Yibbaatoo 11 - Kafa Linguistics Project

Doono Yeeri Bi Asheenaꞌoyich Tuniiti Gaawe Mooyo

¹ Muusi Israꞌeeleenaꞌoyich ishichiye: “Illa ebich ne Nuggishoo Doono Yeerin shune. Ne tuniyemmoyich bi qaawiibeeti mooyo bullin, bi qociyoon, bi dojjiti doyoonaa bi getoonon bulli aaboon ceechi quyebe.

^2-3 Ittoshi Nuggishoo Doono Yeeri biinna tookkii ittoshi tunoona ittoshich bi dojjiton eke and shalligibote. Ebi mooyon beeggiꞌi doyito ittoshi qelloona ittoshiyani, ittoshi bushiisheenaꞌo tooneenaꞌone. Gibitsaa worganikkiti malletoon tuniyoona Gibitsee taatoo Farooninaa bi showoo bullina oogeton xuuxemmoyich bi tuniihooba, Doono Yeeri bi oogoon, kupphe bi kishoonaa giidechi bi mochoonon bi bekkiitaa, beeggito ittoshine.

⁴ Gibitsee ginee naayinaꞌo ittoshin yookkii boonoshi dabbiyooba, boonoshin, boonoshi haresheenaꞌonaa gaarinaꞌonon Doono Yeeri Ceelle baharo qooxxemmoyich tuniiꞌi ciroona boonoshin bi aalliyoon beeggito ittoshine.

⁵ Hini xaaꞌooch waa ittoshi shaggimmi wottoon barahoochaa Doono Yeeri ittoshich tuniiti mooyon beeggito ittoshine.

⁶ Roobeeli yoodoochee tuneti, Eliyaabi bushiisheenaꞌo Daataaninaa Abiraaminochi toommooch amoon bi tuniito gaata beeggito ittoshine. Asho bulli ciinnii beetaa, showoo haawutteꞌi boonoshin, boonoshi kechi asheenaꞌon, boonoshi duukkaanoon, boonoshi guuninaꞌonaa gijjeenaꞌona tookkii qooxxiye.

⁷ Doono Yeeri ooge bi giidoona ebi bulli mooyon bi tuniyoon ittoshi hajjee aafoona beeggito ittoshine” iye.

Bi Asheenaꞌoyich Gaawe Mooyon Tuniiya Doono Yeeri Gibenikkoo

⁸ Muusiyoo daakkiꞌi ishichiye: “Hanaach ittoshich ta gettaabeeti geteenaꞌon ceechii ittoshi quyegaata, katinoon Yoordaanoosin kimiree ittoshi woraashemmi showoon kochii yeshoyich giidechon tunemmo ittoshine.

⁹ Boonoshinaa boonoshi shiijjereenaꞌonoyich imma Doono Yeeri ittoshi qaabbechinaꞌoyich wogeꞌi bi gibenikkiti, ejjoonaa eeyona xuupphiibeeti showooch meeti yemeenoon kotemmo ittoshine.

¹⁰ And giyi woraashiya ittoshi ii beeti showoo gawukkiꞌi ittoshi kechiti Gibitsee showoommo toonoone; ebi aroochaa yaroon shookkiichii daaddee bechoochoommon, aacon uchoyich aajjiibee echeto ittoshine.

¹¹ Giyiree ittoshi woraashiya ii beeti showoo geppoonaa bamboona beeti showoo, shimaayoochee amiyon daneebeeti showoone.

¹² Ebi showoo ittoshi Nuggishoo Doono Yeeri shiimee yechiibeeti showoo, nati gimoochee nati ciirooch beddaahaa, ciinoochee bi aafoon bi kuxaani showoone.

¹³ “Hanaach ittoshich ta gettaabeeti geteenaꞌon ceechi quyebote. Ittoshi Nuggishoo Doono Yeerin shunote. Ceeni ittoshi mulloona, ceeni ittoshi kashoonoo biich goyinne maddebote.

¹⁴ Ebin ittoshi tuniigaata, biyoo ittoshich naawee amiyonaa yoochi amiyonon bi goori gooroona bi dichaa, maayoon, woyinoonaa zayitoonon maci kicemmo ittoshine.

¹⁵ Ittoshi gijjeenaꞌoyich tunemmi mocoon ittoshi showooch colliyemmone. Ittoshiyoo maa michemmo ittoshine.

¹⁶ Bare nuggisheenaꞌoyich ittoshi goyinne maddemmoyich, ittoshi mullo ittoshin bi geechaachemmoyich ittoshi qelloon ariibote!

¹⁷ Ebin ittoshi tuniigaata, Doono Yeeri kaaro ittoshi toommooch cufemmone. Biyoo amiyo dihaa showoo maayoon bi shakkiyaachemmoyich shimaayoon hiccemmone. Doono Yeeri ittoshich immiibeeti gaawe showoochee kaateree aallemmo ittoshine.

¹⁸ “Illa ebich ebi ta qaareenaꞌon ittoshi mulloonaa ittoshi eengoonooch kotiibote. Batteyaanoon shalligi ittoshi beeyemmoyich, kooriree ittoshi kishoonaa baree gutte daggoonooch tifote.

¹⁹ Ittoshi bushiishoyichoo dojjibote. Kexooch ne kotaa beegaata, gommona ne hammaa beegaata, ne qeyaa beegaata, ne tiyaa beegaatoo ne noonoochee kuxaanoon gete.

²⁰ Ne kechi kellee qoomeenaꞌooch, ne katemee uxeree kelloochoo kooribe.

²¹ Ebin ittoshi tuniigaata, Doono Yeeri ittoshi qaabbechinaꞌoyich imma wogeꞌi bi gibenikkiti showooch ittoshinaa ittoshi bushiisheenaꞌona meeti yemeenoon beeyemmo ittoshine. Shimaayoo showee toommooch bi beemmi wottoon arooch beeyemmo ittoshine.

²² “Ittoshi Nuggishoo Doono Yeerin ittoshi shunnemmoyich, bi gommo bullina ittoshi hammemmoyich, biinna tookkishoo ittoshi ikkottemmoyich, ittoshi ceechi quyemmoyich ittoshich ta gettaabeeti ebi geto bullin ceechii ittoshi quyegaata,

²³ Doono Yeeri ebi aageteenaꞌo bullin ittoshi aafoochee yoohi kichemmone. Ittoshiyee beshe giidechinaꞌonaa woddeenaꞌona tuneti aageteenaꞌon yoohi kichemmo ittoshine.

²⁴ Ittoshi baatoo neexxiti showoo bulli ittoshicho tunemmone. Ittoshi showee daaro deshi-waan beeti barahoochee tiijjiree, dambi-waan beeti Libanoosi guudinaꞌooch beddaahaa, aabi-keyo waanaa Efiraaxisi aaconaa aabi-gimo waanaa Meditiraanee baharoonooch beddaahaa tunemmone.

²⁵ Ittoshi aafooch kuppheree neexemmo koniyoona aalloone. Ittoshi Nuggishoo Doono Yeeri ittoshich bi gibenikkitoommon, ittoshi shaggimmi showoo bulliich beeti asheenaꞌo ittoshin shatiree boonoshi qewemmoyich tuniyemmone.

²⁶ “Illa ebiyoche, hanaach diiroonaa ufonon ittoshi aafooch tuniito taane.

²⁷ Diiroo ittoshich bi tunemmo, hanaach ittoshich ta gettaabeeti, ittoshi Nuggishoo Doono Yeerichi getoon ittoshi ceechi gaatane.

²⁸ Tunebaani ufo ittoshi toommooch bi tunemmo, ittoshi Nuggishoo Doono Yeerichi getoon quyo ittoshi qayigaata, hanaach ittoshich ta gettaabeeti getoona hamon qajjiꞌi, ittoshi ariyaani bare nuggisheenaꞌon dabboyich badd ittoshi wottegaatane.

²⁹ Giyi woraashiya ne hammaabeeti showooch ne Nuggishoo Doono Yeeri neen bi giijjiyooba, Gerizimi guudi toommoochaa diiroon, wotta Ebaali guudi toommoochaa ufon awaajjemmo neene.

³⁰ Ittoshi arii beetoommon, ebi guudinaꞌo beeto, Yoordaanoosi aacoochaa aabi-gimo waan, Yoordaanoosi bambooch beeti Kanaaneenaꞌo showoochiye. Ebiyoo Galigali katemee gaꞌooch, Mooreehichi goree katinoochiye.

³¹ Ittoshi Nuggishoo Doono Yeeri ittoshich immiibeeti showooch giyi woraashiya Yoordaanoosin kimma ii beeto ittoshine. Are showoon hajjiꞌi arooch ittoshi kotehooba,

³² hanaach ittoshich ta gettaabeeti qociyeenaꞌo bullinaa doyeenaꞌo bullinon ittoshi tuniyemmoyich, ittoshi qelloon ariibote” iye.