Yibbaatoo 1 - Kafa Linguistics Project

Israꞌeeleenaꞌo Kooreebi Guudon Gawukki Hammemmoyich Yeeri Geto

¹ Hini macaafooch beeto, Israꞌeeleenaꞌo Moꞌabee showooch boonoshi beetaa, Muusi boonoshich yibbaateti yibbaatoone. Arooba kaamboon geddiꞌi boonoshi beeto, Yoordaanoosi aacoochaa aabi-keyo waan, Suufi ciinooch beeti Yoordaanoosi bambeexi barahoochiye. Ebiyoo Faraanin boonoshi ikke badd, Xofeelin, Labaanin, Hatserootinaa Dizaabinon wotta boonoshi bare badd geddiꞌiniye.

² Kooreebi guudoochee tiyiꞌi Qadeesh Barina shagoyich, Seyiri guudona daammiibeeti gommona hamigaata aaraa ikke qemi gommone.

³ Gibitsee boonoshi kechiti aabbinnee natooba, aaraa ikkinnee agenee ikkinnee qemooba, Muusi Doono Yeeri bi gettemmoyich biich gettiti mooyo bullin Israꞌeeleenaꞌoyich gettiye.

⁴ Ebiyoo bi tuneto, Muusi Heshibon beechii qeejjiti, Amooreenaꞌo taatoo Sihooninaa Ashitarooti katemoonaa Edireyi katemoonooch beechii qeejjiti, Bashaanee taatoo Ooginon kochii wochiꞌi bi wottetoyee gubbiye.

⁵ Asheenaꞌo Yoordaanoosi aacoochaa aabi-keyo waan, Moꞌabee showooch boonoshi beetaa, Muusi ebi sheeroon boonoshich yaari yaaroona xallayiꞌi getooch giyiye. Ishichiinoo iye:

⁶ “Kooreebi guudi baatooch no beetaa, no Nuggishoo Doono Yeeri nooch ishichitone: ‘Meeti aaboon hiniich yagito ittoshine.

⁷ Tiyi qaxiribote. Geppechi Amooreenaꞌo showoonaa bi guudoona beeti showoo bullinooch hambote. Yoordaanoosi bambooch, geppe showoonaa worebe showoonooch, Negeebi barahoonaa Meditiraanee baharee gashoonooch hambote. Kanaaneenaꞌo showoo bulliich, Libanoosi guudinaꞌonaa Efiraaxisi ooge aaconooch beddaahaa qaxiribote.

⁸ Ittoshich ta immaabeeti showoo ebiyoche, Doono Yeeri ta, ittoshi qaabbechi Abrahamich, Yisaaqinaa Yaaqobinoyich, boonoshi shiijjereenaꞌoyichoo imma ta wogeti, ebi showoon hami woraashibote’ itone” iye.

Muusi Ukkireenaꞌon Ukkiriyoo

⁹ Muusi Israꞌeeleenaꞌoyich ishichiye: “Tawoo arooba ittoshich, ‘Ittoshin yaabii qeejjoo ta ikkeetoyich maggoone.

¹⁰ Ittoshi Nuggishoo Doono Yeeri ittoshi shiijjeroon meechitone. And shimaayeexi xojjeno meetoommon meettito ittoshine.

¹¹ No qaabbechinaꞌochi Nuggishoo Doono Yeeri andoo ittoshin hume wottoon daakki meechibe; ittoshich bi gibenikkitoommon, ittoshin diiribe.

¹² Tunebaani ittoshi hayeebeeti, kuxeyaani hayoon ta ikkeeto shaagon aabichiree hakkehote?

¹³ Ittoshi yoodi yoodoochee yiiteenaꞌon, shalligechinaꞌonaa aricheti asheenaꞌonon kaacote. Tawoo boonoshin ittoshi toommooch ukkiriyemmo taane’ iyoye.

¹⁴ “Ittoshiyoo ‘Ebi ne getteti mooyo nooch gaawetone’ iꞌi taach wochiyote.

¹⁵ “Ebina tawoo yiiteenaꞌonaa arichetinaꞌona tuneti, ittoshi yoodi yoodee iraasheenaꞌon daammaa, humee iraasheenaꞌon, ballee iraasheenaꞌon, aachee iraasheenaꞌonaa aashire iraasheenaꞌonon tunii ukkiriihoye; wotta bare iraasheenaꞌon ittoshi yoodi yoodo bulliich ukkiriihoye.

¹⁶ Tawoo arooba nallechinaꞌoyich ‘Ittoshi maneenaꞌo daggooch beeti taggoon kaachi nallibote. Ebi taggoo Israꞌeeleenaꞌo tuneti gutte asheenaꞌo daggooch tuneba Israꞌeeloonaa shiqqoonochi daggooch, tatoona nallibote.

¹⁷ Dabiiree nalliyaahote. Gaannechonaa girechonon tachi ciinote. Dayinneto Yeericho bi tunetoyich, ashi aafoon ciini shattaahote. Ittoshich maggemmi mooyon taach ittoshi deebaa, ta aroon nallemmo taane’ iyaꞌa gettoye.

¹⁸ Ebi arooba ittoshi tuniyemmi mooyo bullin ittoshich gettoye” iye.

Muusi Qiiddechinaꞌon Wochee Daachiyoo

¹⁹ Muusi Israꞌeeleenaꞌoyich ishichiye: “Doono Yeeri Kooreebi guudoochee tiyi no hammemmoyich bi gettitoommon, nowoo aroochee tiyaa, ebi ittoshi beeggiti gaminoonaa shattiitona tuneti barahoon beshaꞌa, Amooreenaꞌochi geppe showooch waahone. Aroochee Qadeesh Barina shaggehone.

²⁰ Tawoo ittoshich ‘No Nuggishoo Doono Yeeri nooch imma ii beeti, Amooreenaꞌochi geppe showooch shaggeto noone.

²¹ Ebiyoche, no Nuggishoo Doono Yeeri are showoon nooch immitone. Hamiree, ittoshi qaabbechinaꞌochi Nuggishoo Doono Yeeri ittoshich gettitoommon, are showoon woraashibote. Shattaahote; keqqiyaahote’ iyoye.

²² “Tunebaani ittoshi bulli ta waan giddeꞌi, ‘Are showooch no gimoyee shiichiree, eke showoon qiidi beeggemmi asheenaꞌon daachiibone. Boonoshiyoo qiidi wotteree, ebi no hammaa beetooch beeti katemeenaꞌochi mooyonaa arooch no giyemmi gommonon nooch gettemminaꞌone’ iyote.

²³ “Ebi mooyo gaaweto tuneꞌi taach bekkehe. Tawoo ikkikke yoodoochee ikkikke ashoon tuniyaꞌa aaraa gutte asheenaꞌon kaaccoye.

²⁴ Boonoshiyoo tiyii geppe showooch hammiꞌi, Eshikooli bambooch beddaahaa beeti showoon qiiddiyeete.

²⁵ Are showeexi manjeebeeti michi aafoochee giishechoon yechiꞌi nooch deebiyeete; wotta no Nuggishoo Doono Yeeri nooch imma ii beeti showoo gaawe showoo bi tunoon nooch gettiyeete.

²⁶ “Tunebaani ittoshi, ittoshi Nuggishoo Doono Yeerich ‘Deꞌa getaache’ ii bi toommooch hukkoon tiijjiꞌi, are showooch giyemmon qajjiyote.

²⁷ Ittoshi duukkaanooch koteechii guruuxiibee ishichiyote: ‘Doono Yeeri noon shixxitone. Gibitsee kichii noon bi deebito, Amooreenaꞌo kishooch beshii imiree noon aalliyane.

²⁸ Illa amoochiye no hammemmo? No wochaa daachiiti no maneenaꞌo katemeenaꞌo gaawichaa uxereetinaꞌo boonoshi tunoon, boonoshi guudoona beeti xaqqee uxeroo shimaayooch shago bi tunoon, arooch beeti asheenaꞌo noyee beshe giidechinaꞌonaa neex genjeenaꞌona boonoshi tunoonaa ebiyee beshoon wotta Anaaqee yareenaꞌon arooch boonoshi beegonon nooch getona no mullo keqqoona muujjemmoyich tuniitinaꞌone’ iyote.

²⁹ “Tawoo ittoshich ‘Ebi asheenaꞌon shati keqqiyaahote.

^30-31 Ittoshi aafooch shiichiꞌi hammiibeeti ittoshi Nuggishoo Doono Yeeri, ittoshi aafoona ittoshi ciinnii beetaa, Gibitsee showoonaa barahoonoochaa bi tuniitoommon, bi, bi qelloona ittoshi qoodoon koyemmone. Hini xaaꞌooch ittoshi shaggimmi wottoon, ittoshi shaꞌeti gommo bullin, nihoo bi bushoon tiqqoommon, ittoshi Nuggishoo Doono Yeeri am shaahoon ittoshin tiqqeꞌi bi deebito gaata, ittoshi aafoona beeggito ittoshine’ iyoye.

³² “Tunebaani ebi bullin ta gettetaanona, ittoshi Nuggishoo Doono Yeeri toommooch mulloon tooꞌiyoon qajjiyote.

³³ Biyoo duukkaanoon xogi ittoshi kotemmi xaaꞌoon ittoshich bi qaawitaanona, ittoshi hammemmi boochoon ittoshich bi bekkiitaanona, xumoon giimboochoommon neexeebeeti qaaqqoona, areddoon wotta giimboochoommon neexeebeeti quboona ittoshiyee aaf shiichiꞌi bi hammitaanona, bi toommooch mulloon tooꞌiyoon qajjiyote.

Doono Yeeri Israꞌeeleenaꞌon Naxo

³⁴ “Doono Yeeri ebi ittoshi yibbaatoon waayeꞌi oogichii kaarehe; biyoo ishichii wogehe:

^35-36 ‘Ittoshi qaabbechinaꞌoyich imma ta wogeti gaawe showoon Yefuuni bushoo Kaaleebiyee damba, hini xumme shiijjeroo daggoochee koniyoona beegaachemmone. Biyoo mulloochee tiijjiꞌi Doono Yeeri taan bi dabbitoyich, bi baatoo neexxiti showoo bullin biinnaa bi shiijjereenaꞌonoyich immemmo taane’ iye.

³⁷ “Ittoshi naboona Doono Yeeri taanoo kaareꞌi, ‘Newoo wotta are showooch giyaachemmo neene.

³⁸ Arooch giyemmo ne gaachoo tuneti, Nuuni bushoo Yaasine. Israꞌeeleenaꞌo aafooch shiichiree showoon boonoshi yechemmoyich tuniyemmo biine; ebich biin kupphiibe’ iye.

³⁹ “Aroochee Doono Yeeri no bullich ishichiye: ‘Ittoshiyoo “No etteenaꞌo no gaggere bushiisheenaꞌon keciree daammemminaꞌone” ito ittoshine. Tunebaani and, ebi gondoonaa deꞌoonon barbariiꞌi ariyaani ittoshi bushiisheenaꞌoyich are showoon ta imaa giyi hajjemminaꞌone.

⁴⁰ And illa ittoshi wotteree, Ceelle baharo waan daammiibeeti gommon yeshi barahooch qaxiribote’ iye.

⁴¹ “Aroochee ittoshiyoo taach wochiꞌi, ‘Doono Yeeri toommooch axaaxoon shuuneto noone. No Nuggishoo Doono Yeeri nooch gettitoommon, hami koyemmo noone’ iyote. Ebina geppe showooch hammiꞌi koyo ittoshich kette mooyon bi shaahaa, ittoshi ikkikkoona ginee qiicoon cuyeꞌi tiyiyote.

⁴² “Tunebaani Doono Yeeri taach ishichiye: ‘Asheenaꞌoyich ishichi gete: “Hami koyeyaahote. Ta ittoshina tookki tuneyaachemmo taane. Ittoshi etteenaꞌo ittoshin koyi wochemminaꞌone” gete’ iye.

⁴³ “Tawoo ebin ittoshich gettoye. Tunebaani ittoshi waayemmon qajjiyote. Doono Yeerich ‘Deꞌa getaache’ ii, bi toommooch hukkoon tiijjiyote. Geecoona tiyiꞌi geppe showooch hammiyote.

⁴⁴ Ebi are geppe showooch beeti Amooreenaꞌo maxo gongii keyoommon kechiꞌi ittoshin kochiyeete. Ittoshinoo Seyiree showooch yookkii daammiꞌi Horimaa kochii wochiyeete.

⁴⁵ Ittoshiyoo wottee waaꞌi, ittoshin bi gaachemmoyich eeppiibee, Doono Yeerin qollehote. Tunebaani Doono Yeeri ittoshi eeppi qaaroon waayoon, ebinoo aaxxiyoon qajjiye.

⁴⁶ Ebich Qadeesh meeti aaboon yagiyone” iye.