Yibbaatoo 32 - Kafa Linguistics Project

¹ “Shimaayoocho, elle waayebe. Tawoo gettemmo taane; showoo ta noonoochee kechiibeeti qaaroon waayebe.

² Ta doyoo amiyochoommon ufebe; ta yibbaatoo doshoochoommon kindibe; colleebeeti mocee toommooch dudiibeeti amiyochoommon, mocee toommooch amichi kuchoochoommon kindibe.

³ “Doono Yeerichi shigoon awaajjemmo taane. No Nuggishoyich oogoon imbote.

⁴ Biyoo Xaqqee Inderoone; bi shuunoo muricaalloone; bi gommo bulliyoo kaamoone. Muricaalli gibeneeti Nuggishoo, kaamoonaa cadiqoonane.

⁵ “Tunebaani ittoshi, Doono Yeeri toommooch axaaxoon shuuneto ittoshine; ebi ittoshi gonde shuunee naboona, bi bushiishoo getaa ceekkeyaachemmo ittoshine; ittoshiyoo wuuqqoonaa xummoona tuneti asho ittoshine.

⁶ Hini mullaalli baalle ashoocho! Doono Yeerich ne tuniyemmo ebiniye? Biyoo ne Nihoonaa neen Hallitonane; neen aagetoo tuniiꞌi manjiitone.

⁷ “Wonnee yemeenoon gabibe. Meeti shiijjereenaꞌochi yemeenoon shalligibe. Neen shiyitinaꞌon woyee geeneenaꞌon echebe. Wonnee mooyon neech gettemminaꞌone.

⁸ Beshoo Yeeri aageteenaꞌoyich iristoon bi imiyooba, ashi yaroonoo bi barbariihooba, Israꞌeelee bushiisheenaꞌo haddi haddoommona macceenaꞌoyich daaroon geddiye.

⁹ Tunebaani Israꞌeeli Doono Yeerichi hajjoone, Yaaqobiyoo bi hajjee iristoone.

¹⁰ “Biyoo barahooch bi beetaa, amolla aalli shuuꞌi showooch bi beetaa, danehe. Bi guudoona guuddii quyeꞌi biin shiimee yechiye; bi aafee aachoochoommonoo biin quyehe.

¹¹ Booyo bi kexon quyoommon, bi bushiishoo toommooch bi guufoommon, Doono Yeeri bi qoshoon yaggiꞌi, bi asheenaꞌon dihoochee quyehe.

¹² Doono Yeeri bi ikkeeto ittoshin yaabiye; biin gaacheti bare nuggishoo koniyoona aalloone.

¹³ “Xoobooch keyiree showoon ittoshi hajjemmoyich tuniihe; naqqe showooch gocheti maayoon maahote. Xaqqee gogginoochee eeyon ittoshi maayemmon tuniihe; xaqqechi showooch zayitee mixo ittoshich bi collemmoyich tuniihe.

¹⁴ Gurimoon miimoochee, ejjoonoo emmishoochee, aangechi bagoonaa emmishoonon, Bashaanee gaaweti bagee baaddoon, gaawe teepphoonaa woyinee uyoonon ittoshich maanjii uchiye.

¹⁵ “Israꞌeeleenaꞌote, ittoshiyoo gaannee michiꞌi Doono Yeeri toommooch tiyiyote; ittoshiyoo aangii nuuriꞌi gaannehote. Aroochee ittoshin halliti Yeerin qajjiyote; ittoshin wodiyechi Xaqqee Inderoon qallayiyote.

¹⁶ Bare nuggisheenaꞌoyich goyinnoona bi qanaatemmoyich tuniihote; ciigiiti ittoshi shuunoona bi ippemmoyich tuniihote.

¹⁷ Nuggisheenaꞌo tuneyaani yinneenaꞌoyich, ittoshi ariyaani nuggisheenaꞌoyich, katinoon ittoshi ariiti dallaaweenaꞌoyich, ittoshi qaabbechinaꞌo goyinneyaani nuggisheenaꞌoyich, deejjoon giddiihote.

¹⁸ Neen halliti ne Deeboon qajjehine; neen shiyiti ne Nuggishoon battehine.

¹⁹ “Doono Yeerichi bushiishoo ittoshine; tunebaani bi ippemmoyich tuniihote. Biin qajjiꞌi gubb ittoshi wottoon beeggiꞌi, biyoo ittoshin qajjiye.

²⁰ Biyoo ishichiye: ‘Ittoshi, wuuqqoo tuneti asho ittoshine; ta ittoshin gibenoon hakkaache. Ebiyee gubb, ittoshin guudi ciinaachemmo taane; ittoshi ciiro amo bi tunemmo gaata beeggemmo taane.

²¹ Nuggishoo tuneyaani gaacaalleenaꞌoyich goyinnehote; qanaateree ta kaaremmoyichoo tuniihote. Ebich gaacaalli aagetoona ittoshin qanaatiyemmo taane; shalligaalli aagetoona ittoshin ippiyemmo taane.

²² Ta kaaro qaaqqoochoommon aaxxemmone; Siꞌoolooch beddaahaa michemmone; showoonaa bi toommooch beeti goyo bullinon michemmone; geppee gaadoon michi aalliyemmone.

²³ “ ‘Gonde mooyon ittoshi toommooch gutemmo taane; ta shangoon ittoshi toommooch awure ciichemmo taane.

²⁴ Shaacoonaa achee gaamoona qiti ciiremmo ittoshine; kupphe biiyoonoo qiti ciiremmo ittoshine. Ittoshin bi maayemmoyich kubbi cooxon, ittoshin bi wuxemmoyichoo qoppiibeeti dingeroon deejjemmo taane.

²⁵ Gurimaasheenaꞌonaa gidiideenaꞌona, gaggereenaꞌonaa geeneenaꞌona, gaddoochaa goraadoona qitemminaꞌone; boonoshi kexoochaa keqqoona qitemminaꞌone.

²⁶ Ittoshin koniyoona shalligaachemmoyich tuniiree, ciroona ittoshin aalliyesho taane;

²⁷ tunebaani ittoshi etteenaꞌo geecaachemmoyich, “Boonoshin kochaa wochito noani; ebin tuniito Doono Yeeri toonoone” boonoshi getaachemmoyich, ittoshi etteenaꞌochi mooyon shattoye’ iye.

²⁸ “Israꞌeeleenaꞌo shalligaalli asheenaꞌone; gabii deꞌo boonoshi waan aalloone.

²⁹ Shalligechinaꞌo gaata, ebin shalligeshinaꞌone; boonoshi ciiro amo bi tunemmo gaata gabeshinaꞌone.

³⁰ Ikke ginee naayo hume Israꞌeelee ginee naayinaꞌon yookkiye; gutte ginee naayinaꞌo wotta aashire hume Israꞌeelee ginee naayinaꞌon kochii wochiyeete. Ebiyoo bi tuneto, boonoshi Xaqqee Inderoo boonoshin bi duppitoyichiye; Doono Yeeri boonoshin bi qajjitoyichiye.

³¹ Boonoshi nuggisheenaꞌo no Nuggishoochoommon, giidechi deebeenaꞌo boonoshi tunee qayon, boonoshi etteenaꞌo boonoshi qelloona arii beetinaꞌone.

³² Boonoshi etteenaꞌo, Sodoominaa Gomoorinochi guudoona gocheti woyinoomminaꞌone. Ebi woyinee aafo caammere, xuppattoon aafeebeeti aafechone.

³³ Dingeree xuppattoochee duucheti woyinee uyoomminaꞌo, qaakkii biijjiꞌi, wuxiibeeti xekeree xuppattoomminaꞌone.

³⁴ “Doono Yeeri ishichiye: ‘Ebi mooyon ta maacooch yecheto taane; ta mazgabooch kooree kotetone.

³⁵ Boonoshi etteenaꞌo toommooch nichoon kichiree, boonoshin ta naxemmi aabo katinnitone. Diqqoona boonoshi baatoo giinnemmone; aalliibeeti naxo boonoshi toommooch kindemmone’ iye.

³⁶ “Boonoshi giidoo qayon, guuno tuneba doono, koniyoona echee qayon bi beegiyooba, Doono Yeeri bi asheenaꞌoyich nallemmone; bi guuninaꞌoyichoo ariqqemmone.

³⁷ Aroochee Doono Yeeri bi asheenaꞌoyich ishichemmone: ‘ “Noon deebe wodiyemminaꞌone” iꞌi ittoshi gibeneti nuggisheenaꞌo aayeete?

³⁸ Ittoshi deejjee awuyon maatinaꞌo, ittoshi woyinee uyee deejjoonoo uchitinaꞌo, eke and tiyiree ittoshin gaachebeete; eke ittoshin deeberee wodiibeete.

³⁹ “ ‘Illa ta ikkeeto baach Nuggishoo ta tunoon, tayee bare nuggishoo aallo bi tunoon beegote. Wuxiyoye; mayiihoye; wodiinoo iyoye; ta kishoochee dichoon hakkemmo koniyoona aalloone.

⁴⁰ Beeyechi Nuggishoo Yeeri ta tunoona, ta kishoon tiijjaa wogehoye.

⁴¹ Aaxxeebeeti ta goraadoon gayiremmo taane; nalloon kindiyoyich yechemmo taane. Ta etteenaꞌo toommooch nichoon kichemmo taane; taan shixxii beetinaꞌon sheeremmo taane.

⁴² Ta shangeenaꞌo boonoshi damoona mashemmoyich tuniyemmo taane; ta goraado boonoshi meenon maayemmone. Keccetinaꞌo bullin wuxemmo taane; genje goferechi boonoshi qelloon kuxi bajjemmo taane’ iye.

⁴³ “Aageteenaꞌote, Doono Yeerichi asheenaꞌona tookki emiroona cookibote. Bi guuninaꞌochi damee nichoon kichii beetone; bi etteenaꞌo toommoochoo nichoon kichii beetone; boonoshi axaaxee naboona duubeti bi asheenaꞌo showoon xallii beetone” iye.

⁴⁴ Muusi Nuuni bushoo Yaasina tookkii asheenaꞌo aafooch kechiꞌi, asheenaꞌo waayee beetaa, ebi shoddee qaaro bullin gettii ciichiye.

Muusichi Ciireexi Geteenaꞌo

⁴⁵ Muusi ebi qaaro bullin Israꞌeeleenaꞌo bullich yibbaatee bi ciichitoyee gubb,

⁴⁶ boonoshich ishichiye: “Ittoshi toommooch miixoo bi tunemmoyich hanaach ittoshich ta gettaabeeti qaaro bullin manjiiree ittoshi mullooch yeshote. Hini sheeree qaaro bullin ittoshi bushiisheenaꞌo gibeneetinaꞌo tuneree boonoshi quyemmoyich, boonoshich dojjibote.

⁴⁷ Ebi qaaro ittoshich kashoon immiibeeti qaaroani, duube qaaro toonoone. Ebi aroon quyoona Yoordaanoosin kimi hamiree ittoshi woraashemmi showooch meeti yemeenoon kotemmo ittoshine” iye.

Gibenee Showoon Muusi Beeggemmoyich Yeeri Tuniyoo

⁴⁸ Ebi arooba Doono Yeeri Muusich ishichiye:

⁴⁹ “Moꞌabee showooch, Yaariki katemee ciinooch beeti Abariimi guudinaꞌo beetooch hambe. Neebi guudi toommooch keyiichi, boonoshi hajjemmoyich Israꞌeeleenaꞌoyich ta immaabeeti Kanaanee showoon ciine.

⁵⁰ Ne manoo Harooni Hoori guudi toommoochaa qitiꞌi bi asheenaꞌo waan bi xaꞌeyoommon, newoo ebi ne kechaabeeti guudi toommoochaa qitiree ne asheenaꞌo waan xaꞌeyemmo neene.

⁵¹ Ebiyoo ittoshi guttiyona Tsiini barahooch, Qadeeshi gaꞌooch beeti Meriibi aachi xuuphooch ittoshi beehooba, Israꞌeeleenaꞌo aafooch taach gibeneyoon ittoshi qajjitoyich, ta yaafittinoyichoo oogoon imon ittoshi qajjitoyichiye.

⁵² Ebich Israꞌeeleenaꞌoyich ta immaabeeti showoon wohoochaa ciinishalli ne gettemmo, arooch giyaachemmo neene” iye.