Yibbaatoo 12 - Kafa Linguistics Project

Doono Yeerich Goyinnee Xaaꞌoo Ikkoo Baach Tuno

¹ Muusi Israꞌeeleenaꞌoyich ishichiye: “Ittoshi qaabbechinaꞌochi Nuggishoo Doono Yeeri, ittoshi hajjemmoyich, ittoshich bi immiibeeti showooch kashoona ittoshi beemmi yemeeno bulliich manjii ittoshi quyemmi qociyeenaꞌonaa doyeenaꞌona eboshine.

² Ittoshi yookkii kichiibeeti aageteenaꞌo boonoshi nuggisheenaꞌoyich boonoshi goyinneebeeti ogooge guudinaꞌo toommooch, geppeenaꞌo toommonaa wodde waajjechi mixinaꞌo bulli baatoonooch beeti goyinnee xaaꞌeenaꞌo bullin happi ciroona aalliibote.

³ Boonoshi deejjee gudoon happi bayote. Boonoshi goyinnee xaqqee giimboon tiishi buricote. Boonoshi nuggishee Asheeri misiloon qaaqqoona michibote. Boonoshi shahalloon kuxote. Boonoshi shigo are showoochee bi aallemmoyich tuniibote.

⁴ “Ebi asheenaꞌo boonoshi nuggishoyich goyinnee beetoommi gommona ittoshi Nuggishoo Doono Yeerich goyinneyaahote.

⁵ Ittoshi Nuggishoo Doono Yeeri bi shigo ceekkemmonaa arooch bi danemmona tuneti xaaꞌoon ittoshi yoodeenaꞌo bulli daggoochee kaaccemmone. Are xaaꞌoon qaawiꞌi, arooch hammii biich goyinno ittoshich qaawiihe.

⁶ Micciibeeti ittoshi deejjoonaa bare deejjoonon, ittoshi danee beetoochee kechiibeeti asraatoonaa ittoshi wojjoonon, ittoshi mookketi tiikkeshoonaa ittoshi mullee daaggoona ittoshi immiibeeti wojjoonon, ittoshi gijjeenaꞌoochee shiichii shiijjetonoo arooch deebote.

⁷ Ebi aroochaa, ittoshi Nuggishoo Doono Yeeri aafoochaa ittoshinaa ittoshi kechi asheenaꞌona maayemmo ittoshine. Ittoshi kishoona ittoshi shuuneto bullin Doono Yeeri diiritoyich ittoshi bulli oogichi emiremmo ittoshine.

^8-9 “And beddaahaa Doono Yeerich deejjoon ittoshi giddiibeeto, ittoshi shunniti xaaꞌoo aabiichaanonane. Ebiyoo ittoshi Nuggishoo Doono Yeeri arooch ittoshi kashemmonaa woraashemmonoyich bi immiibeeti showooch batt giyaano ittoshi tunetoyichiye. Ebi arooba, and ebi hanaach hiniichaa no tuniyaa beetoommon tuniyaahote.

¹⁰ Yoordaanoosin ittoshi kimiyooba, ittoshi Nuggishoo Doono Yeeri are showoon woraashi arooch ittoshi beeyemmoyich tuniyemmone. Biyoo ittoshi etteenaꞌo bulli waanee ittoshin bi kashiitaa, diggoona beeyemmo ittoshine.

¹¹ Ittoshi Nuggishoo Doono Yeeri biich ittoshi goyinnemmoyich bi kaaccemmi are xaaꞌooch, ittoshich ta getteti mooyinaꞌo bullin deebote. Ebiyoo micciibeeti ittoshi deejjoonaa bare ittoshi deejjoonon, ittoshi danee beetoochee kechiibeeti asraatoonaa ittoshi wojjoonon, Doono Yeerich ittoshi mookketi tiikkeshoonoonane.

¹² Aroochaa ittoshi anaami bushiishoonaa ittoshi maache bushiishoona tookki, ittoshi guuninaꞌonaa ittoshi gonneenaꞌona tookki, wotta boonoshi qoodeeti woyee woraashiti showoo aallo bi tunetoyich, ittoshi beeti katemeenaꞌooch koteti Lewee asheenaꞌona tookki, Doono Yeeri aafoochaa emiribote.

¹³ Micciibeeti ne deejjoon ne shunneti xaaꞌoochaa ne deejjaachemmoyich ne qelloon ariibe!

¹⁴ Ne deejjemmo, ne yoodeenaꞌo showee daggoochee Doono Yeeri kaaccemmi ikke xaaꞌoochaa baachiye. Micciibeeti ne deejjoon ne deejjemmonaa neech ta gettaabeeti mooyo bullin ne tuniyemona, ebi aroochaa baachiye.

¹⁵ “Tunebaani ne beeti katemoo aabiichaanona, ne Nuggishoo Doono Yeeri neech immitoommon, neen xiqqiimmi haddoona, ne gijjoon bashiree mame. Xalloo tuneba xalleyaani asho koniyoona, doollee meenon woyee xiixxee meenon bi mamoommon, aroochee mamon hakkiye.

¹⁶ Tunebaani damoon aacochoommon showooch tibibani, maayaahine.

¹⁷ Ne maayoochee, ne woyinee uyoonaa ne zayitoonoochee ne kichiti asraatoon woyee ne gijjoochee shiichii shiijjeton woyee Doono Yeerich ne mookketi ne tiikkeshoo amoonolla woyee ne mullee daaggoona ne immaabeeti mooyo woyee bare wojjoo amoonolla, ne katemoochaa maayaahine.

¹⁸ Ne Nuggishoo Doono Yeeri kaaccimmi xaaꞌoochaa ne, ne anaami bushiishoonaa ne maache bushiishoona, ne guunonaa ne gonneena, ne beeti katemooch koteti Lewee asheenaꞌoo ne Nuggishoo Doono Yeeri aafoochaa maayemmo ittoshine. Ne kishoona ne shuuneti mooyo bullina ne Nuggishoo Doono Yeeri aafoochaa emiremmo neene.

¹⁹ Ne showooch ne beemmi yemeeno bullin, Lewee ashoon ne dufaachemmoyich ne qelloon ariibe!

²⁰ “Ne Nuggishoo Doono Yeeri neech bi gibenikkitoommon, ne showoon bi gamichiyooba, meenon ne xiqqemmi aabo bullin ne qaawimmi wottoon mamon hakkihine.

²¹ Ne Nuggishoo Doono Yeeri bi shigo aroochaa ceekkemmoyich bi kaacciti xaaꞌoo ne beetoochee oogeti woho bi tunegaata, neech ta gettetoommon, Doono Yeeri neech immiti ne miimoochee, ne bagoonaa ne emmishoonoochee neen xiqqiimmi haddoona bashaꞌa ne beeti katemoochaa mamon hakkihine.

²² Doollee meenon woyee xiixxee meenon mamoommon ebi aroon mamon hakkihine; xalloo woyee xalleyaani asho aroochee mamon hakkiye.

²³ Tunebaani damoon maayaahine. Kasho beeto damee daggooch bi tunetoyich, meenon kashoona tookki maayaahine.

²⁴ Aacochoommon showooch tibibani, damoon maayaahine.

²⁵ Doono Yeeri aafoochaa tato tuneti mooyon ne tuniyoona, neennaa ne shiijjereenaꞌonoyich mooyo bi kaamemmoyich, damoon maayaahine.

²⁶ “Doono Yeerich ne kichiti yaafeeti mooyonaa ne mookketi tiikkeshoonon bi kaaccemmi are xaaꞌooch yeshi hambe.

²⁷ Aroochaa meenonaa damoonon micciibeeti deejjoon tuniiree ne Nuggishoo Doono Yeerichi deejjee gudoochaa deejjibe. Meenon ne maayemmi deejjoon ne giddii beegaata, damoon deejjee gudee toommooch tibibe.

²⁸ Ebi neech ta getteti mooyinaꞌo bullin ceechi ne quyemmoyich ne qelloon ariibe! Ebin ne tuniigaata, ne Nuggishoo Doono Yeeri aafooch tatoonaa kaamoona tuneti mooyon ne tuniyoona, mooyo bulli neennaa ne shiijjereenaꞌonoyich bulli yemeenoon kaamemmone” iye.

Koote Nuggisheenaꞌoyich Boonoshi Goyinneyaachemmoyich Muusi Geto

²⁹ Muusi Israꞌeeleenaꞌoyich ishichiye: “Ittoshi Nuggishoo Doono Yeeri boonoshi showoon koyi yecha ittoshi hammiibeeti aageteenaꞌon bi aalliitaa, are showoon yeshiree arooch kotemmo ittoshine.

³⁰ Doono Yeeri ne aafoochee boonoshin bi aalliitoyee gubb, boonoshi gommon dabbiree ne olleyaachemmoyich, ne qelloon ariibe! ‘Ebi asheenaꞌo boonoshi nuggisheenaꞌoyich goyinnee maddeebee boonoshi echeto aabichiꞌiniye? Tawoo boonoshichoommon tuniyemmo taane’ getiree boonoshi nuggisheenaꞌochon ariyoyich qaawiyaahine.

³¹ Boonoshi nuggisheenaꞌoyich boonoshi goyinnee maddee beetoommi gommona ne Nuggishoo Doono Yeerich goyinne maddeyaahine. Boonoshiyoo boonoshi nuggisheenaꞌoyich goyinnee maddee boonoshi beegaata, Doono Yeeri shixxii, ciigeebeeti mooyo bullin tunii beetinaꞌone. Boonoshi anaami bushiishoonaa boonoshi maache bushiishoonolla, qaaqqooch goggiꞌi boonoshi nuggisheenaꞌoyich deejjii beetinaꞌone.

³² “Ebi neech ta getteti mooyo bullin tuniibe. Ebi arooch amoonolla daakkiyaahine. Wotta ebi aroochee amoonolla shappiiyaahine.