Yibbaatoo 34 - Kafa Linguistics Project

Muusi Qitoo

¹ Muusiyoo Moꞌabee gaddoochee tiyiꞌi Yaariki katemee ciinooch beeti, Neebi guudi cullullooch beeti Fisigi guudooch kechiye. Ebi aroochaa Doono Yeeri Gilaadee showoochee tiijjiꞌi Daani katemooch beddaahaa beeti showoo bullin biich bekkiihe.

² Ebiyoo Nifitaalichi showoo bullin, Efreeminaa Minaasinochi showoon, aabi-gimo waan beeti Meditiraanee baharooch beddaahaa beeti Yihudichi showoon,

³ Yihudichi showoyee deshi-waan beeti, Negeebin, yeebbee michechi Yaariki katemoochee tiijjiꞌi, Tsoꞌari katemooch beddaahaa beeti naqqe showoo bulliniye.

⁴ Aroochee Doono Yeeri Muusich ishichiye: “ ‘Ittoshi shiijjereenaꞌoyich immemmo taane’ iyaꞌa Abrahamich, Yisaaqinaa Yaaqobinoyich ta wogeti showoo ebine. Ne aafoona baach ne beeggemmoyich tuniito taane; tunebaani arooch giyaachemmo neene” iye.

⁵ Ebina Doono Yeeri gettitoommon, Doono Yeeri guuno Muusi ebi are Moꞌabee showoochaa qitiye.

⁶ Doono Yeeriyoo Moꞌabee showooch, Beet Feꞌoori katemee ciinooch beeti bambooch biin duukkiye; tunebaani hanaach beddaahaa ebi bi duukketi xaaꞌoon ariibeeto koniyoona aalloone.

⁷ Muusiyoo balli hiye nati ashoon tuneechii qitiye. Bi qitiyooba, bi aafo dabbidabbaano, bi giidoo qayaanoone.

⁸ Israꞌeeleenaꞌo Muusich shaashe qemon Moꞌabee gaddoochaa eeppiyeete. Muusich boonoshi eeppiti eefi aabo beshehe.

⁹ Muusi bi qitoyee shiichiꞌi, bi kishoon Nuuni bushoo Yaasichi shimbooch kotiiꞌi, bi keroon bi ukkiriitoyich, Yaasi shalligee Ayaanoona ceennitone. Israꞌeeleenaꞌo, Doono Yeeri Muusich gettitoommon tuniiꞌi, bi getoon waayeheete.

¹⁰ Doono Yeeri biinna tookkii baroona daneꞌi yibbaateti, Muusiyoommi keemecho aroyee gubb Israꞌeelee showooch ciroona tiyaanoone.

¹¹ Doono Yeeri biin wochetaa, bi tuniitoommi worganikkiti malletoonaa gaakkechi shuunoo bullinon Farooni toommooch, bi showee iraasheenaꞌonaa bi showee asheenaꞌo bullinochi toommooch tuniiti bare keemecho aalloone.

¹² Israꞌeeleenaꞌo bulli aafooch Muusi tuniiti, oogeti giidechonaa shattiitona tuneti mooyoommon tuniito koniyoona aalloone.