Yibbaatoo 31 - Kafa Linguistics Project

Muusichi Xaaꞌooch Yaasi Kereyoo

¹ Aroochee Muusi Israꞌeeleenaꞌoyich daakkiꞌi yibbaatehe;

² ishichiinoo iye: “And balli hiye nati asho tuneto taane. Illa ebiyee damba ittoshin yaabii qeejjoon hakkaachemmo taane. Doono Yeeriyoo taan ‘Yoordaanoosin kimaachemmo neene’ itone.

³ Ne Nuggishoo Doono Yeeri bi qelloona neyee aaf tuneree Yoordaanoosin kimmemmone; ebi aageteenaꞌon ne aafoochee yoohi aalliyemmone. Newoo boonoshi showoon yechemmo neene. Doono Yeeri gettitoommon, Yaasi ittoshiyee aaf shiichiree kimmemmone.

⁴ Doono Yeeri Amooree taateenaꞌo tuneti Sihoonin, Ooginaa boonoshi showoonon bi aalliyoommon, ebi asheenaꞌon aalliyemmone.

⁵ Doono Yeeri boonoshin neech beshii immemmone. Ittoshiyoo ta getteti getoommon, boonoshi toommooch tuniibote.

⁶ Kupphebote; maaci kuxo tunebote. Boonoshin shati keqqiyaahote. Ne Nuggishoo Doono Yeeri neenna tookkii hammii beetone; neen dufaachemmone; neenoo qayaachemmone” iye.

⁷ Aroochee Muusi Yaasin ceeggiꞌi, Israꞌeeleenaꞌo bulli aafoochaa ishichiye: “Doono Yeeri boonoshi qaabbechinaꞌoyich imma wogeꞌi bi gibenikkiti showooch hini asheenaꞌona tookki hammemmo ne tunetoyich, showoonoo boonoshi yechemmoyich tuniyemmo ne tunetoyich, kupphebe; maac kuxoon tunebe.

⁸ Doono Yeeri ne aafooch shiichemmone; neenna tookkishoo tunemmone. Neen dufaachemmone; neenoo qayaachemmone. Shattaahine; keqqishoo gettaahine” iye.

Shabaatti Shabaatte Natona Sheeroon Asheenaꞌoyich Shemmo

⁹ Muusiyoo hini sheeroon kooriꞌi, Doono Yeerichi wogee taabootoon shaaggiibeeti, Lewi yoodoochee tuneti, qeesheenaꞌonaa Israꞌeelee geeneenaꞌo bullinoyich immiye.

¹⁰ Aroochee Muusi boonoshich ishichiꞌi gettiye: “Shabaatti shabaatte nati ciirooch, hiishoo maareebeeti aabooba, Bashee (Yambaaree) Baarooba,

¹¹ Israꞌeeleenaꞌo bulli bi kaaccimmi ikke xaaꞌooch ne Nuggishoo Doono Yeeri aafooch boonoshi kiceehooba, hini sheeroon Israꞌeeleenaꞌo bulli aafooch boonoshich waayiiree shemmebe.

¹² Waayeree ittoshi Nuggishoo Doono Yeerin shaton boonoshi doyemmoyich, hini sheeree qaaroon ceechiree boonoshi quyemmoyich, asheenaꞌon, ebiyoo anaamon, maacheen, bushiisheenaꞌonaa ne beeti katemooch koteti shiqqoonon ceegi kicibe.

¹³ Ebina hini sheeroon waayeyaani ne shiijjereenaꞌo waayemminaꞌone. Yoordaanoosin kimiree ittoshi hajjemmi showooch boonoshi beeyemmi yemeeno bullin ne Nuggishoo Doono Yeerin shaton doyemminaꞌone” iye.

Israꞌeeleenaꞌo Doono Yeerich Deꞌa Getaachemminaꞌo Tuno Shiichiꞌi Getteyoo

¹⁴ Doono Yeeri Muusich ishichiye: “Ebiyoche, ne qitemmi aabo katinnitone. Yaasin Israꞌeeleenaꞌo toommooch ta iraashiyemmoyich, biin ceegiree danee duukkaanooch wobote” iye. Muusinaa Yaasina danee duukkaanooch hammiyeete.

¹⁵ Doono Yeeriyoo giimboommi quboona waaꞌi danee duukkaanee kellooch neexehe.

¹⁶ Doono Yeeriyoo Muusich ishichiye: “Ne, qitiree ne qaabbechinaꞌon waan xaꞌeyemmo neene. Ne qititoyee gubb, hini asheenaꞌo taach gibeneyaaneenaꞌo tuneree boonoshina tookkaa ta giyeti wogoon biichemminaꞌone. Taan qayiree, boonoshi giya ii beeti showooch beeti bare nuggisheenaꞌoyich goyinne maddemminaꞌone.

¹⁷ Ebi tunehooba, ta kaaro boonoshi toommooch cufemmone; boonoshin qajjemmo taane; boonoshin guudi ciinaachemmo taane; boonoshiyoo aalleminaꞌone. Meeti gonde mooyonaa iritoona boonoshi toommooch shaggemmone. Boonoshiyoo ebiyooba, ‘Ebi gonde mooyo no toommooch bi shaggito, no Nuggishoo noonna tookkii tuno bi qajjitoyich toonoone?’ gettemminaꞌone.

¹⁸ Taan qajjiichii, bare nuggisheenaꞌoyich goyinnee maddoona boonoshi shuuneti gonde mooyoyich boonoshin ciroona ciinaachemmo taane.

¹⁹ “Illa and hini shoddoon kooriree, Israꞌeeleenaꞌoyich dojjibote. Boonoshi toommooch miixoo bi tunemmoyich, ebi shoddoon boonoshi mulloona boonoshi yechemmoyich tuniibote.

²⁰ Boonoshi qaabbechinaꞌoyich imma ta wogeti, ejjoonaa eeyona xuupphiibeeti showooch boonoshin ta deebetoyee gubb, maa michiꞌi boonoshi aangitoyee gubb, taan qayi, taanna tookkii boonoshi giyiti wogoon biishiree, bare nuggisheenaꞌo waan wottemminaꞌone.

²¹ Meeti gonde mooyonaa iritoona boonoshi toommooch waahooba, ebi shoddoon shalligiree, boonoshin sheeraabeeto ta tunoon ariyemminaꞌone. Boonoshi shiijjereenaꞌo mulloochee batteyaachemmone. Boonoshich imma ta wogeti showooch boonoshin batt giijjaan ta beetaa, and boonoshi gabiibeeti gaboo amo gaata ariibeeto taane” iye.

²² Ebina Muusi ebi shoddoon arooba kooriye; Israꞌeeleenaꞌoyichoo dojjiye.

²³ Aroochee Doono Yeeri Nuuni bushoo Yaasin iraashiiꞌi biich ishichiye: “Boonoshich imma ta wogeti showooch Israꞌeeleenaꞌon giijjemmo ne tunetoyich, kupphebe; maac kuxoonoo tunebe. Tawoo neenna tookki tunemmo taane” iye.

²⁴ Muusiyoo hini sheeree qaaro bullin macaafooch koorii ciichiye.

²⁵ Koorii bi ciichitoyee gubb, Doono Yeerichi wogee taabootoon shaaggiibeeti Leweenaꞌoyich ishichiꞌi gettiye:

²⁶ “Hini Sheeree Macaafoon daamiree, ittoshi Nuggishoo Doono Yeerichi wogee taabootee gaꞌooch kotiibote. Ittoshi toommooch miixoo tuneree ebi arooch beebe.

²⁷ Am shaahe hukkechonaa babberoona ittoshi gaata ariibeeto taane. Ebiyoche, and kashoona ittoshina tookkaa ta beetaa, hanaach Doono Yeeri toommooch hukkoon tiijjito ittoshine. Illa ta qitiichaa aabichehe!

²⁸ Ebi mooyon boonoshich ta gettemmoyich, wotta showoonaa shimaayoonon miixoo tuniiree boonoshi toommooch ta ceeggemmoyich, ittoshi yoodi yoodee geeneenaꞌonaa iraasheenaꞌonon ta waan kicibote.

²⁹ Ta qititoyee gubb ciroona duubemmo, ittoshich ta getteti gommonoo qayi wottemmo ittoshi tunoon ariibeeto taane. Doono Yeeri aafooch gonde mooyon tuniyemmo ittoshi tunetoyich, ittoshi shuuneebeeti shuunoona biin ippiyemmo ittoshi tunetoyich, waabeeti yemeenooch gonde mooyo ittoshi toommooch shaggemmone” iye.

Muusi Kooremmoyich Doono Yeeri Gettiti Shoddo

³⁰ Aroochee Muusi Israꞌeelee iiteenaꞌo bullich hini shoddee qaaroon waayiiꞌi gettii ciichiye. Ebi shoddee qaaro ishichii beetone: