Yibbaatoo 19 - Kafa Linguistics Project

Shoobi Katemeenaꞌo

¹ Muusi Israꞌeeleenaꞌoyich ishichiye: “Ne Nuggishoo Doono Yeeri boonoshi showoon neech bi immiibeeti aageteenaꞌon hidii bi aalliihooba, newoo boonoshin yookkaa kichaachaa boonoshi katemoonaa boonoshi kexonooch ne kotehooba,

^2-3 ne Nuggishoo Doono Yeeri ne hajjemmoyich neech bi immiibeeti showoon keejj beera qoodibe. Ebi keejj beera qoodeeti showoochee keejje katemoon qanniibe. Asho iritaalloon arooch bi shaggemmoyich, ebi katemeenaꞌooch shakkiibeeti gommonoo qanniibe. Ebina ashoon wuxiti asho ebi katemeenaꞌoochee ikkooch murici hami wodemmone.

⁴ “Ashoon wuxiti ashich tunemmi doyoo ebine. Aroyee aaf kaaro boonoshi daggooch aalloon ariyaanoon diqqoona ashoon wuxiti asho ebi katemeenaꞌoochee ikkooch muriciree hami wodibe.

⁵ Shaahiyoochaa, ikke asho mixon kuxxa bi nuuchoona tookkii kubb hammii mixon qeccee bi beetaa, qofiyo bi tuuttoochee (miꞌoochee) kaaceꞌi bi nuuchoon yexaa bi qitigaata, ebi uro are katemeenaꞌoochee ikkooch murici hamiree wodibe.

⁶ Ikke katemoo baach bi tunegaata, wohi gommo bi tunetoyich nichoon kichecho ippoona yoohi dabbi yeshiree, qita bedaani ashoon wuxemmone. Aroyee aaf kaaro boonoshi daggooch aalloon diqqoonane bi wuxito.

⁷ ‘Keejje katemeenaꞌon bariibe’ ta ito ebichiye.

^8-9 “Ebi hanaach neech ta gettaabeeti getoon ceechaa ne quyegaata, biinoo shunnaa neech bi bekkiiti gommona hammaabeeto ne tunegaata, ne Nuggishoo Doono Yeeri ne qaabbechinaꞌoyich wogeꞌi bi gibenikkitoommon, ne showoon gamichemmone; ne qaabbechinaꞌoyich bi gibenikkiti showoo bullin neech immemmone. Ebi tunehooba, hini keejje katemeenaꞌochi toommooch bare keejje katemeenaꞌon daakkiree qanniibe.

¹⁰ Ebin ne tuniigaata, ne Nuggishoo Doono Yeeri ne woraashemmoyich neech bi immiibeeti showoochaa xalle ashi damoo ufeyaachemmone; xalle ashi damoo ufegaata, gondo ne toommooch tunemmone.

¹¹ “Tunebaani ikke asho biinoommi bi manoon shixxiꞌi, aashee quyeebee biin yexxii wuxiichii, ebi katemeenaꞌoochee ikkooch muriccii bi hamigaata,

¹² bi beebee echeti katemeexi geeneenaꞌo uro aroochee bi woyemmoyich tuniibeete. Nichoon kichechoyich beshii imbeete; uroo qitibe.

¹³ Biich ariqqeyaahine. Mooyo neech bi mashaamemmoyich, xalle ashi damoon ukkoona tuneti gonde mooyon Israꞌeelee showoochee wokkiibe.

Showee Danee Malletoon Waaxxi Qayo

¹⁴ “Ne Nuggishoo Doono Yeeri ne woraashemmoyich neech bi immiibeeti showoochee neech icheti budochi daarooch qaabbechinaꞌo gedditi, ne giyoonaa neennochi danee malletoon waaxxaahine” iye.

Kootoon Miixeebeeti Ashi Toommooch Tunemmi Mooyo

¹⁵ Muusi Israꞌeeleenaꞌoyich ishichiye: “Ikke ashoon ‘Gondetone’ woyee ‘axaaxoon shuunetone’ getoyich ikke miixoo baach bedaache. Ebi mooyon xiishoyich gutte woyee keejje miixoo qaawiihe.

¹⁶ “Ikke asho baroon ‘Doono Yeeri toommooch hukkoon shuunetone’ iꞌi kootoon bi taggegaata,

¹⁷ boonoshi guttiyona Doono Yeeri aafooch, aroobee yemeenooch maddeebeeti qeesheenaꞌonaa woraaferasheenaꞌona waan hambeete.

¹⁸ Woraaferasheenaꞌoo ebi mooyon manjii echebeete. Ebi uro biinoommi bi manoon bi taggeto kootoon bi tunegaata,

¹⁹ bi manoochi toommooch tuniiya bi gabitoommon bi toommooch tuniibote. Ebin tuniyoona ebiyoommi gonde mooyon ittoshi daggoochee wokkiibote.

²⁰ Echeti asheenaꞌo ebin waayeree shattemminaꞌone; ebiyoommi gonde mooyo ne daggooch wochinnoon shuuneyaachemmone.

²¹ Ebiyoommi mooyoyich ariqqeyaahine. Ashoon wuxito qitibe; aafoon dookkito bi aafo dooge; gashoon tiichito bi gasho tiishebe; kishoon tiichitochi kishoo, baatoon tiichitochi baatoo tiishebe” iye.