Yibbaatoo 10 - Kafa Linguistics Project

Geteenaꞌo Kooreeti Andire Yalle Xaqqeenaꞌo

¹ “Aabbe areddoonaa aabbe xumoona ciiremmona, Doono Yeeri taach ishichiye: ‘Aafichoommi gutte xaqqoon xaribe. Mixoochee taabootoon shuuneree, eboshin yeshi ta waan, guudi toommooch wobe.

² Aafi ne tiicheti yalle xaqqeenaꞌo toommooch kooreeti qaareenaꞌon ebi areenaꞌo toommooch ta kooraa, taabootooch geddemmo neene’ iye.

³ “Ebina geellee mixoochee taabootoon shuunaa, aafichoommi gutte yalle xaqqoon xaraa yechaꞌa guudi toommooch kecheho.

⁴ Iitoo kiceehooba, guudi toommoochaa, qaaqqee daggoochaa Doono Yeeri ittoshich bi gettiti, ebiyee aaf bi kooritoommi aashire geteenaꞌon arooch kooriye; Doono Yeeriyoo eboshin taach immiye.

⁵ Tawoo guudi toommoochee wotteho; Doono Yeeri taach gettitoommon, ta shuuneti taabootee daggooch ebi yalle xaqqeenaꞌon kotiiho. Aroochoo beeheete” iye.

⁶ Israꞌeeleenaꞌo Beeroot Bene Yaqaanee tiyii, Moseraah hammiyeete. Ebi aroochaa Harooni qitiꞌi duukkehe. Bi bushoo Elazaari bi xaaꞌooch kereeꞌi, qeeshee guudo tuneꞌi ukkirehe.

⁷ Aroochee tiyii Gudigoda, wotta Gudigodee tiyii meeti woce aaco beeti, Yoxibaat hammiyeete.

⁸ Muusi daakkiꞌi ishichiye: “Arooba Doono Yeeri bi wogee taabootoon boonoshi shaaggemmoyich, bi aafooch neexeree boonoshi maddemmonaa bi shigoona boonoshi diiremmonoyich, Lewi yoodoon bariihe. Ebinoo hanaach beddaahaa tunii beetinaꞌone.

⁹ Ebich Lewi yoodoyich bi maneenaꞌo daggooch bi qoodoo woyee iristo aalloone. Ne Nuggishoo Doono Yeeri biich bi gettitoommon, bi iristo Doono Yeerine.

¹⁰ “Tawoo ebiyee aaf ta tuniitoommon, aabbe areddoonaa aabbe xumoonon guudi toommooch yagiyoye. Doono Yeeri arooboo wotta ta qolloon waayeꞌi, ittoshin wuxaanoon qajjiye.

¹¹ Aroochee taach ishichiye: ‘Tibe; boonoshi qaabbechinaꞌoyich imma ta wogeti showooch giyi boonoshi hajjemmoyich, ebi asheenaꞌoyee aaf shiichi qaxiribe’ iye.

Doono Yeerich Goyinnee Maddoonaa Biin Oogiyoona

¹² “Andoo Israꞌeelo, ne Nuggishoo Doono Yeeri ne waanee bi qaawiibeeto, amooniye? Ne Nuggishoo Doono Yeerin ne shattemmoyich, bi gommo bullina ne hammemmoyich, biin ne shunnemmoyich, ceeni ne mulloonaa ceeni ne kashoona biich ne goyinne maddemmoyich,

¹³ bi getoonaa bi qociyoonon ne quyemmoyichiye. Hanaach ebin neech ta gettaabeeto, mooyo neech bi kaamemmoyichiye.

¹⁴ “Shimaayoonaa shimaayeexi shimaayoona, showoonaa bi toommooch beeti mooyo bullina ne Nuggishoo Doono Yeerichone.

¹⁵ Tunebaani Doono Yeeri ittoshi qaabbechinaꞌon bi shunniti shunoo manjoo bi tunetoyich, showee toommooch beeti aageteenaꞌo bulli daggoochee, boonoshi shiijjeroo tuneti ittoshin kaacciye. Ebich and beddaahaa ittoshi biinna kaacheti asho ittoshine.

¹⁶ Illa ebich, ebiyee damba Doono Yeerich deꞌa getote. Babberittinoonoo qayote.

¹⁷ Ittoshi Nuggishoo Doono Yeeri, nuggisheenaꞌochi Nuggishoonaa dooninaꞌochi Doononane. Biyoo giidecho, hakkechonaa shattiitona tuneti Nuggishoone. Ashoon barbariiꞌi heppaache; xuccoonoo maataache.

¹⁸ Biyoo nihaalleenaꞌonaa xuumeenaꞌonoyich nallii beetone; noonna tookkii koteti shiqqeenaꞌonoo shunnii beetone; boonoshichoo maayoonaa tahoonon immii beetone.

¹⁹ Illa ebich shiqqoon shunote. Ittoshiyoo ebiyee aaf Gibits shiqqoo tuneꞌi beebee echeto ittoshine.

²⁰ Ne Nuggishoo Doono Yeerin shate. Biich baach goyinne maddebe. Biinna tookki ikkottebe. Bi shigoonoo wogebe.

²¹ Biin naadibe. Biyoo ne Nuggishoone. Ne aafoona ne beeggeti, ebi are giidechonaa shattiitona tuneti mooyon neech tuniitone.

²² Ne qaabbechinaꞌo Gibits boonoshi hammito, shabe asheenaꞌo baach tuneꞌiniye. Tunebaani and ne Nuggishoo Doono Yeeri shimaayeexi xojjenoochoommon, neen meechitone” iye.