Yibbaatoo 3 - Kafa Linguistics Project

Israꞌeeleenaꞌo, Taatoo Oogin Kochii Wochoo

¹ Muusi Israꞌeeleenaꞌoyich ishichiye: “Aroochee damba wottaꞌa Bashaanee showoo waan hammehone. Bashaanee taatoo Oogi bi ginee naayinaꞌo bullin yechiꞌi noonna koyeya Edireyi katemee gaꞌooch waahe.

² Tunebaani Doono Yeeri taach ishichiye: ‘Shattaahine; biin, bi asheenaꞌo bullinaa bi showoonon ne kishooch beshiyaꞌa immeto taane; Heshiboni katemooch beechii qeejjiibee echeti Amooreenaꞌo taatoo Sihooni toommooch ne tuniitoommon, ebiyoommon bi toommooch tuniibe’ iye.

³ “Ebina no Nuggishoo Doono Yeeri Bashaanee taatoo Ooginaa bi ginee naayinaꞌo bullinon no kishooch beshiiꞌi immiye. Nowoo, ikkoonolla kashoona echiyaanoon boonoshi bullin wuxaa aalliihon.

⁴ Ebi arooba Bashaanee showooch beeti, taatoo Oogi qeejjiibeeti Arigobee showoo bullin yechehon; bi katemoo bullinoo yechehon; boonoshi waanee no deꞌaani katemoo ciroona aalloone; bulli shiche katemoon yechehon.

⁵ Ebi katemeenaꞌo bulla genje xaqqee uxeroona uxereetinaꞌonaa gooshee tuggoona tuggeebeeti gutte shaaqqechinaꞌonane; wotta xaqqee uxeraalli meeti katemeenaꞌo beetinaꞌone.

⁶ Nowoo Heshiboni taatoo Sihoonichi katemeenaꞌo toommooch no tuniitoommon, katemoo bullin happaa aalliihon; arooch beeti asheenaꞌon, anaamon, maacheenaa bushiishoonon wuxaa aalliihon.

⁷ Tunebaani gijjeenaꞌonaa are katemeenaꞌoochee no daneti mooyo bullinon keccaꞌa nooch daammehone.

⁸ “Ebina arooba Yoordaanoosi aachee beqach, Arinooni bamboochee tiijjiꞌi Hermooni guudooch beddaahaa beeti, Amooreenaꞌochi taateenaꞌo tuneti ebi gutte taateenaꞌo showoon yechehon.

⁹ Hermooni guudon Sidooneenaꞌo Siriyooni ii ceeggimmona, Amooreenaꞌo Seniiri ii ceeggiyeete.

¹⁰ Nowoo Bashaanee taatoo Oogichi showoo bullin yechehon. Ebiyoo guudi toommeexi naqqe showooch beeti katemeenaꞌo bullin, Saleeki katemoonaa Edireyi katemoonooch beddaahaa beeti Gilaadee showoonaa Bashaanee showoononiye” iye.

¹¹ Refayeenaꞌo daggoochee echeto, Bashaanee taatoo Oogi ikkeeto baachiye. Xuuroochee shuuneeti bi qeechi neexo yiixiye hiroo, bi gidoo wotta awudde hiroone. Ebiyoo and beddaahaa Amooneenaꞌochi katemoo tuneti Raaba beetone.

Muusi Aabi-keyo Waan Beeti Showoon Qoodiꞌi Imo

¹² Muusiyoo Israꞌeeleenaꞌoyich ishichiye: “Arooba ebi are Yoordaanoosi aacoochaa aabi-keyo waan beeti showoon no yechetoyee gubb, Arinooni bambee gaꞌooch, Aroꞌeeri katemoochaa dambi-waan beeti showoon, wotta geppechi Gilaadee showee qaton bi daggooch beeti katemeenaꞌona tookkaa Roobeelinaa Gaadinochi yoodeenaꞌoyich immehoye.

¹³ Echeti Gilaadee showoonaa Bashaanee showoo bullinon Minaasi yoodoochee qatinaꞌoyich immo. Bashaanee showoo, taatoo Oogichi showoone. Bashaanee showooch beeti Arigobee showoo Refayeenaꞌo Showoo getaa ceekkeebee echetone.

¹⁴ Minaasi yoodoochee tuneti Yaꞌiiri, Geshuureenaꞌonaa Maꞌakeenaꞌonochi daarooch beddaahaa beeti Arigobee showoo bullin, ebiyoo Bashaanee showoon yechiye. Arooch beeti gafeenaꞌon Yaꞌiiri Gafoo ii bi shigoona ceeggiye. Hanaach beddaahaa ebi shigoona ceekkee beetone.

¹⁵ Dambi-waan beeti Gilaadee showee qaton Minaasi yoodoochee tuneti Makiri yareenaꞌoyich immo.

¹⁶ Roobeelinaa Gaadinochi yoodeenaꞌoyich Gilaadee tiijjiꞌi Arinooni aacooch beddaahaa beeti showoon immo. Ebi aachi gutte daggo deshi-waani boonoshi daaro tunemmona, dambi-waani boonoshi daaro wotta Yaabooqi aacone. Ebiyoo Amooneenaꞌochi daaroone.

¹⁷ Ebi keejje yoodeenaꞌo showee daaro aabi-gimo waanaa Yoordaanoos aacooch bedoone. Wotta dambi-waanaa Kinerootee baharoochee tiijjiꞌi deshi-waan dugilla beeti Kiikki baharoonaa aabi-keyo waan beeti Fisigi guudi baatoonooch beddaahaa bedoone.

^18-19 “Ebi arooba Roobeelinaa Gaadinochi yoodeenaꞌoyich, Minaasi yoodoochee qatinaꞌonoyichoo ishichaa getteho: ‘No Nuggishoo Doono Yeeri hini showoon ittoshi hajjoo tuniiꞌi immitone. Meeti gijjeenaꞌo ittoshich beemon ariibeeto taane; ittoshi mecheenaꞌonaa bushiisheenaꞌona ebi gijjeenaꞌona tookki hini ittoshich ta immeti katemeenaꞌooch beebeete. Illa and ginee anaamo tuneti ittoshi asheenaꞌo ginee qiicoon cuyeree, ittoshi maneenaꞌo tuneti Israꞌeeleenaꞌoyee aaf shiichi, Yoordaanoosin kimiree boonoshi hammemmoyich tuniibote.

²⁰ Boonoshin ittoshi gaachemmo Doono Yeeri ittoshin bi kashiyoommon ittoshi maneenaꞌon bi kashiimmi wottooniye. Ebiyoo ittoshi maneenaꞌo boonoshi etteenaꞌon kochii wochiꞌi, Doono Yeeri boonoshich immiibeeti, Yoordaanoosi aacoochaa aabi-gimo waan beeti showoon boonoshi yechimmi wottooniye; aroochee diggoona arooch kotemminaꞌone. Ebiyee gubb, ittoshi bulli ittoshich ta immeti hini showooch wottemmo ittoshine’ iyo.

²¹ “Arooba Yaasich ishichaꞌa getto: ‘No Nuggishoo Doono Yeeri ebi gutte taateenaꞌo toommooch bi tuniito bullin ne aafoona beeggeto neene. Biyoo ebi are ne hammaabeeti showee taateenaꞌo bulli toommooch ebiyoommon tuniyemmone.

²² Ittoshi Nuggishoo Doono Yeeri ittoshi qoodoon koyeebeeto bi tunetoyich, boonoshin shattaahote’ iyo.

Doono Yeeri Muusi Kanaan Giyaachemmoyich Bayo

²³ “Ebi arooba Doono Yeer waan ishichaa kupphii corootiyo:

²⁴ ‘Nuggishoo Doono Yeero, ne oogoonaa giidechi ne mochoonon bekkiibeeti, batti batti malletoon ne guuno taach bekkiito neene. Shimaayoochoo tuneba hini showee toommooch ne shuunetoommi, ebiyoommi ooge mooyon tuniyoon hakkemmi nuggishoo aalloone.

²⁵ Yoordaanoosin kimiree, gaawe showoon, geppechi gaawe showoonaa Libanoosi guudonon ta beeggemmoyich neen qollehoye’ iyo.

²⁶ “Tunebaani Doono Yeeri ittoshi naboona ta toommooch kaareꞌi, ta qolloon waayemmon qajjiye. Biyoo taach ‘Beddiye, ebiyee bekk ebi mooyon tiijjiyaahine.

²⁷ Ne, Yoordaanoosin kimaachemmo neene; Fisigi guudi toommooch keyiichi, deshi-waaninaa dambi-waaninon, aabi-keyo waaninaa aabi-gimo waaninon ciine. Bi guudo bullin manjii ciine.

²⁸ Ebi ne beeggeti showoon boonoshi woraashemmoyich, Israꞌeeleenaꞌo aafooch shiichiree Yoordaanoosin boonoshi kimmemmoyich tuniyemmo Yaasine. Ebich bi kupphemmonaa bi manjemmonoyich biin gaachebe. Bi tuniyemmi mooyonoo biich gete’ iye.

²⁹ “Ebich Beet Feꞌoori katemee ciinooch beeti bambooch kotaꞌa yagiyone” iye.