Yibbaatoo 15 - Kafa Linguistics Project

Hiishoo Maareebeeti Nato

¹ Muusi Israꞌeeleenaꞌoyich ishichiye: “Shabaatti shabaatte nati ciirooch, hiishoon maaribe.

² Ebin ne tuniyemmo eechireeshiye: Asho koniyoona Israꞌeelee asho tuneti bi manoyich bi erettiiti hiishoon maaribe. Doono Yeeri hiishoo maareyemmoyich bi awaajjitoyich, erettiito bi erettiiton Israꞌeelee asho tuneti bi manoo waanee echaaye.

³ Shiqqoo ne waanee eretteton echoon hakkihine. Tunebaani Israꞌeelee asho tuneti ne manoo ne waanee eretteti hiishoo bullin qaye.

^4-5 Ne Nuggishoo Doono Yeerichi qaaroon waayaꞌa, hanaach neech ta gettaabeeti ebi geteenaꞌo bullin manjii ne quyegaata, ne Nuggishoo Doono Yeeri giyi ne woraashemmoyich neech bi immiibeeti showoochaa neen diiremmone. Ebich girecho ne daggooch daneyaachemmone.

⁶ Ne Nuggishoo Doono Yeeri neech bi gibenikkitoommon, neen diiremmone. Newoo meeti aagetoyich erettiyemmo neene; tunebaani ne, koni waaneenona eretteyaachemmo neene. Meeti aagetoon hajjemmo neene; tunebaani aagetoo aabiyona neen hajjaachemmone.

⁷ “Ne Nuggishoo Doono Yeeri neech immiibeeti showooch beeti katemoochee aabiichona girechi Israꞌeelee asho tuneti ne manoo bi beegaata, biich maacoon manjiyaahine. Biin gaachoochee ne kishoon gubb wochiyaahine.

⁸ Maac deꞌoon tuneree, biich qaawiimmi wottoon erettiibe.

⁹ ‘Hiishoo maareebeeti shabaattinnee nato katinnitone’ geti gabiree, girechi ne manoochi toommooch ne aafoon ne gondiyaachemmoyich, ebiyoommi gonde gaboo ne mullooch bi beetaachemmoyich, amoonolla biich ne bayaachemmoyich ne qelloon ariibe! Ebin ne tuniigaata, Doono Yeer waan bi cookaa, ne toommooch axaaxoon tuneree haddeyemmone.

¹⁰ Ne kishoon maggii, mulloochee tiijjiree biich imbe. Ebina Doono Yeeri ne kishoona ne shuuneti mooyo bullina neen diiremmone.

¹¹ Girechinaꞌo are showoochee aalleyaachemminaꞌone. Ebich girecho tuneꞌi gaacheyoon qaawiibeeti Israꞌeelee asho tuneti ne manoyich ne kishoon maggiiree ne immemmoyich, neech gettaabeeto taane.

Guunon Guuchittinoochee Kichoo

¹² “Hibiree asho tuneti ne manoon woyee ne maneen ne kemegaata, shiritte naton neech bi maddemmoyich tuniibe. Shabaattinnee natooba gawukki daachiibe.

¹³ Gawukkaa ne daachii beegaata, shokke kishoon bi hammemmoyich tuniyaahine.

¹⁴ Ne gijjoochee, buchaa ne beeti ne maayoonaa hiiccaa ne beeti ne woyinee uyoonoochee kishoon maggiiree biich imbe. Ne Nuggishoo Doono Yeeri neen bi diiritoommon tuniiree imbe.

¹⁵ Newoo ne qelloona guuno tunaꞌa Gibits ne beemon, ne Nuggishoo Doono Yeeri aroochee neen biisheꞌi bi kichoonoo batteyaahine. Hanaach ebi getoon neech ta gettaabeeto ebichiye.

¹⁶ “Tunebaani ne guuno neennaa ne kechi asheenaꞌonon shunniꞌi, neenna tookkii beemo biich bi gaawetoyich, ‘Ne waanee bari hamaache’ bi getigaata,

¹⁷ ne kechi kellee shaaqqee gaꞌooch bi neexemmoyich tuniichi, aroochaa ikke bi waamon mutoona hote. Ebina biyoo bulli yemeenoon neech guunon tunemmone. Ne gonneyichoo ebiyoommon tuniibe.

¹⁸ “Ne guunon gawukkiꞌi daachiyoo maggoo tuneree neech bekkaaye. Shiritte naton neech bi maddeto, gijjoona shuuneebeeti ashichoyee gutte kisha bedoone. Ebin ne tuniigaata, ne Nuggishoo Doono Yeeri ne shuunaabeeti mooyo bullina neen diiremmone.

Shiichii Shiijjeti Gijjeenaꞌo

¹⁹ “Ne miimoochee, ne bagoonaa ne emmishoonoochee shiichii shiijjeti anaamo bullin ne Nuggishoo Doono Yeerich kichibe. Shiichii shiijjeti ne gattoona goyoon gochaahine. Shiichii shiijjeti ne bagee eexonoo caggaahine.

²⁰ Ne Nuggishoo Doono Yeeri kaacciti xaaꞌoochaa neennaa ne kechi asheenaꞌona nati natona, ne Nuggishoo Doono Yeeri aafoochaa maayemmo ittoshine.

²¹ Tunebaani ebi gijjoo baata sheqqo woyee aaf doogo woyee bachiti mooyo amolla bi achooch beeto bi tunegaata, ne Nuggishoo Doono Yeerich deejjoo tunii giddiyaahine.

²² Ebi gijjoon ne beeti katemoochaa mame. Xiixxeen woyee doolloon mamoommon xalle ashoonaa xalleyaani ashoona mame.

²³ Tunebaani damoon aacochoommon showooch tibibani, maayaahine” iye.