Yibbaatoo 33 - Kafa Linguistics Project

Muusi Israꞌeelee Yoodeenaꞌon Diiroo

¹ Yeer asho Muusi bi qitoyee shiichiꞌi, Israꞌeeleenaꞌon bi diiriti diiroo ebine.

² Biyoo ishichiye: “Doono Yeeri Siini guudoochee noon gaacheya waahe; aabe keyoommon kechiꞌi, Edoomee showoochaa bi asheenaꞌo toommooch koojjiye; bi bekko Faraani guudoochaa koojjii bekkehe. Aashire hume bi maraakeenaꞌo biinna tookkii beetinaꞌone; bi qanne kishoochee qaaqqoo aaxxehe.

³ Iberoon Doono Yeeri bi asheenaꞌon shunnii beetone; biich yaafeetinaꞌo bulli bi kishoochiye boonoshi beeto; boonoshiyoo bi baatooch goyinneheete; bi getoonoo waayeheete.

^4-5 Israꞌeelee yoodeenaꞌo bulli ikkooch kiceehooba, no aagetoyich beeti aaxxe mooyo tuneti, Yeerichi sheeroon ittoshich immehoye; Doono Yeeri Israꞌeelee Nuggishoo tunehe” iye.

⁶ Muusi Roobeeli yoodoochon ishichiye: “Roobeelo, qitaayi kashoona beebe. Tunebaani bulli aaboon haddoona meettaaye” iye.

⁷ Yihudi yoodoochon ishichiye: “Doono Yeero, Yihudichi cookoon waayebe. Bare yoodeenaꞌona tookki boonoshin ikkochibe. Boonoshin giidechinaꞌon tuniibe. Boonoshi etteenaꞌo waanee boonoshin gaachebe” iye.

⁸ Lewi yoodoochon ishichiye: “Ne Tumiimoon Lewich, ne Uriimoon bi qelloon neech beshiiꞌi immitoyich imbe. Masaahaa boonoshin phirehine; Meriibi aacoochaa boonoshina tookkaa hayehine.

⁹ Boonoshi niheenaꞌoyich, indeenaꞌoyich, maneenaꞌonaa bushiisheenaꞌonoyich boonoshi gibeneetoyee beshoon, neech oogeton gibeneetinaꞌo tunetinaꞌone. Ne qaaroyich deꞌa itinaꞌone. Neenna tookkii boonoshi giyiti wogoonoo quyetinaꞌone.

¹⁰ Ne doyoon Yaaqobich, ne sheeroonoo Israꞌeelich dojjiyeete. Ne aafoochoo ixaanoon, ne deejjee gudoochoo amolla echeyaanoon micciibeeti deejjoon, deejjiyeete.

¹¹ Doono Yeero, boonoshich beeto bullin diiribe. Boonoshi kishee shuunoo bulli neen emirikkito tunebe. Boonoshi etteenaꞌochi shimetoon kuxe. Wochinnoon boonoshi toommooch tiyaayeete” iye.

¹² Biiniyaami yoodoochon ishichiye: “Doono Yeerina shucheti yoodo, biinna quyeeꞌi beehe; heeyo bullin boonoshin quyemmone; bi beeyi xaaꞌoonoo boonoshi geppee toommooch tuniihe” iye.

¹³ Yooseefi yoodoochon ishichiye: “Doono Yeeri boonoshi showoon, shimaayoochee doshoon (caagibanoon) kindiyoona, showee dechiichee aacon xuuphiyoona, diiribe.

¹⁴ Aabee gooroona aafeebeeti michi aafoona, bi agen agenoona aafeebeeti gaawe aafoona,

¹⁵ wonnee wonnee guudinaꞌo toommoochee daneebeeti gaawe maayoona, bulli yemeenoon beeti geppeenaꞌoochee daneebeeti meeti maayoona,

¹⁶ showee colliibeeti gaawe mooyo bullina, micciibeeti tushoochaa bekketi Doono Yeerichi gaawe aafoona ciinneyoona, ebi bulli mooyona Yooseefichi shiijjereenaꞌo diireebeete; ebiyoo bi maneenaꞌo daggooch iraashoo bi tunetoyichiye.

¹⁷ Yooseefi gubbenee giidoommi giidechone; gaahee qaroommi qarechone; bi qareenaꞌo Minaasichi humeenaꞌo, Efreemichi aashire humeenaꞌone. Ebi areenaꞌona aageteenaꞌon kochemmone; showee tuggooch beddaahaa boonoshin yookkemmone” iye.

¹⁸ Zebulooni yoodoochonaa Yisakoori yoodoonochon ishichiye: “Zebuloono, ne hammaabeeti gommo neech kaamebe. Yisakooro, magee gaanno neech woddebe.

¹⁹ Bare yoodee asheenaꞌon boonoshi geppooch ceeggemminaꞌone; ebi aroochaa tate deejjoon deejjemminaꞌone. Boonoshi gaannoon baharoochee, baharee gashooch beeti qacoochee daneheete” iye.

²⁰ Gaadi yoodoochon ishichiye: “Gaadichi showoon gamichiibeeti Yeeri diireeton tunebe; Gaadi mochoonaa qelli koofonon tiishoyich, daaheroochoommon nappiye.

²¹ Israꞌeelee iraasheenaꞌo ikkooch kiceehooba, beshe gaawe qoodoon, wulloochi qoodoon boonoshich immiyeete. Boonoshiyoo Doono Yeerichi kaame daaggoon, Israꞌeeleenaꞌoyich bi immiti bi doyoon ceechiyeete” iye.

²² Daani yoodoochon ishichiye: “Daani Bashaan beeti bi gofoochee capphii kechiibeeti, more daaheroommone” iye.

²³ Nifitaali yoodoochon ishichiye: “Nifitaalin Doono Yeeri gaawe aafoona ciinnitoyich emiritone; bi diiroonoo michitone; baharoonaa deshi-waani showoonon hajjibe” iye.

²⁴ Aseeri yoodoochon ishichiye: “Aseeri yoodo bare yoodoyee beshoon diireeton tunebe; bi maneenaꞌo daggooch shucheton tunebe; bi baatoonoo zayitee daggooch tuuphe.

²⁵ Bi uxeree kellee tuggo xuuroonaa gooshoona tunebe; bi yemeeno bullinoo diggoona beebe” iye.

²⁶ “Israꞌeeleenaꞌote, ittoshin gaachoyich shimaayoona, bi oogee yiiroona quboon yebbeꞌi shaꞌeebeeti, ittoshi Nuggishoommi nuggishoo aalloone.

²⁷ Bulli yemeenoon beeyechi Yeeri ittoshi beeyi xaaꞌoone; bulli yemeenoon beeyechi bi mocheenaꞌo ittoshi qoyeenaꞌone. Ittoshi etteenaꞌon ittoshi aafoochee yookkii kichiꞌi, ‘Koyi aalliibote’ iye.

²⁸ Ebina Israꞌeeli diggoona, Yaaqobichi sheeyo keqqaalloon, maayoonaa woyinee uyoona ceenniti, shimaayoo doshoon (caagibanoon) kindiibeeti showooch beehe.

²⁹ Israꞌeelo, diireeto neene; Doono Yeerina woditi asho neenoommo, konine? Gaachoochoommon bi neen quyee beetone; goraadoochoommon ne etteenaꞌon qeccee beetone. Ne etteenaꞌo maaroon qollebee ne waan woyemminaꞌone; tunebaani ne boonoshi shimetoon neexxemmo neene” iye.