Yibbaatoo 28 - Kafa Linguistics Project

Yeerich Deꞌa Getona Daneebeeti Diiroo

¹ Muusi Israꞌeeleenaꞌoyich ishichiye: “Ne Nuggishoo Doono Yeerichi qaaroon ne waayegaata, hanaach neech ta gettaabeeti bi geteenaꞌon manjii ne quyegaata, ne Nuggishoo Doono Yeeri showee toommooch beeti aageteenaꞌo bulliyee beshiiree neen oogiyemmone.

² Ne Nuggishoo Doono Yeerichi qaaroon ne waayegaata, ebi diireenaꞌo bulli neech tunemminaꞌone; neenoo yechemminaꞌone.

³ “Katemooch beechi diireyemmo neene; ne goyee budooch beechishoo diireyemmo neene.

⁴ “Ne shiyaabeeti bushiishoona, ne gochaabeeti goyoona, ne shiijjaabeeti gijjoona, bagee shiijjoonaa emmishee shiijjoona diireyemmo neene.

⁵ “Ne maayi gotoonaa ne bukee qondoona diireyemmone.

⁶ “Ne gimona diireyemmo neene; ne keyonoo diireyemmo neene.

⁷ “Doono Yeeri ne toommooch tiyiibeeti ne etteenaꞌon koyi ne wochemmoyich tuniyemmone; ikke gommona waaree neenna koyemminaꞌone; tunebaani shabaatte gommona ne aafoochee woci aallemminaꞌone.

⁸ “Doono Yeeri ne gotoonaa ne kishoona ne shuunaabeeto bullinon diiremmone; ne Nuggishoo Doono Yeeri neech bi immiibeeti showoochaa neen diiremmone.

⁹ “Ne Nuggishoo Doono Yeerichi getoon ceechaabeeto, bi gommonoo hammaabeeto ne tunegaata, wogeꞌi neech bi gibenikkitoommon, biich yaafeeti asho tuniiree neen manjiyemmone.

¹⁰ Aroochee showee toommooch beeti asheenaꞌo bulli Doono Yeeri biich neen bi kaacon beeggemminaꞌone; ebina neen shattemminaꞌone.

¹¹ Doono Yeeri neech imma ne qaabbechinaꞌoyich wogeꞌi bi gibenikkiti showoochaa meeti bushiishoon, meeti gijjeenaꞌonaa meeti maayoonon imiree neen gaanniyemmone.

¹² “Doono Yeeri shimaayeexi bi goonoochee amiyon yarimmoona ne showooch dichiree, ne kishoona ne shuuneto bullin diiremmone. Ebich meeti aageteenaꞌoyich erettiyemmo neene; tunebaani ne, koni waaneenona eretteyaachemmo neene.

¹³ Doono Yeeri qaroonani, ceeroon neen tuniyaachemmone. Hanaach neech ta gettaabeeti, ne Nuggishoo Doono Yeerichi geteenaꞌon ceechaꞌa ne quyegaata, ashoyee damboani deshoon tuneyaachemmo neene.

¹⁴ Bare nuggisheenaꞌoyich goyinne maddeya, hanaach neech ta getteti qaaroochee ciroona yoocha qanna gettaahine” iye.

Yeerich Deꞌa Getti Qayona Woyemmi Ufo

¹⁵ Muusi Israꞌeeleenaꞌoyich ishichiye: “Tunebaani ne Nuggishoo Doono Yeerichi qaaroon waayoon ne qayigaata, hanaach neech ta gettaabeeti geteenaꞌonaa qociyeenaꞌonon manjii quyo ne qayigaatoo, ebi ufo bulli ne toommooch shaggemmone; neenoo yechemmone.

¹⁶ “Katemooch beechi uppeyemmo neene; ne goyee budooch beechishoo uppeyemmo neene.

¹⁷ “Ne maayi gotoonaa ne bukee qondoona uppeyemmone.

¹⁸ “Ne shiyaabeeti bushiishoo, ne gochaabeeti goyo, ne shiijjaabeeti gijjoo, ne bagoonaa ne emmishee shiijjoona uppeyemmone.

¹⁹ “Ne gimona uppeyemmo neene; ne keyonoo uppeyemmo neene.

²⁰ “Doono Yeerin qajjaꞌa gonde mooyon ne shuunegaata, amoonolla shuuneya ne qiiccetaa, qaaꞌi mooyon ne toommooch deebiree neen betiyemmone; duꞌo neen yechemmone; kaateree ciroona aallemmo neene.

²¹ Doono Yeeri giyi woraashiya ne hammaabeeti showoochee ciroona neen bi aalliimmi wottoon, kupphe biiyoona neen yexxemmone.

^22-23 Doono Yeeri shattiiti biiyoon deejji ittoshin bi yexaa, ittoshich bi immiibeeti showoochaa ittoshi bulli qiti ciiremmo ittoshine; maajjiibeeti biiyoona, gaaboonaa baribare qeddee gaamee biiyoonoo xuuxemmo ittoshine. Doono Yeeri ittoshiyee damba beeti shimaayoochee amiyon aalliitaa, ittoshiyee desh beeti showoo xuuroo wogoommon wogemmone; gaamiibeeti yongoonaa cindoonon deejji ittoshi maayoon aalliyemmone.

²⁴ Doono Yeeri amichi qoodoyich quttoonaa qacoonon ne showooch dichemmone. Ebiyoo neen bi aalliimmi wottoon, ne toommooch dambee kindemmone.

²⁵ “Doono Yeeri ne etteenaꞌo neen koyi wochemmoyich tuniyemmone. Ikke gommona hamiree boonoshina koyemmo neene; tunebaani shabaatte gommona boonoshi aafoochee woci aallemmo neene. Ebi ne toommooch shaggiton beegiree, showee toommooch beeti asheenaꞌo bulli keqqemminaꞌone.

²⁶ Ne dubeno shimaajji gacoonaa kubbi cooxonoyich tunemmone. Eboshin yookkemmo aallemmone.

²⁷ Doono Yeeri Gibitseenaꞌochi toommooch bi deejjitoommi biiyoona ittoshi xuuxemmoyich tuniyemmone. Gaaboonaa mayonon ne achooch kichemmone; ne qeddo bulli yaashemmone; huceshoo gettemmone; ebi biiyoochee wodaachemmo neene.

²⁸ Doono Yeeri neen geyiyemmone; ne aafoon wolliyemmone; ne mulloonoo baalliyemmone.

²⁹ Biich manderetaa, shafeebeeti aaf doogoochoommon, areddee aaboona shafebee shaꞌemmo neene. Ne shuunaabeeti mooyo aabinona neech kaameyaachemmone. Bulli aaboon neexaa hajjeyemmo neene; bokkemmo neene; neen gaachemmo aalloone.

³⁰ “Mecheen shaagga maakkiyemmo neene; tunebaani baroo daamiree biin qeyemmone. Kexon haggemmo neene; tunebaani arooch beetaachemmo neene. Woyinoon bechemmo neene; tunebaani bi aafoon maataachemmo neene.

³¹ Ne aafoona ne ciini beetaa, ne gattoo basheyemmone; tunebaani bi meenoochee ciroona maataachemmo neene. Ne kuro ne aafoochee bogaa hammemmone; tunebaani neech wochaa icheyaachemmone. Ne bago ne ettoyich ichemmone; neen gaachemmo aallemmone.

³² Ne anaami bushiisheenaꞌonaa maache bushiisheenaꞌona, ne ciini beetaa, bare showee asheenaꞌoyich beshiitaa ichemminaꞌone. Boonoshin echiyoyich giidoon muccemmo neene; ‘Woyemminaꞌone’ geti qemi qemona ciinibee taahemmo neene.

³³ Ne aajjaa yulletaa ne showooch shaggiti maayoon ne ariyaani bare showee asho maayemmone. Neech danemmo bulli aaboon xuuxoonaa xukkoona baach tunemmone.

³⁴ Ne aafoona ne ciinnaabeeti mooyoochee tiyitona, geyemmo neene.

³⁵ Doono Yeeri wodaani, shajjiriibeeti gaaboona ne gutenoonaa ne borboroonon, ne baatoochee tiijjiꞌi ne shimbooch beddaahaa beeti ne ashittino bullin yexxemmone.

³⁶ “Doono Yeeri ne woyee ne qaabbechinaꞌo ariyaani aagetooch, neennaa ne toommooch ne taatiiti taatoona hammemmoyich tuniyemmone. Aroochaa mixonaa xaqqoonoochee shuuneeti nuggisheenaꞌoyich goyinne maddemmo neene.

³⁷ Doono Yeeri neen bi shacciibeeti showooch beeti aageteenaꞌo bulli ebi ne toommooch shaggiti mooyon beegiree keqqemminaꞌone. Boonoshiyoo ne mooyon tochibee ne toommooch cooqqiremminaꞌone.

³⁸ “Ne budooch wodde yaroon daami shookkemmo neene; tunebaani gechoo maa aalliitaa, aroochee ne macemmo giishechooniye.

³⁹ Woyinoon bechiree shiime yechemmo neene; tunebaani hipperoo ebi woyinoon bi aalliitaa, woyinee aafoon macaachemmo neene; woyinee uyoonoo aroochee uyaachemmo neene.

⁴⁰ Ne showoo bulliich zayitee mixo collemmone; tunebaani ebi zayitee michi aafo shekiree bi ciiretaa, ne achooch ne huutemmon muccemmo neene.

⁴¹ Anaami bushiishoonaa maache bushiishoonon shiyemmo neene; tunebaani kecaa hammemminaꞌo boonoshi tunetoyich, neech tuneyaachemminaꞌone.

⁴² Ne mixinaꞌonaa ne showooch aafeebeeti mooyo bullinon gechoo aalliyemmone.

⁴³ “Ne showooch koteti shiqqoo beshi beshi hammemmone; tunebaani ne giishe gittemmo neene.

⁴⁴ Bi neech erettiyemmone; tunebaani biich ne erettiyemmi gijjoo neech aallemmone. Bi, qaro tunemmone; tunebaani ne, ceero tunemmo neene.

⁴⁵ “Ne Nuggishoo Doono Yeerichi qaaroon waayo ne qajjetoyich, wotta bi getoonaa bi qociyoonon ceechaa quyo ne qajjetoyich, neen bi aalliimmi wottoon, ebi ufo ne toommooch shaggemmone; neen yoohi dabbiree yechemmone.

⁴⁶ Ebiyoo neennaa ne shiijjeroonochi toommooch Doono Yeeri nallee malletoo bulli yemeenoon tunemmone.

⁴⁷ Ne Nuggishoo Doono Yeeri bulli gommona beemo neech mashaamemmoyich tuniitone; tunebaani ne, oogichaa emiraabee biich goyinnaa maddaano neene.

⁴⁸ Ebich neen koyiree yechemmi etteenaꞌon bi deejjaa, newoo shaace shachewebee, ne tahemmon muccebee, oogetonoo girebee boonoshich maddemmo neene. Doono Yeeri neen bi aalliimmi wottoon, xuuree waanjoon ne qettooch haxxemmone.

⁴⁹ “Doono Yeeri booyo afaafinoona kindoommon kindiibeeti, boonoshi noonoon ne ariyaani aagetee asheenaꞌo wohoochee, showee tuggoochee waaree neen boonoshi kochemmoyich, tuniyemmone.

⁵⁰ Boonoshiyoo geenoon oogiyaani, bushoyichoo ariqqeyaani maacmanje asheenaꞌone.

⁵¹ Neen boonoshi aalliimmi wottoon, ne gijjee shiijjoonaa budeexi ne maayoonon maaree aalliyemminaꞌone; ne maayoochee, ne woyinoochee, ne zayitoochee, ne miimoochee, bagoonaa emmishoonoochee amoonolla echiyaachemminaꞌone. Newoo qiti ciiremmo neene.

⁵² Ne Nuggishoo Doono Yeeri neech immiti showoo bulliich beeti, ne gibenaabeeti, neexi genjeenaꞌonaa manjeenaꞌona tuneti xaqqee uxereenaꞌo bullin happii boonoshi aalliimmi wottoon, are showoo bulliich beeti ne katemeenaꞌo bullin giishi yechemminaꞌone.

⁵³ “Ne etteenaꞌo giichiꞌi neen boonoshi xuuxiihooba, ne Nuggishoo Doono Yeeri neech immiti ne hajjee bushiisheenaꞌo tuneti, ne anaami bushiisheenaꞌonaa maache bushiisheenaꞌonochi meenon maayemmo neene.

^54-55 Etto bi katemoon giichitoyich, ariqqechonaa shiimechona tuneti asholla oogichii mandaacheree bi hajjee bushiishoon maayemmone. Ebin bi tuniyemmo, bi maayemmi maayo amolla aallo bi tunetoyichiye. Biyoo ariqqaalli mulli manjoon tuneree, ebi aroochee bi manoyich woyee shuni bi mecheyich woyee echeti bi bushiisheenaꞌoyich qoodaachemmone.

^56-57 Ebiyoommon wotta ariqqechinaa shiimechina, oogeti bi gaannoochee tiyitona bi baatoona showoon neexaani ureyolla ebiyoommon tuniyemmine. Etto bi katemoon giichitoyich, shaacoona mandaacheree bi shiyeti bushoonaa bi shuyonon aashoochaa maayemmine. Ebi aroochee shunnaa bi beeti bi kenoyich woyee bi bushoo aabichona qoodaachemmine” iye.

⁵⁸ Muusi Israꞌeeleenaꞌoyich ishichiye: “Hini macaafooch kooreeti ebi sheeree qaareenaꞌon manjiiꞌa quyo ne qayigaata, wotta oogee yiirechonaa shattiitona tuneti, ne Nuggishoo Doono Yeerichi shigoon shaton ne qayigaata,

⁵⁹ Doono Yeeri shattii giiriiti naxoon, yechiichii gawukkaani, keqqichiti biiyoonoo neennaa ne shiijjeroonochi toommooch deebemmone.

⁶⁰ Ne shattaabeeti, Gibitsee showeexi biiyo bullin wochinnoon ne toommooch bi deebaa, ebi biiyo neenna yeshemmone.

⁶¹ Ebiyoommon wotta Doono Yeeri neen bi aalliimmi wottoon hini Sheeree Macaafooch kooreyaani baribare biiyoonaa naxoonon ne toommooch deebemmone.

⁶² Ittoshi Nuggishoo Doono Yeerichi qaaroon waayoon ittoshi qajjitoyich, shimaajji xojjenoochoommon ittoshi meettitaanona, giisheche asho baach echemmone.

⁶³ Doono Yeeri gaawe mooyon ittoshich bi tuniyoona, wotta shiijje shiijjere ittoshi meettemmoyich bi tuniyoona bi emiroommon, ebiyoommon ittoshin bi aalliyoonaa billimoon ittoshi toommooch bi deebona emiremmone. Giyiree ittoshi woraashemmi showoochee waaxemmo ittoshine.

⁶⁴ “Doono Yeeri showee tuggoochee tuggooch beddaahaa beeti aageteenaꞌo daggooch neen shaccemmone. Ebi aroochaa ne woyee ne qaabbechinaꞌo ariyaani, mixonaa xaqqoonoochee shuuneeti bare shahalleenaꞌoyich goyinne maddemmo neene.

⁶⁵ Ebi aageteenaꞌo daggoochaa diggoon muccemmo neene; ne baatoo tooqqemmi xaaꞌoon muccemmo neene. Ebi aroochaa Doono Yeeri neen betiyemmone; gibenoon ne kuxxemmonaa goggoon ne mawiyemmonon tuniyemmone.

⁶⁶ ‘Asho taan wuxemmone’ geti shati beeyemmo neene; areddoonoo xumoonoo keqqi beeyemmo neene; ne kasheyoo buushaaraalle tunemmine.

⁶⁷ Ne mullee keqqoochee tiyitonaa ne aafo ciinniibeeti mooyoochee tiyitona harimmona, ‘Abo xumeshoo geta’ gettemmo neene; xumemmona wotta, ‘Abo harishoo geta’ gettemmo neene.

⁶⁸ ‘Wochinnoon wotteree arooch hamaachemmo neene’ bi iti Gibits Doono Yeeri markaboona ne hammemmoyich tuniyemmone. Aroochaa guunonaa gonneenon tunoyich, ittoshi etteenaꞌoyich ittoshi qelloon kemma qaawemmo ittoshine; tunebaani kememmon daneyaachemmo ittoshine” iye.