Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yibbaatoo 2 - Kafa Linguistics Project


Israꞌeeleenaꞌo Qadeeshee Tiyiꞌi Arinooni Aacooch Hamo

1 Muusi Israꞌeeleenaꞌoyich ishichiye: “Aroochee Doono Yeeri taach gettitoommon wottaꞌa, Ceelle baharo waan daammiibeeti gommona barahooch hammehon. Geppechi Seyiree showee guudoona meeti aaboon yallyallimiyone.

2 “Aroochee Doono Yeeri taach ishichiye:

3 ‘Hini geppe showee guudoona yallyallimiibee yagito ittoshine; guudiree dambi-waan hambote.

4 Asheenaꞌoyichoo ishichi gete: “Seyiree showooch beeti ittoshi maneenaꞌo tuneti Esayi yareenaꞌo showoona besheya ii beeto ittoshine. Boonoshiyoo ittoshin shattemminaꞌone. Boonoshi toommooch mooyon qaawiyaahote. Ittoshi qelloon ariibote!

5 Geppechi Seyiree showoon bi hajjoo tuniyaꞌa Esayich ta immetoyich, ebi boonoshi showoochee ittoshich ikke xaammee showoonolla imaachemmo taane. Ebich boonoshin qaawiyaahote.

6 Ittoshi maayemmi maayoon boonoshi waanee gijjoona kemebote. Ittoshi uchemmi aaconoo ebiyoommon gijjoona kemebote” gete’ iye.

7 “Doono Yeeri am shaahoon ittoshi kishoona ittoshi shuuneti mooyo bullina ittoshin bi diirito gaata shalligibote. Ebi shaahe gamini barahoona ittoshi shaꞌee beehooba, ittoshich qaawiibeeti mooyon imona ittoshin gaachetone. Ebi aabbe naton ittoshina tookkii bi tunetoyich, amoonolla mucceyaano ittoshine.

8 “Ebina Seyiree showooch beeti, no maneenaꞌo tuneti Esayi yareenaꞌo showee gaꞌoona beshaꞌa hammehone. Tunebaani Etsiyoon Geberi katemoonaa Elaati katemoonoochee Yoordaanoosi bambooch besheꞌi Ceelle baharooch daammiibeeti gommona hamaano noone. Nowoo wottaꞌa Moꞌabee barahoo qannina hammehon.

9 “Doono Yeeriyoo taach: ‘Ari katemoon Looxichi shiijjereenaꞌoyich boonoshi hajjoo tuniyaꞌa ta immetoyich, boonoshi showoochee ciroona ittoshich imaachemmo taane. Ebich Moꞌabee asheenaꞌo toommooch mooyon qaawiree, ittoshina tookki boonoshi koyemmoyich tuniyaahote’ itone” iye.

10 Aroyee aaf giidechinaꞌonaa meetinaꞌona tuneti Eemeenaꞌo are showooch beeheete. Boonoshiyoo Anaaqeenaꞌochoommon neex genjeenaꞌone.

11 Anaaqeenaꞌochoommon boonoshiyoo Refayeenaꞌo getaa ceekkee beetinaꞌone. Tunebaani Moꞌabeenaꞌo boonoshin Eemeenaꞌo iꞌi ceeggiyeete.

12 Aroyee aaf Hooreenaꞌo wotta Edoomee showooch beeheete. Tunebaani Israꞌeeleenaꞌo Doono Yeeri boonoshich immiti showoochee boonoshi etteenaꞌon yookkii kichoommon, Esayichi shiijjereenaꞌo boonoshin yookkii aalliichii, boonoshi showooch koteheete.

13 Muusi daakkiꞌi ishichiye: “Aroochee Doono Yeeri ‘And tiyi Zereedi aacon kimbote’ bi getaa, kimmehone.

14 “Qadeesh Barinee tiyaꞌa, Zereedi aacon no kimmemmi wottoon, shaashaa shimitte nato tunehe. Ebiyooba Doono Yeeri tuniiya bi wogetoommon, ginee koyechinaꞌo tuneti, aroobee shiijjereenaꞌo bulli qitii ciiretinaꞌone.

15 Doono Yeeriyoo boonoshi bullin bi aalliimmi wottoon, boonoshin naxehe.

16 “Ginee koyechinaꞌo boonoshi daggoochee qitii ciiretoyee gubb,

17 Doono Yeeri taach ishichiye:

18 ‘Hanaach Moꞌabee showoon Ari katemee gaꞌoona kuxi beshemmo ittoshine.

19 Boonoshi hajjoo tuniiꞌa boonoshich ta immeti showoochee amoonolla ittoshich imaachemmo ta tunetoyich, Looxichi shiijjereenaꞌo tuneti Amooneenaꞌo showee daarooch ittoshi shagigaata, boonoshi toommooch mooyon qaawiree, ittoshina tookki boonoshi koyemmoyich tuniyaahote’ itone” iye.

20 Ebi aroo wotta Refayeenaꞌo showoo getteehe. Aroyee aaf Refayeenaꞌo arooch beebee echetinaꞌone. Tunebaani Amooneenaꞌo boonoshin Zumizumeenaꞌo ii ceeggiibee echetinaꞌone.

21 Zumizumeenaꞌo giidechinaꞌo, meetinaꞌonaa Anaaqeenaꞌochoommon neex genjeenaꞌonane. Tunebaani Doono Yeeri boonoshin aalliihe. Amooneenaꞌo boonoshin yookkii kichiichii, boonoshi showooch koteheete.

22 Doono Yeeri Seyiree geppe showooch beeti Esayichi shiijjereenaꞌo tuneti Edoomeenaꞌoyich ebiyoommi mooyon tuniitone; biyoo Hooreenaꞌon aalliitone. Ebina Edoomeenaꞌo boonoshin yookkii kichiichii, are showooch koteheete; hanaach beddaahaa arooch beetinaꞌone.

23 Meditiraanee baharee gashoona Gaaza beddaahaa beeti showooch koteti Aweenaꞌo toommooch shaggito, ebiyoommi mooyone. Kafitooree showoochee waati Kafitooreenaꞌo boonoshin aalliiꞌi, boonoshi showoon woraashiyeete.

24 Muusi Israꞌeeleenaꞌoyich ishichiye: “Moꞌabee showoon no beshetoyee gubb, Doono Yeeri nooch ‘And tiyi qaxiriree Arinooni bamboon beshebote. Heshibon beechii qeejjiibeeti Amooreenaꞌo taatoo Sihooninaa bi showoonon ittoshi kishooch beshiyaꞌa immeto taane. Biin koyi bi showoon woraashoona ikka getote.

25 Hanaachina tiijji showee toommo bulliich beeti asheenaꞌo ittoshin oogichi boonoshi shattemmoyich tuniyemmo taane. Ittoshi mooyo getteetaa boonoshi waayegaata, keqqoona qewemminaꞌone’ itone” iye.


Israꞌeeleenaꞌo Taatoo Sihoonin Kochii Wochoo
( Haddoo 21:21-30 )

26 Muusi Israꞌeeleenaꞌoyich ishichiye: “Aroochee Qedemooti barahoochaa Heshiboni taatoo Sihoonich diggee wochoon wochaa daachiiho. Ishichaanoo iyo:

27 ‘Ne showoona kuxi no beshemmoyich nooch daaggibe. Gommon yeshiree baachalli no hammemmo, qanna yoocha getaachemmo noone.

28-29 No maayemmi maayoonaa no uchemmi aaconoyich gijjoon qoccemmo noone. Seyiree showooch beeti Esayichi shiijjereenaꞌo, wotta Ari beeti Moꞌabeenaꞌo boonoshi showoona kuxi no beshemmoyich boonoshi daaggoommon, Yoordaanoosi aacon kimi, no Nuggishoo Doono Yeeri nooch immiibeeti showooch no giyemmi wottoon, ne showoona kuxi no beshemmoyich baach daaggibe’ iyoye.

30 “Tunebaani Heshiboni taatoo Sihooni bi showoona no beshemmoyich daaggoon qajjiye. Ebiyoo no Nuggishoo Doono Yeeri and ebi bi tuniitoommon, no kishooch beshii biin imma iꞌi bi mulloon bi muumiitoyich, biinoo babberoo bi tuniitoyichiye.

31 “Aroochee Doono Yeeri taach ishichiye: ‘Ebiyoche, Sihooninaa bi showoonon ittoshich immeto taane. Bi showoon woraashiree arooch gafibote’ iye.

32 “Sihooniyoo bi ginee naayinaꞌo bullin yechiꞌi noonna koyeya Yahaatsi katemooch waahe.

33 Tunebaani no Nuggishoo Doono Yeeri biin no kishooch beshiiꞌi immiye. Nowoo biin, bi anaami bushiishoonaa bi ginee naayinaꞌo bullinon wuxiyon.

34 Ebi arooba katemoo bullin yechaꞌa happaa aalliihon; arooch beeti asheenaꞌon, anaamon, maacheenaa bushiishoonon wuxaa aalliihon; ikkoonolla kashoona echiyaano noone.

35 Tunebaani gijjeenaꞌonaa are katemeenaꞌoochee no daneti mooyo bullinon baach keccaꞌa daammehone.

36 Arinooni bambee daarooch beeti Aroꞌeeri katemoonaa bambee daggooch beeti katemoonoochee tiijjiꞌi Gilaadee showooch beddaahaa beeti xaqqee uxerechi katemeenaꞌoochee noon mawito ciroona aalloone. No Nuggishoo Doono Yeeri bullin no kishooch beshiiꞌi immiye.

37 Tunebaani, Amooneenaꞌo showooch, ebiyoo Yaabooqi aaco wocciibeeti showee daaroonaa geppe showooch beeti katemeenaꞌonooch shagaano noone. Wotta no Nuggishoo Doono Yeeri no hamaachemmoyich bi gettiti xaaꞌoo bulliich hamaano noone” iye.

SIM International, 2020.

ကြှနျုပျတို့နောကျလိုကျပါ:



ကြော်ငြာတွေ