiceeti ittoshi asheenaꞌo bullich bi gettiti geteenaꞌo eboshine. Qaaqqee daggoochaa, quboonaa dunne manderoonochi daggoochaa bi qaaroon oogichiꞌi bi yibbaatehooba bi immiti geteenaꞌon gettiyani, baroon daakkaanoone. Eboshinoo gutte yalle xaqqeenaꞌooch kooriꞌi, taach immiye” iye.

Asheenaꞌo Shato

²³ Muusiyoo daakkiꞌi ishichiye: “Guudi toommo qaaqqoona miccii beetaa manderee daggoochee bi qaaroon ittoshi waayehooba, ittoshi yoodi yoodee ukkireenaꞌonaa showee geeneenaꞌona ta waan giddeheete.

²⁴ Taachoo ishichiyeete: ‘No Nuggishoo Doono Yeeri bi oogoonaa oogee yiiroonon nooch bekkiitone; bi qaaroonoo qaaqqee daggoochee waayeto noone; Doono Yeeri biich yibbaateechaa, asho kashoona beemon hakkemmo bi tunoon hanaach beeggeto noone.

²⁵ Illa and amoyich qitoon no toommooch deebona? Ebi shattiiti qaaqqoo noon michi aalliyemmone. Wochinnoon no Nuggishoo Doono Yeerichi qaaroon no waayegaata no qitoo xiisheetone.

²⁶ Meeno taheti ashi daggoochee qaaqqee daggoochaa tuneꞌi beeyechi Nuggishoo Yeeri yibbaatetaa no waayoommon waayeechii, kashoona beemon hakkito, konine?

²⁷ Ne, damba arooch gidderee no Nuggishoo Doono Yeeri gettii beeton waayebe. Aroochee wotteree neech bi gettito bullin nooch gete. Aroon elle waayeree quyemmo noone’ iyeete.

²⁸ “Doono Yeeri ittoshi yibbaatoon waayeꞌi taach ishichiye: ‘Ebi asheenaꞌo neech gettiti mooyon waayeto taane. Ebi boonoshi gettiti mooyo tatoone.

²⁹ Boonoshinaa boonoshi shiijjereenaꞌonoyich bulli yemeenoon mooyo bulli kaamemmoyich, taan boonoshi shattemmonaa bulli aaboon ta getoon boonoshi quyemmonoyich, ebiyoommi gaboo bulli aaboon abo boonoshichoo beeba!

³⁰ “ ‘And hami boonoshi duukkaanooch boonoshi wottemmoyich gete.

³¹ Tunebaani ne hiniich taanna tookki ne yagaa ta geto bullin, ta qociyoo bullinaa ta doyoo bullinon neech immemmo taane. Boonoshi hajjemmoyich, boonoshich ta immaabeeti showoochaa boonoshi quyemmoyich, ebi aroon asheenaꞌoyich dojjibe’ iye.

³² “Illa ittoshi Nuggishoo Doono Yeeri ittoshich gettiton ittoshi quyemmoyich ittoshi qelloon ariibote! Ebi aroochee qanna yoocha gettaahote.

³³ Kashoona ittoshi beeyemmoyich, ittoshichoo mooyo kaamemmoyich, ittoshi hajjemmi showooch koteree ittoshi yagemmoyichoo, ittoshi Nuggishoo Doono Yeeri ittoshich gettiti boochoona hambote.