Yibbaatoo 22 - Kafa Linguistics Project

¹ Muusi Israꞌeeleenaꞌoyich ishichiye: “Israꞌeelee asho tuneti ne manoochi miimo woyee bago woyee emmisho aallee hammii beeton ne danegaata, bi waan wochi deebani, ciinibee qayi hammaahine.

² Ebi gijjee doono bi beeto wohooch bi tunegaata woyee bi doonon ne tuushigaata, ne kexooch daambe. Bi doono qaawii bi waahooba, biich wochiree imbe.

³ Ne manoochi kuroon, tahoon woyee aalleti bi qiico amoonolla ne danegaata, ebiyoommon tuniiballi, ciinibee qajjaahine.

⁴ “Ne manoochi kuro woyee miimo gommooch dihiꞌi bi beetaa ne beegigaata, ne manoon ne gaachetaa tiyi neexebani, ciinibee qayi besheyaahine.

⁵ “Maachee anaamochi tahoon tahaayuye; anaamoo maachechi tahoon tahaaye. Ebin tuniibeeti asho ne Nuggishoo Doono Yeer waanaa ciigeetone.

⁶ “Gommona hammaabee kafee bi gabexee toommooch woyee bi bushiishee toommooch guuppaꞌa bi beeti kafee kexon, michi toommoochee woyee showee toommoochee ne danegaata, kafee indeen bi bushiishoona tookki daammaahine.

⁷ Indeen gawukkaachaa, kafee bushiishoon daamon hakkihine. Ebin ne tuniigaata, mooyo neech mashaamaa, meeti yemeenoon beeyemmo neene.

⁸ “Andire kexon ne hagiyooba, asho kechi toommoochee holliꞌi bi qitigaata, bi damee naboona ne echeyaachemmoyich, ne kechi toommi guudoona degi bajjemmi uxeroon shuunebe.

⁹ “Ne woyinee goyee daggooch bare maayoon shookkaahine. Ebin ne tuniigaata, ne shookketi maayoonaa ne maciti woyinee aafoona, ebi budoochee ne daneto bulli Doono Yeerich kechito tunebe.

¹⁰ “Gattoonaa kuroonon qariiree gochaahine.

¹¹ “Muttee tuppoonaa bagee eexonon ikkochii yokketaa shippeti tahoon taheyaahine.

¹² “Toommooch ne tahaabeeti qoreddee awudde gocoochaa caappoon gede” iye.

Keno Bi Mecheen Taggegaata Tunemmi Mooyo

¹³ Muusi Israꞌeeleenaꞌoyich ishichiye: “Ikke asho mecheen shaaggii biinna tookkii qeyiichii, biin bi shixigaata,

¹⁴ bi shigoon gondiiꞌi, ‘Hini ureen shaaggaꞌa bi waan ta shagaa gidiidee tuno qajjahane’ iꞌi bi taggegaata,

¹⁵ busheechi nihoonaa indeena damee cariqqoon yeshiree katemee kellooch beeti addibaabooch, geeneenaꞌo waan deebeete. Ebiyoo bushee gidiidee bi tunoon bekkiyemmone.

¹⁶ Busheechi nihoo geeneenaꞌoyich, ‘Ta busheen hini uroyich shaakkiihoye; tunebaani busheen shixxiye.

¹⁷ Biyoo “Ne busheen ta shaagiyooba gidiideyaaneene” iꞌi bi shigoon aalliihe. Tunebaani ta bushee gidiidee bi tunee malletoo ebiyoche’ gete. Boonoshiyoo damee cariqqoon geeneenaꞌoyich yaggi bekkiibeete.

¹⁸ Ebina are katemee geeneenaꞌo are uroon deebiree arengoona xoobeete.

¹⁹ Ebi uro Israꞌeelee gidiideechi shigoon bi gondiitoyich, ikke balle sheqeelee xure birewoon bi toommooch maaceete. Ebi gijjoon busheechi nihoyich imbeete. Ebina bushee bi mechee tunemmine. Bi beemmi yemeeno bullin biin gawukki daachiyaaye.

²⁰ “Tunebaani taggoo iberoo tuneꞌi, bushee gidiidee bi tunee malletoo aallegaata,

²¹ busheen bi nihoochi kechi kellooch daamiree are bi beeti katemeexi asheenaꞌo xaqqoona yexiree wuxibeete. Ebiyoo batt bi nihoo kexooch beechaa, shunee mamona Israꞌeeleenaꞌo daggooch yeelloon bi deebetoyichiye. Ebin tuniyoona, ebiyoommi gonde mooyon ittoshi daggoochee wokkiibote” iye.

Shunee Mamichon Ciinnii Beetona Icheti Sheeroo

²² Muusi Israꞌeeleenaꞌoyich ishichiye: “Ikke asho bare ashi mecheen qeyiibee bi yechegaata, ureena tookkii shunoo maati uroonaa ureena boonoshi guttiyona qitibeete. Ebin tuniyoona, ebiyoommi gonde mooyon Israꞌeelee showoochee wokkiibe.

²³ “Ikke asho maataafo tippeti gidiideen yechiꞌi katemee daggoochaa bi qeyigaata,

²⁴ boonoshi guttinona are katemee kellooch beeti addibaabooch deebiree xaqqoona yexi wuxibote. Bushee bi qitemmo, katemee daggooch beechaa, ‘Taan gaachebote’ iyaꞌa cookoo bi qajjetoyichiye. Wotta uro bi qitemmo, ashi mecheen bi qeyitoyichiye. Ebin tuniyoona, ebiyoommi gonde mooyon ne daggoochee wokkiibe.

²⁵ “Tunebaani ikke asho maataafo tippeti busheen, bi katinooch asho aalli xaaꞌoochaa daneꞌi, giidoona yechii bi qeyigaata, ebi are uro baach qitibe.

²⁶ Tunebaani bushee toommooch amoonolla tuniyaahote. Qitooch biin bechemmi, bi shuuneti axaaxoo aalloone. Ebiyoommi mooyo, ikke asho bare ashi toommooch tiyiꞌi biin bi wuxoommone.

²⁷ Ebiyoo uro busheena daneꞌi biin bi qeyito, ashaalli holle xaaꞌooch bi ikkeeti beetaa bi tunetoyich, bi cookaa shagiree biin gaachemmi asho aalletoyichiye.

²⁸ “Ikke asho maataafo tippeyaani gidiideen yechii qeyiꞌi bi danegaata,

²⁹ ebi uro busheechi nihoyich aache sheqeelee xure birewoon imbe. Biin giidoona yechii bi qeyitoyich, biich mecheen tunebuye. Bi beemmi yemeeno bullin biin gawukki daachiyaaye.

³⁰ “Asho koniyoona bi nihoo mecheen shaaggaaye; bi nihoochi qeenon eeꞌiyaaye” iye.