Yibbaatoo 23 - Kafa Linguistics Project

Iitee Daggooch Giyaachemmi Asheenaꞌo

¹ Muusi Israꞌeeleenaꞌoyich ishichiye: “Bi cammo qicheto woyee nasheeto, Doono Yeer asheenaꞌochi iitee daggooch giyaaye.

² “Gamo xifeeꞌi shiijjeto tuneba aashirinnee shiijjerooch beddaahaa beeti bi yaroo, Doono Yeer asheenaꞌochi iitee daggooch giyaaye.

³ “Amoonee asho tuneba Moꞌabee asho, aashirinnee shiijjerooch beddaahaa Doono Yeer asheenaꞌochi iitee daggooch bulli yemeenoon giyaaye.

⁴ Ebiyoo Gibitsee ittoshi keyiyooba aaconaa maayoonon ittoshich giddiyoo boonoshi qajjitoyichiye. Wotta Mesopotaamee showooch, Fetoori katemooch beeti, Beꞌoori bushoo Balaami neen bi uppemmoyich, gijjoon qocciꞌi boonoshi deebitoyichiye.

⁵ Tunebaani ne Nuggishoo Doono Yeeri Balaamichi getoon waayemmon qajjiye; neen bi shunnitoyich, ebi ufon diirooch wochiye.

⁶ Ebich ne beemmi yemeeno bullin diggoona boonoshi beeyemmoyich woyee mooyo boonoshich bi mashaamemmoyich tuniyaahine.

⁷ “Ne manoo bi tunetoyich, Edoomee ashoon ciigeyaahine. Iibboo tunaꞌa bi showooch ne kotetoyich, Gibitsee ashoonoo ciigeyaahine.

⁸ Keejjinnee shiijjeroonaa aroyee gubb beeti shiijjeroona tuneti boonoshi yaroo Doono Yeer asheenaꞌochi ikkittinee daggooch gibe” iye.

Ginee Kaamboon Xalloo Tuniiꞌi Quyo

⁹ Muusi Israꞌeeleenaꞌoyich ishichiye: “Ne etteenaꞌona tookki koyeya kechaa hammaꞌa kaambo geddaa ne kotehooba, neen eeꞌiyemmi mooyo bulliichee ne qelloon quyebe.

¹⁰ Ittoshi daggoochee ikke asho bi keeroon xumoona bi achooch bi ukkigaata, kaamboochee maach keyiree xumemmi wottoon arooch beebe.

¹¹ Showoo womikkemmona, bi achoon machebe. Aabe giyemmona, kaambooch wotteree gibe.

¹² “Aachi ukkoo neech qaawiihooba, hamiree ne ukkemmi xaaꞌoon kaamboyee maach qanniibe.

¹³ Ne ginee qiicoona tookki kootteroon yeshe. Ebiyoo oppoon iiyiree arooch qashoon ne qashemmonaa qashoonoo aroona ne shiccemmonoyichiye.

¹⁴ Ne Nuggishoo Doono Yeeri neen wodiiya, ne etteenaꞌonoo ne kishooch beshii imma, ne kaambee daggoona shaꞌeebeeto bi tunetoyich, gonde mooyon beegiree, neen qayi wotte bi hamaachemmoyich, ne kaambo xalloo tunebe” iye.

Kanaanee Showooch Beemichon Ciinnii Beetona Icheti Baribare Sheereenaꞌo

¹⁵ Muusi Israꞌeeleenaꞌoyich ishichiye: “Bare ashi showeexi guuno bi doono waanee aalleꞌi Israꞌeelee showooch bi waagaata, bi doonoyich wochiree immaahine.

¹⁶ Ne showooch beeti katemoochee bi shunniti xaaꞌoo aabiichona kotebe. Newoo biin xuqqaahine.

¹⁷ “Israꞌeeleenaꞌochi maache bushiisheenaꞌo woyee anaami bushiisheenaꞌo daggoochee yaafee kechi yahechinaꞌo danaayeete.

¹⁸ Ne Nuggishoo Doono Yeeri gijjoyicha iꞌi boonoshi ashittinoon kemmiibeeti asheenaꞌon, maacheen tuneba anaamon shixxii beetone. Ebiyoommi gommona daneti gijjoo Doono Yeerichi kexooch woyaaye; biich mookkeeto bi tunetaanoona, woyaaye.

¹⁹ “Gijjoon woyee maayoon woyee amee mooyonona ne manoyich ne erettiigaata shimon echeyaahine.

²⁰ Israꞌeelo tuneyaani asho waanee shimon deꞌon hakkihine. Tunebaani giyi woraashiya ne hammaabeeti showoochaa, ne shuunaabeeti mooyo bullina ne Nuggishoo Doono Yeeri neen bi diiremmoyich, ne manoyich koyitiyaahine.

²¹ “Ne Nuggishoo Doono Yeerich ne mookkegaata, ne Nuggishoo Doono Yeeri ebin ne waanee qaawiibeeto bi tunetoyich, ne mookketon ceechaanoon yagiyaahine. Ne ceechoo qayigaata, ebi neech axaaxoon tunemmone.

²² Doono Yeerich mookkee qayo axaaxoo toonoone.

²³ Tunebaani ne noonoochee kechiton kupphiiree ceechibe. Ebiyoo ne hajjee noonoona, ne daaggoona ne Nuggishoo Doono Yeerich ne mookketoyichiye.

²⁴ “Ashi woyinee goyee daggoona ne beshaa beegaata, ne michemmi wottoon bi aafoon mamon hakkihine; tunebaani aroochee amoonolla ne qiicooch geddaahine.

²⁵ Ashi maayi daggoona ne beshaa beegaata, ne kishoona kuxxaꞌa mamon hakkihine. Tunebaani maayo amoonolla magaadoona qeccaahine.