Yibbaatoo 30 - Kafa Linguistics Project

Israꞌeeleenaꞌo Doono Yeer Waan Wottemminaꞌo Tuno

¹ Muusi Israꞌeeleenaꞌoyich ishichiye: “Illa and diiroonaa ufonon, ebi gutte mooyon ne aafooch kotiito taane. Ebi mooyo bulli ne toommooch shagaa, ne Nuggishoo Doono Yeeri neen shacciti aageteenaꞌo daggooch beebee, ebi mooyon shalligemmo neene.

² Neennaa ne shiijjeroona ittoshi Nuggishoo Doono Yeer waan wotteꞌi, hanaach neech ta gettaabeeti bi qaaroyich ceeni ittoshi mulloonaa ceeni ittoshi kashoona deꞌa ittoshi getaa,

³ ne Nuggishoo Doono Yeeri neen wochinnoon gaanniyemmone; neech ariqqemmone; aageteenaꞌo bulli daggooch neen bi shaccitoochee, wochiree neen kicemmone.

⁴ Showee tuggooch beddaahaa ne shacetaanona, ne Nuggishoo Doono Yeeri ebi aroochee neen kicemmone; aroochee neen deebemmone.

⁵ Ne Nuggishoo Doono Yeeri ne qaabbechinaꞌochi hajjee showooch neen deebemmone; newoo are showoon hajjemmo neene. Ne qaabbechinaꞌoyee beshoon neen gaanniyemmone; neenoo meechemmone.

⁶ Doono Yeeri ne mulloonaa ne shiijjereenaꞌo mulloona biich deꞌa gettemmoyich tuniyemmone. Ebiyoo ne Nuggishoo Doono Yeerin ceeni ne mulloonaa ceeni ne kashoona ne shunnemmoyich, kashoonoo ne beeyemmoyichiye.

⁷ Ne Nuggishoo Doono Yeeri ebi ufo bullin ne etteenaꞌonaa neen shixxii, duꞌii beetinaꞌonochi toommooch tuniyemmone.

⁸ Newoo wochinnoon Doono Yeerichi qaaroon waayemmo neene; hanaach ta gettaabeeti getoonoo ceechi quyemmo neene.

⁹ Ne Nuggishoo Doono Yeeri ne shuunaabeeti shuunoo bullina, meeti bushiishoona, gijjee shiijjoona, ne gochaabeeti goyoonoo oogichi ne gaannemmoyich tuniyemmone. Doono Yeeri ne qaabbechinaꞌon gaanniyoona bi emiroommon neen gaanniyoona emiremmone.

¹⁰ Ebi bi tunemmo, ne Nuggishoo Doono Yeerichi qaaroon waayaa, hini Sheeree Macaafooch kooreeti bi geteenaꞌonaa bi qociyeenaꞌonon ne quyegaata, ne Nuggishoo Doono Yeer waan ceeni ne mulloonaa ceeni ne kashoona ne wottegaatane” iye.

Kashee Gommon Woyee Qitee Gommon Shuno

¹¹ Muusi Israꞌeeleenaꞌoyich ishichiye: “Hanaach neech ta gettaabeeti geto maggoo woyee neyee wokkito toonoone.

¹² ‘Waayeree no ceechemmoyich konine shimaayooch keyiree nooch deebemmo?’ ne getaachemmoyich, bi beeto shimaayooch toonoone.

¹³ Wotta ‘Waayeree no ceechemmoyich, konine baharoyee beqach kimiree nooch deebemmo?’ ne getaachemmoyich, bi beeto baharee beqach toonoone.

¹⁴ Tunebaani ebi qaaro neech oogeti katinoone; ne ceechemmoyich, bi beeto ne noonoonaa ne mulloonoochiye” iye.

¹⁵ Muusi Israꞌeeleenaꞌoyich ishichiye: “Ebiyoche, hanaach deꞌoonaa gondoonon, kashoona beemonaa qitoonon ne aafooch kotiito taane.

¹⁶ Ne Nuggishoo Doono Yeerin shunona, bi gommona hamona, bi getoon, bi qociyoonaa bi doyoonon ceechoona, hanaach neech ta gettaabeeti ne Nuggishoo Doono Yeerichi getoon ne waayegaata, kashoona beeyemmo neene; meetishoo gettemmo neene. Giyiree woraashiya ne hammaabeeti showoochaa ne Nuggishoo Doono Yeeri neen diiremmone.

¹⁷ “Tunebaani ne mullo bara wottegaata, biich deꞌa gettemmon ne qayigaata, bare nuggisheenaꞌoyich goyinne maddeya ne gaꞌegaata,

¹⁸ ciroona aallemmo ne tunoon ta hanaach neech gettaabeeto taane. Yoordaanoosin kimiree ne hajjemmi showooch meeti yemeenoon koteyaachemmo neene.

¹⁹ “Hanaach kashoona beemonaa qitoonon, diiroonaa ufonon ittoshi aafooch ta kotiyoyich shimaayoonaa showoonon miixoo ceeggaabeeto taane. Illa neennaa ne shiijjeroona kashoona ittoshi beeyemmoyich kashoona beemon kaace.

²⁰ Ne Nuggishoo Doono Yeerin shune. Bi qaaroon waayebe. Biinna tookkishoo ikkottebe. Ebina ne qaabbechi Abrahamich, Yisaaqinaa Yaaqobinoyich imma bi wogeti showooch neennaa ne shiijjeroona meeti yemeenoon kashoona beeyemmo ittoshine” iye.