Yibbaatoo 20 - Kafa Linguistics Project

Koyooba Tunemmi Mooyo

¹ Muusi Israꞌeeleenaꞌoyich ishichiye: “Gibitsee neen kichii deebiti ne Nuggishoo Doono Yeeri neenna tookkii bi tunetoyich, ne ettoona koyeya koyooch hammaꞌa, neechoyee beshiti gaarin, hareshoonaa ginee naayinaꞌonon ne beegigaata, shattaahine.

² Koyeya ittoshi katiniyooba, qeeshoo aaf besheree asheenaꞌoyich,

³ ishichibe: ‘Israꞌeeleenaꞌote, waayebote. Hanaach ittoshi etteenaꞌona tookki koyeya hammiibeeto ittoshine. Ittoshi mullo keqqaaye; shati qeweyaahote.

⁴ Ittoshi Nuggishoo Doono Yeeri ittoshi etteenaꞌon kocha, wudoonoo ittoshi danemmoyich tuniiya ittoshina tookkii hammii beetone’ gete.

⁵ “Aroochee ginee iraasheenaꞌo asheenaꞌoyich ishichibeete: ‘Andire kexon haggiꞌi diiriyaani asho beete? Bi beegaata, bi kexooch wottebe. Diqqich ginoochaa bi qitigaata, bare asho bi kexon diiriyemmone.

⁶ Woyinoon bechiꞌi bi aafoon batt maataano beete? Bi beegaata, bi kexooch wottebe. Diqqich ginoochaa bi qitigaata, bare asho bi woyinee aafoon maayemmone.

⁷ Mecheen maakkiichii batt shaagaano beete? Bi beegaata, bi kexooch wottebe. Diqqich ginoochaa bi qitigaata, baroo ebi ureen shaaggemmone’ geteete.

⁸ Iraasheenaꞌo daakki asheenaꞌoyich ishichibeete: ‘Shattii, bi mullo keqqiibeeti asho beete? Bi beegaata, bi kexooch wottebe. Ebi tuno qayigaata, biichoommon bi maneenaꞌo mullo keqqemmone’ geteete.

⁹ Iraasheenaꞌo asheenaꞌoyich ebin gettii boonoshi ciichitoyee gubb, guuphi guuphona qoodeeti asheenaꞌochi toommooch ginee iraasheenaꞌon iraashiibeete.

¹⁰ “Ikke katemoon kocha ittoshi katiniyooba, kishoon boonoshi immemmoyich shiichi echebote.

¹¹ Neech diggoona wochiꞌi katemee kelloon boonoshi qechigaata, are katemooch beeti asheenaꞌo bulli guunon tuneree neech maddeminaꞌo tunebeete.

¹² Tunebaani ‘Kishoon imaache’ iꞌi neenna koyeya boonoshi qaawigaata, are katemoon giishi yeshiree koye.

¹³ Ne Nuggishoo Doono Yeeri ne kishooch beshiiꞌi bi imiyooba, arooch beeti anaaminaꞌon goraadoona qecce wuxibe.

¹⁴ Tunebaani maacheenaꞌon, gishiishi bushiisheenaꞌon, gijjeenaꞌonaa are katemooch beeti mooyo bullinon keciree neech tuniibe. Ne Nuggishoo Doono Yeeri neech immiti, ne etteenaꞌocho tuneti mooyon deꞌi neechon tuniibe.

¹⁵ Ebin ne tuniyemmo, neyee oogichii wokkiꞌi beeti katemeenaꞌo bulli toommoochani, hini ne katinooch beeti aageteenaꞌo katemooch toonoone.

¹⁶ “Tunebaani ne woraashemmoyich ne Nuggishoo Doono Yeeri neech immiibeeti, hini aageteenaꞌo katemeenaꞌooch beeti kashechi mooyo bullin wuxi aalliibe.

¹⁷ Ne Nuggishoo Doono Yeeri neech bi gettitoommon, Hiteenaꞌon, Amooreenaꞌon, Kanaaneenaꞌon, Ferizeenaꞌon, Hiweenaꞌonaa Yebuseenaꞌonon ciroona hidi aalliibe.

¹⁸ Ebiyoo boonoshi nuggisheenaꞌoyich boonoshi goyinnee maddee beegaata boonoshi tuniibeeti, ciigiiti mooyon ne shuunemmoyich neech boonoshi dojjaachemmoyich, wotta ne Nuggishoo Doono Yeeri toommooch axaaxoon ne shuuneyaachemmoyichiye.

¹⁹ “Ikke katemoon koyi yecha meeti aaboon giichaa ne yeshiyooba, qofiyon daami bi aafo manjeebeeti mixon qecce aalliyaahine. Bi aafoon maayemmo ne tunetoyich, kuxxaahine. Ebi mixinaꞌo neech etteenaꞌo tooneenaꞌone.

²⁰ Katemoon ne yechemmi wottoon, bare mixinaꞌon kuxxaꞌa daqqoonaa macoonon shuunoona are katemee xaqqee uxeroon aroona beshoon hakkihine” iye.