Yaasi 9 - Kafa Linguistics Project

Gibeꞌooni Asheenaꞌo Dawushoo

¹ Yoordaanoosi aacoochaa aabi-gimo waan beeti geppe showooch, worebe showooch, Libanoosi guudooch beddaahaa beeti, Meditiraanee baharee gashooch beeti, Hiteenaꞌochi taatoo, Amooreenaꞌochi taatoo, Kanaaneenaꞌochi taatoo, Ferizeenaꞌochi taatoo, Hiweenaꞌochi taatoonaa Yebuseenaꞌochi taatoona, eboshi bulli, Israꞌeeleenaꞌo tuniiti mooyon boonoshi waayehooba,

² Yaasinaa Israꞌeeleenaꞌonon kocha ikkottee kiceeheete.

³ Tunebaani Yaasi Yaarikinaa Aayinochi toommooch bi tuniiton Gibeꞌooni asheenaꞌo waayehooba,

⁴ Yaasin dawushiya gabiyeete. Shohoon qanniiheete; geene kojjoonaa geenee xefeeti woyinee eechi mollexxoonon boonoshi kurooch xaaniyeete.

⁵ Asheenaꞌo keexee kocheti geene caammoon geddiyeete; geenee kuxeti tahoon taheheete; shuuqqii burbuqqiti shohoon yechiyeete.

⁶ Aroochee Galigala beeti Israꞌeeleenaꞌo kaambooch, Yaas waan waaꞌi, Yaasinaa Israꞌeeleenaꞌonoyich, “No waato, wohi showoocheeniye. Noonna tookki wogoon gibote” ii qolleheete.

⁷ Tunebaani Israꞌeeleenaꞌo hini Hiweenaꞌoyich, “Diqqich hini katinooch beeti asho tunemmo ittoshine. Ishigaata, ittoshina tookki wogoon no giyemmo, aabichireeshiye?” iyeete.

⁸ Boonoshiyoo Yaasich “No, ne guuno noone” iyeete. Yaasi “Ameexo ittoshine? Ittoshi waato, amoocheeniye?” ii echehe.

⁹ Boonoshiyoo ishichiꞌi wochiyeete: “No, ne guuno, ne Nuggishoo Doono Yeeri mooyon waayaꞌa, oogeti wohi showoocheeniye no waato. Gibits beeti asheenaꞌo toommooch bi tuniito bullin waayeto noone.

¹⁰ Ebiyoommon wotta Yoordaanoosi aachee beqach beeti, gutte Amooree taateenaꞌo, boonoshiyoo Heshiboni taatoo Sihooninaa Ashitarooti katemooch beechii qeejjiibee echeti, Bashaanee taatoo Ooginochi toommooch bi tuniito bullin waayeto noone.

¹¹ No showee geeneenaꞌonaa no showooch beeti asheenaꞌo bullina nooch ‘Ittoshi gommoyich shohoon shohe hami boonoshina danebote. “No ittoshi guuno noone; noonna tookki wogoon gibote” getote’ itinaꞌone.

¹² Hini no shoheti kosho ebeegote; ittoshi waan woya no kexoochee no tiyiyooba qeecone; tunebaani and ebi am shaahoon shuuqqii bi burbuqqito gaata ciinote.

¹³ Ebi woyinee uyoon no ceechiti mollexxeenaꞌo andireenaꞌone; tunebaani and am shaahoon boonoshi keexeto gaata ciinote. No taheti tahoonaa no geddeti caammoona meeti areddee shaꞌoona ciiretone” iyeete.

¹⁴ Israꞌeeleenaꞌo ebi mooyoyich Doono Yeerin echeyaanoon, ebi asheenaꞌona tookkii ikkotteꞌi boonoshi shohoochee deqqii maaheete.

¹⁵ Yaasiyoo, diggoona boonoshi beeyemmoyich, boonoshina tookkii wogoon giyiye; wotta iitee ukkireenaꞌo ebi mooyon manjiyoyich wogeheete.

¹⁶ Israꞌeeleenaꞌo Gibeꞌooni asheenaꞌona tookkii wogoon boonoshi giyiti keejje qemoyee gubb, ebi asheenaꞌo boonoshi katinooch beeti giyeenaꞌo boonoshi tunoon waayeheete.

¹⁷ Ebich Israꞌeeleenaꞌo qaxirii hammiꞌi keejjinnee qemooba, Gibeꞌooni, Kefiraahi, Beerootinaa Qiriyaat Yeꞌariimina getteebeeti Gibeꞌoonee asheenaꞌo beeti katemeenaꞌooch shaggiyeete.

¹⁸ Tunetaa iitee ukkireenaꞌo Israꞌeelee Nuggishoo Doono Yeerina wogetinaꞌo boonoshi tunetoyich, Israꞌeeleenaꞌo ebi asheenaꞌon wuxaaneenaꞌone. Ebich Israꞌeeleenaꞌo bulli, ukkireenaꞌo toommooch guruuxiyeete.

¹⁹ Tunebaani ukkireenaꞌo bulli Israꞌeeleenaꞌoyich ishichiꞌi wochiyeete: “Israꞌeelee Nuggishoo Doono Yeerina no wogetoyich, and boonoshi toommooch gonde mooyon tuniyoon hakkaachone.

²⁰ And ebiniye boonoshich no tuniyemmo: No wogeti wogoon happoo naxoon no toommooch deebemmo bi tunetoyich, kashoona boonoshi beeyemmoyich qayone.

²¹ Tunebaani no asheenaꞌo bullich mixon mitibee, aacon kitibee, beebeete” iyeete. Ebina ukkireenaꞌo gettitoommon tunehe.

²² Aroochee Yaasi Gibeꞌooni asheenaꞌon ceeggiꞌi ishichiye: “Hini no katinooch beechaa, ‘Wohoocheeniye no waato’ iyaꞌa noon ittoshi dawushito, amoyichiye?

²³ Ebich and illa uppeto ittoshine; bulli aaboon ta Nuggishoochi kechi michi mittechonaa aachi kittechona tuneti guunon tunemmo ittoshine” iye.

²⁴ Boonoshiyoo Yaasich ishichiꞌi wochiyeete: “Ne Nuggishoo Doono Yeeri, bi guuno Muusi hini showoo bullin ittoshich bi immemmonaa arooch beeti asheenaꞌon ittoshi aafoochee wuxi bi aalliyemmonoyich, bi geto xiishaa ne guuno nooch getteetone. Ebich ittoshiichee tiyitona no kashoyich oogichaa shattaꞌa, ebin tuniito noone.

²⁵ Illa and ne kishooch noone. Gaawetonaa tatoona tuneꞌi neech bekketi mooyon no toommooch tuniibe” iyeete.

²⁶ Ebich Yaasi Gibeꞌooni asheenaꞌon Israꞌeeleenaꞌo kishoochee wodiihe. Israꞌeeleenaꞌo ebi asheenaꞌon wuxaaneenaꞌone.

²⁷ Aroobee aabooba Yaasi Gibeꞌooni asheenaꞌon Israꞌeeleenaꞌonaa Doono Yeeri kaaccimmi xaaꞌooch neexeebeeti, Doono Yeericho tuneti deejjee gudoonoyich michi mittechinaꞌonaa aachi kittechinaꞌonon tuniihe. Ebi shuunoon hanaach beddaahaa shuunee beetinaꞌone.