Yibbaatoo 27 - Kafa Linguistics Project

Yalle Xaqqeenaꞌooch Doono Yeerichi Sheeroo Kooreyoo

¹ Aroochee Muusi Israꞌeelee geeneenaꞌona tookkii tuneꞌi asheenaꞌoyich ishichiye: “Hanaach ittoshich ta gettaabeeti geteenaꞌo bullin waayebote.

² Yoordaanoosin kimmiꞌi, ittoshi Nuggishoo Doono Yeeri ittoshich immiibeeti showooch ittoshi giyiyooba, ogooge xaqqeenaꞌon daami neechiichi, booroona dikkebote.

³ Ne qaabbechinaꞌochi Nuggishoo Doono Yeeri neech bi gibenikkitoommon, ejjoonaa eeyona xuupphiibeeti, ne Nuggishoo Doono Yeeri neech immiibeeti showooch gimoyich Yoordaanoosin ne kimiyooba, ebi sheeree qaaro bullin arooch kooribe.

⁴ Yoordaanoosin ne kimiyooba, hanaach neech ta gettetoommon, hini xaqqeenaꞌon Ebaali guudi toommooch neechibe. Ebi xaqqeenaꞌochi toommoochoo booroon dikkebe.

⁵ Ebi aroochaa ne Nuggishoo Doono Yeerich deejjee gudoon xaqqoona shuunebe. Ebi xaqqo xuuree qiicoona xareeto tunaaye.

⁶ Xareyaani xaqqoona ne Nuggishoo Doono Yeerich deejjee gudoon shuunebe. Aree toommooch ne Nuggishoo Doono Yeerich micciibeeti deejjoon giddiibe.

⁷ Ebi aroochaa ikkittinee deejjoon deejjiree, mame. Ne Nuggishoo Doono Yeeri aafoochaanoo emiribe.

⁸ Sheeree qaaroon xaqqeenaꞌochi toommooch xalla bekkiiꞌi kooroon batteyaahine” iye.

⁹ Aroochee Muusi qeesheenaꞌo tuneti Leweenaꞌona tookkii tuneꞌi Israꞌeeleenaꞌo bullich ishichiye: “Israꞌeelo, cikkiree elle waayebe. Hanaach ne Nuggishoo Doono Yeerichi asho tuneto neene.

¹⁰ Illa ebich ne Nuggishoo Doono Yeerichi getoon waayebe. Hanaach neech ta gettaabeeti bi getoonaa bi qociyoonon ceechi quyebe” iye.

Yeerich Deꞌa Getti Qayona Uppeyoo

¹¹ Muusiyoo arooba asheenaꞌoyich ishichiꞌi gettiye:

¹² “Yoordaanoosin ittoshi kimmitoyee gubb, Simooni yoodo, Lewi yoodo, Yihudi yoodo, Yisakoori yoodo, Yooseefi yoodoonaa Biiniyaami yoodoona asheenaꞌon diiroyich, Gerizimi guudi toommooch neexebe.

¹³ Wotta Roobeeli yoodo, Gaadi yoodo, Aseeri yoodo, Zebulooni yoodo, Daani yoodoonaa Nifitaali yoodoona asheenaꞌon ufoyich, Ebaali guudi toommooch neexebe.

¹⁴ “Aroochee Leweenaꞌo boonoshi qaaroon oogichiree Israꞌeeleenaꞌo bullich ishichibeete:

¹⁵ “ ‘Ariyechi ashi kishoona shuuneeti, Doono Yeeri aafoochaa shicheti, xaqqoochee, mixoochee woyee xuuroochee shahalloon shuuneꞌi aashoona goyinneebeeto uppeton tunebe’ geteete. “Asheenaꞌo bulliyoo ‘Ameena’ geteete.

¹⁶ “ ‘Bi nihoon woyee bi indeen giishiibeeto uppeton tunebe’ geteete. “Asheenaꞌo bulliyoo ‘Ameena’ geteete.

¹⁷ “ ‘Bi giyoochi danee malletoon waaxxiibeeto uppeton tunebe’ geteete. “Asheenaꞌo bulliyoo ‘Ameena’ geteete.

¹⁸ “ ‘Aaf doogoon xumme gommo waan yaabiibeeto uppeton tunebe’ geteete. “Asheenaꞌo bulliyoo ‘Ameena’ geteete.

¹⁹ “ ‘Shiqqeenaꞌochi, nihaalleenaꞌonaa xuumeenaꞌonochi dayinnetoon dabiibeeto uppeton tunebe’ geteete. “Asheenaꞌo bulliyoo ‘Ameena’ geteete.

²⁰ “ ‘Bi nihoo mecheen qeyimmo, bi nihoochi qeenon bi eeꞌitoyich, uppeton tunebe’ geteete. “Asheenaꞌo bulliyoo ‘Ameena’ geteete.

²¹ “ ‘Gijjoon woyee cooxon qeyiibeeto uppeton tunebe’ geteete. “Asheenaꞌo bulliyoo ‘Ameena’ geteete.

²² “ ‘Bi nihoo woyee bi indeechi bushee tuneti bi maneen qeyiibeeto uppeton tunebe’ geteete. “Asheenaꞌo bulliyoo ‘Ameena’ geteete.

²³ “ ‘Bi amaateen qeyiibeeto uppeton tunebe’ geteete. “Asheenaꞌo bulliyoo ‘Ameena’ geteete.

²⁴ “ ‘Aashoona biinoommi bi manoon wuxiibeeto uppeton tunebe’ geteete. “Asheenaꞌo bulliyoo ‘Ameena’ geteete.

²⁵ “ ‘Xalle ashoon wuxoyich xuccoon maabeeto uppeton tunebe’ geteete. “Asheenaꞌo bulliyoo ‘Ameena’ geteete.

²⁶ “ ‘Hini sheeree qaaroo bullin ceechiꞌi quyeyaano uppeton tunebe’ geteete. “Asheenaꞌo bulliyoo ‘Ameena’ geteete” iye.