Yibbaatoo 16 - Kafa Linguistics Project

Beshee Baaroo

¹ Muusi Israꞌeeleenaꞌoyich ishichiye: “Ne Nuggishoo Doono Yeeri Abiibi agenooba, xumoona Gibitsee neen bi kichitoyich, ebi agenooba Beshee Baaroon baariree ne Nuggishoo Doono Yeerin oogiibe.

² Ne Nuggishoo Doono Yeeri biich ittoshi goyinnemmoyich bi kaacciti xaaꞌoochaa, Beshee Baaree deejjoon ne deejjaa beegaata, ne miimoochee woyee ne bagoochee woyee ne emmishoochee bashiree biich deejjibe.

³ Ebi meenon ne maa beegaata, shittoo gedaa kachiti koshona maayaahine. Beebee ne echeti Gibitsee afaafinoona ne keyiyooba ne tuniitoommon, shabaatte qemi wottoon shittoo giyaani koshon maayemmo neene. Ebiyoo xuuxee kosho getteyemmone. Ebin tuniyoo Gibitsee ne kecheti aaboon, kashoona ne beemmi yemeeno bullin neech shalligichemmone.

⁴ Shabaatte qemi wottoon ne showooch beeti asho koni waanona, shittoo danaaye. Batti batti aaboobee xum ne bashiti gijjee meenoochee amoonolla echiiree bi yaachich, bi qeyemmoyich tuniyaahine.

⁵ “Ne Nuggishoo Doono Yeeri neech bi immiibeeti katemeenaꞌoochee aabiichaanona, gijjoon bashiree Beshee Baaree deejjoon giddiyaahine.

⁶ Tunebaani ne Nuggishoo Doono Yeeri bi shigo aroochaa bi ceekkemmoyich bi kaaccemmi xaaꞌoochaa, ebi aroochaa Beshee Baaree deejjoon deejjibe. Ebin ne tuniyemmo, aabe gimooch, showoo xumeechaa, Gibitsee ne kecheti saatoochiye.

⁷ Ebi meenon ne Nuggishoo Doono Yeeri kaacciti xaaꞌoochaa kachiiree mame. Bi dechara ne duukkaanooch wotteree hambe.

⁸ Shiritte qemi wottoon shittoo giyaani koshon mame. Shabaattee ciirooba ne Nuggishoo Doono Yeerich yaafeeti kiceyee aaboon tuniibe. Arooba shuunoon shuuneyaahine” iye.

Maayi Qeci Baaroo

⁹ Muusi Israꞌeeleenaꞌoyich ishichiye: “Maayoon qecoyich ne wonniti aaboochee tiijji shabaatte kaallee shabaatte qemon haddibe.

¹⁰ Aroochee ne Nuggishoo Doono Yeeri neen bi diiritoommon, ne daaggoona ne giddiibeeti wojjoon giddiiree, ne Nuggishoo Doono Yeerin oogiyoona Maayi Qeci Baaroon baaribe.

¹¹ Newoo, ne anaami bushiishoonaa ne maache bushiishoona, ne guuninaꞌonaa ne gonneenaꞌona, ne beeti katemooch koteti Lewee asheenaꞌonaa shiqqeenaꞌona, nihaalleenaꞌonaa neenna tookkii beeti xuumeenaꞌona, ne Nuggishoo Doono Yeeri biich ittoshi goyinnemmoyich bi kaacciti xaaꞌoochaa, bi aafoochaa emiremmo ittoshine.

¹² Newoo ne qelloona Gibitsaa guuno tunaꞌa ne beemon batteyaahine. Ebi qociyoo bullin manjii quyebe” iye.

Bashee Baaroo

¹³ Muusi Israꞌeeleenaꞌoyich ishichiye: “Ne maayoon buchaꞌa ne kicitoyee gubb, woyinoonoo hiiccaꞌa ne ciichitoyee gubb, shabaatte qemi wottoon Bashee (Yambaaree) Baaroon baaribe.

¹⁴ Ebi baaroona ne, ne anaami bushiishoonaa ne maache bushiishoona, ne guuninaꞌonaa ne gonneenaꞌona, Lewee asheenaꞌonaa shiqqeenaꞌona, nihaalleenaꞌonaa ne beeti katemeexi xuumeenaꞌona emiribote.

¹⁵ Ne Nuggishoo Doono Yeeri ne gocheti maayoonaa ne kishoona ne shuunaabeeti mooyo bullina neen diiremmo bi tunetoyich, ne Nuggishoo Yeeri kaacciti xaaꞌoochaa shabaatte qemi wottoon baaroon baaribe. Ebina newoo oogichi emiremmo neene.

¹⁶ “Natooch keejje wottoon, ebiyoo Shittoo Giyaani Kochi Baarooba, Maayi Qeci Baaroobinaa Bashee (Yambaaree) Baaroobinooch, Israꞌeelee asho tuneti anaamo bulli ne Nuggishoo Doono Yeeri kaacciti xaaꞌooch, bi aafooch giddebe. Doono Yeeri aafooch shokke kishoon giddaayeete.

¹⁷ Ne Nuggishoo Doono Yeeri neen bi diiritoommon, asho bi hakki hakkoommon imbe” iye.

Kaachii Nalleechon Muusi Israꞌeeleenaꞌoyich Geto

¹⁸ Muusi Israꞌeeleenaꞌoyich ishichiye: “Ne Nuggishoo Doono Yeeri neech bi immimmi katemoo bulliich, ne yoodi yoodoyich, woraaferasheenaꞌonaa bare iraasheenaꞌonon ukkiriibe. Boonoshiyoo asheenaꞌochi toommooch kaachi nallibeete.

¹⁹ Boonoshiyoo dayinnetoona nallibeete; ashi aafoon ciiniree nallaayeete. Xucco ariyechinaꞌo aafoon daayiibeeto, kaameenaꞌochi yibbaatoon xummiibeeto bi tunetoyich, xuccoon maayaayeete.

²⁰ Kashoona ne beeyemmoyich, ne Nuggishoo Doono Yeeri neech immimmi showoon ne woraashemmoyich dayinnetoona baach nallibe.

²¹ “Ne Nuggishoo Doono Yeerich deejjee gudoon ne shuunaa beegaata, bi gaꞌooch mixoochee shuuneeti, nuggishee Asheeri misiloon neechiyaahine.

²² Goyinnee xaqqee giimboonoo neechiyaahine. Ebin ne Nuggishoo Doono Yeeri shixxii beetone” iye.