Yibbaatoo 14 - Kafa Linguistics Project

Eefooba Tuneyaachemmi Mooyinaꞌo

¹ Muusi Israꞌeeleenaꞌoyich ishichiye: “Ittoshi Nuggishoo Doono Yeerich bushiishoo ittoshine. Ebich qititi ashich ittoshi eeppii beegaata, ittoshi achoon gari qoccaahote. Ittoshi qelloonoo cakkeyaahote.

² Ebiyoo ittoshi, ittoshi Nuggishoo Doono Yeerich yaafoo ittoshi tunetoyichiye. Wotta, bi hajjee asho ittoshi tunemmoyich, showee toommooch beeti asho bulli daggoochee Doono Yeeri ittoshin bi kaaccitoyichiye” iye.

Xalle Gijjeenaꞌonaa Xalloo Tuneyaani Gijjeenaꞌona

³ Muusiyoo daakkiꞌi ishichiye: “Eeꞌo tuneti mooyon ciroona maayaahote.

⁴ Bashiree ittoshi maayemmo, gattoo, bago, emmisho,

⁵ xiixxee, boyijjo, doolloo, kubbi emmisho, geppe xaaꞌooch beeti bare kubbi emmisho, boriheenaa kubbi bagoononiye.

⁶ Manjaanee beetonaa bi shanekkoo kappheetona tuneti gijjoo tuneba cooxo aabinona mamon hakkihine.

⁷ Tunebaani manjaanee beetinaꞌo woyee boonoshi shanekkoo kappheetinaꞌo daggoochee eboshin maayaahote: gaaleen, goroollisheenaa ukkecheenon maayaahote. Eboshi manjaanee beetinaꞌo boonoshi tunetaanoona, boonoshi shanekkoo kappheyaano bi tunetoyich, ittoshi waanaa eeꞌeenaꞌone.

⁸ Wotta gudinon maayaahote. Bi shanekkoo kappheeto bi tunetaanoona, manjaaneyaanoone. Ebiyoo ittoshi waanaa eeꞌoone. Bi meenon ciroona maayaahote. Bi meeshooch ittoshi kishoon shakkiyaahote.

⁹ “Aachi daggooch beeti halleenaꞌo daggoochee qoshoommi mooyonaa shoxxoona bi achooch beeto amoonolla mamote.

¹⁰ Tunebaani qoshoommi mooyonaa shoxxoona bi achooch aallo amoonolla maayaahote. Ebi ittoshi waanaa eeꞌoone.

Yoobbereenaꞌo

¹¹ “Xalloo tuneti kafoo bullin mamon hakkiyote.

¹² Tunebaani booyon, aakkoon, aremoon,

¹³ gooppi gaceen, ookshooppheroonaa boonoshin shaaheenaꞌo bullinon,

¹⁴ kurecheenaa biin shaaheenaꞌo bullinon,

¹⁵ shaakkoon, qamini waajjechi yuyeen, baharee kafoon, shelli gaceenaa boonoshin shaaheenaꞌo bullinon,

¹⁶ gishiishi yuyeen, ooge waajjechi yuyeenaa nacce yuyeenon,

¹⁷ xooroon, nacce aakkoonaa haashoon yechii maabeeti aaꞌi gacoonon,

¹⁸ maannaakkoon, maaꞌimaaꞌoonaa boonoshin shaaheenaꞌo bullinon, aragoon shaahe kafoonaa shakishakoonon maayaahote.

¹⁹ “Qoshechi kashingixeenaꞌo bulli xalleenaꞌo tooneenaꞌone; eboshin maayaahote.

²⁰ Tunebaani xalleenaꞌo tuneti, qoshechi kashingixeenaꞌon mamon hakkiyote.

²¹ “Ne Nuggishoo Doono Yeerich yaafeeti asho ne tunetoyich, qititi mooyo amoonolla, maayaahine. Ne beeti katemee daggooch beeti shiqqoo bi maayemmoyich imbe. Woyee gommechi iibboyich kembe. “Emmishee bushoochi meenon bi indeechi ejjoona kiijjaahine” iye.

Asraatoon Qoco

²² Muusi Israꞌeeleenaꞌoyich ishichiye: “Ne gochaa danaabeeti maayoochee asraatoon nati natona kichibe.

²³ Bulli aaboon ne Nuggishoo Doono Yeerin shaton ne doyemmoyich, ne maayoochee, woyinee uyoonaa zayitoonoochee asraatoon, wotta ne miimoochee, bagoonaa emmishoonoochee shiichii shiijjeton, bulli aaboon biich ittoshi goyinnemmoyich bi kaacciti xaaꞌoochaa, ne Nuggishoo Doono Yeeri aafoochaa mame.

²⁴ Ne Nuggishoo Doono Yeeri, bi shigo aroochaa ceekkemmoyich bi kaacciti xaaꞌoo ne beetoochee bi wohaa, ne Nuggishoo Doono Yeeri neen diiriꞌi neech bi immitoochee, asraatoon shaaggiꞌi daamo neen bi mawigaata, ebin tuniibe:

²⁵ Ebi are maayoon kemi gijjoon ne kishooch yeshiree, ne Nuggishoo Doono Yeeri kaacciti xaaꞌooch hambe.

²⁶ Ebi are gijjoona ne qaawito amoonolla, ebi geto, gattoon, bagoon, woyinee uyoon woyee kashi uyoon ne qettoo gabito amoonolla kemebe. Ebi aroochaa, ne Nuggishoo Doono Yeeri aafoochaa neennaa ne kechi asheenaꞌona maayemmo ittoshine; emirishoo gettemmo ittoshine.

²⁷ Ne beeti katemeenaꞌooch koteti Leweenaꞌon duppaahine. Ebiyoo boonoshi qoodoo tuneti woyee boonoshi woraashiti showoo aallo bi tunetoyichiye.

²⁸ “Keejj keejje nati ciirooch, ne maayo bulliichee asraatoon deebi ne katemee daggooch kicibe.

²⁹ Ebi maayo, boonoshi qoodoo tuneti woyee boonoshi woraashiti showoo aallo bi tunetoyich, Lewee asheenaꞌoyich, wotta ne beeti katemooch koteti shiqqeenaꞌoyich, nihaalleenaꞌonaa xuumeenaꞌonoyich tunebe. Boonoshiyoo arooch waaree maa michemminaꞌone. Ebiyoo ne Nuggishoo Doono Yeeri ne kishoona ne shuunaabeeti mooyo bullina neen bi diiremmoyichiye” iye.