Yaasi 8 - Kafa Linguistics Project

Aayi Katemoo Koyaa Aallo

¹ Aroochee Doono Yeeri Yaasich ishichiye: “Shattaahine; keqqiyaahine; ginechinaꞌo bullin yeshiree keyi, Aayin koye. Aayi taatoon, bi asheenaꞌon, bi katemoonaa bi showoo bullinon ne kishooch beshiyaꞌa immeto taane.

² Yaarikinaa bi taatoonochi toommooch ne tuniitoommon, ebiyoommon Aayinaa bi taatoonochi toommooch tuniyemmo neene. Tunebaani ebiyooba kecoonaa miimo bullinon ittoshi qellich tuniyemmo ittoshine. Katemee gubbaa aasheree oti quyemmi ginechinaꞌon qanniibe” iye.

³ Ebich Yaasinaa bi ginechinaꞌo bullina Aayin kocha tiyiyeete. Yaasiyoo ginechinaꞌo daggoochee ginee anaaminaꞌo tuneti asheenaꞌon, shaashe hume ginechinaꞌon kaacciꞌi xumoona daachiihe.

⁴ Boonoshichoo ishichiye: “Katemee gubbaa hami aashebote; katemoyee wokkaahote; ittoshi bulliyoo qanniree quyebote.

⁵ Taannaa taanna tookkii beetinaꞌo bullina katemooch giddemmo noone. Aayi asheenaꞌo ebiyee aaf boonoshi tuniitoommon, noon koyoyich no waan boonoshi waammona, no hilla wotteree woccemmo noone.

⁶ Boonoshiyoo ‘Ebiyee aafichoommon, andoo no aafoochee wocciiniye boonoshi beeto’ geti gabiree katemoochee boonoshin no wokkiimmi wottoon, noon yoohi dabbemminaꞌone. Ebiyoommi gommona nowoo woccemmo noone.

⁷ Ittoshiyoo aasheꞌi ittoshi beeti xaaꞌoochee keyiree, katemoon yechemmo ittoshine. Ittoshi Nuggishoo Doono Yeeriyoo katemoon ittoshi kishooch beshiiree immemmone.

⁸ Katemoon ittoshi yeshiyooba, Doono Yeeri ittoshich gettitoommon, qaaqqoona michibote; ta ittoshich getteto taane” iye.

⁹ Ebina Yaasi asheenaꞌon wochee daachiihe. Boonoshiyoo Aayaa aabi-gimo waan, Beeteelinaa Aayinochi gutte daggooch beeti aashee xaaꞌooch hammiꞌi aasheheete. Tunebaani aroobee xum Yaasi Israꞌeeleenaꞌona tookkii kaambooch qeyiye.

¹⁰ Dechara maaddoona Yaasi maaddii tiyiꞌi, ginechinaꞌon kiciye. Biinnaa Israꞌeelee ukkireenaꞌona ginechinaꞌon dabbiiꞌi Aay hammiyeete.

¹¹ Biinna tookkii beeti ginechinaꞌo bulla kechiꞌi, Aay waan katinnii, deshi-waan beeti bambee beqach kiceeheete.

¹² Yaasi uuche hum bede ginechinaꞌon yechiꞌi, Aayaa aabi-gimo waan, Beeteelinaa Aayinochi gutte daggooch aasheree boonoshi quyemmoyich tuniitone.

¹³ Aayaa dambi-waan beeti ginechinaꞌonaa Aayaa aabi-gimo waan aasheti ginechinaꞌona xaaꞌi xaaꞌoon boonoshi yechemmoyich tunehe. Aroobee xum Yaasi Yoordaanoosi bambooch qeyiye.

¹⁴ Aayi taatoo kiceeti Israꞌeelee ginechinaꞌon beeggiꞌi, biinnaa katemee asheenaꞌo bullina maaddoona guubbii, Israꞌeeleenaꞌon koyoyich Yoordaanoosi bamboo waan dugilla hammiyeete. Tunebaani taatoo katemoyee gubb aasheꞌi quyeebeeti, bare ginechinaꞌo beemon ariyaanoone.

¹⁵ Yaasinaa Israꞌeeleenaꞌona koyaa yookketinaꞌo shaahiꞌi, barahooch woceheete.

¹⁶ Ebich Aayi asheenaꞌo bulli “Dabbi yoohote” getaa ceekkeheete. Boonoshiyoo Yaasin yookkii dabbiibee, katemoyee maach kechii wokkii hammiyeete.

¹⁷ Israꞌeeleenaꞌon yookkii dabboyich, Aayinaa Beeteelinoochee keyaani ikke anaamolla aalloone. Katemee uxeree kelloon qechii duppiichii, Israꞌeeleenaꞌon yookkii dabbiyeete.

¹⁸ Arooba Doono Yeeri Yaasin “Katemoon ne kishooch beshiiree immemmo taane. Ebich ne kisheexi ginoon Aay waan ballibe” iye. Yaasiyoo bi yechiti ginoon Aay waan balliye.

¹⁹ Ebin bi tuniyahaa, aasheꞌi beeti ginechinaꞌo boonoshi aasheti xaaꞌoochee kechiꞌi, afaafinoona katemooch wocee giyiꞌi, katemoon yechiyeete. Bekkech katemoon qaaqqoona michiyeete.

²⁰ Aayi asheenaꞌo gubb wottee ciinniꞌi, boonoshi katemoo micci cufoo shimaayooch tuqii beeton beeggiyeete. Barahoo waan wocee aasheti Israꞌeeleenaꞌo boonoshin kocha boonoshi waan boonoshi wottetoyich, Aayi asheenaꞌo aabina boonoshi muriccemmo gaata gommon mucceheete.

²¹ Yaasinaa Israꞌeeleenaꞌo bullina aasheꞌi beeti ginechinaꞌo Aayin yechiꞌi qaaqqoon gedaa, cufoo shimaayooch tuqoon boonoshi beeggiyooba, guuddii wotteꞌi boonoshin yookkii dabbiti Aayi asheenaꞌon wuxii aalliyooch giyiyeete.

²² Aasheꞌi beebee, katemoon yechiti Israꞌeelee ginechinaꞌo katemoochee kechii waaheete. Areegaata Israꞌeelee ginechinaꞌo guuddii boonoshi giichitoyich, Aayi asheenaꞌo gutte daggooch tuneheete. Ebina Israꞌeelee ginechinaꞌo Aayi asheenaꞌon wuxii aalliiheete. Ikke asholla echeto woyee muriccito, aalloone.

²³ Tunebaani Aayi taatoon kashoona kecciꞌi Yaas waan deebiyeete.

²⁴ Israꞌeeleenaꞌo barahooch boonoshin yookkii dabbiti, Aayi asheenaꞌo bullin goraadoona boonoshi wuxitoyee gubb, boonoshi bulli Aayi wottee giyiyeete. Aroochee boonoshi danetinaꞌo bullin goraadoona wuxiyeete.

²⁵ Arooba Aayi asheenaꞌo bulli ciireheete; qititi anaaminaꞌonaa maacheenaꞌonochi haddoo aaraa gutte humoone.

²⁶ Yaasi Aayi beeti asheenaꞌo bullin ciroona bi ciichimmi wottoon, ginoon bi balliti bi kishoon wochaanoone.

²⁷ Israꞌeeleenaꞌo Doono Yeeri Yaasich gettitoommon, katemoochee boonoshi daneti gijjeenaꞌonaa kecoonon boonoshich tuniiheete.

²⁸ Ebina Yaasi Aayi katemoon michiye; happiinoo dichiye; ebi katemee hanaach beddaahaa aalletine.

²⁹ Aayi taatoon mixooch yooddiye. Showoo xumemmi wottoon, are mixooch heechiihe. Aabe giyemmona, ebi dubenoon boonoshi kindiyemmoyich Yaasi getaa, kindiiꞌi katemee kellooch duppiyeete. Ooge xaqqee gutoon bi toommooch gutiyeete. Ebi are xaqqee gutoo hanaach beddaahaa arooch beetone.

Yaasi Ebaali Guudoochaa Sheeroon Shemmo

³⁰ Aroochee Yaasi Ebaali guudi toommoochaa Israꞌeelee Nuggishoo Doono Yeerich deejjee gudoon shuunehe.

³¹ Doono Yeeri guuno Muusi Israꞌeeleenaꞌoyich gettitoommon, wotta Muusichi Sheeree Macaafooch bi kooreetoommon, deejjee gudoon bi shuuneto, xuuree qiico bi achooch shagaani, xareyaani xaqqoonane. Ebi aree toommooch Doono Yeerich micciibeeti deejjoon deejjiyeete; ikkittinee deejjoonoo deejjiyeete.

³² Yaasiyoo Israꞌeeleenaꞌo ciinnii beetaa, Muusichi Sheeroon kittii, xaqqeenaꞌo toommooch qiicii kooriye.

³³ Ebi tunee beetaa, Israꞌeeleenaꞌo bulli, geeneenaꞌo, iraasheenaꞌo, nallechinaꞌoo, wotta shiqqeenaꞌo, Doono Yeerichi wogee taabootoon shaaggiti, Lewi yoodee qeesheenaꞌo waan boonoshi aafoon wochiꞌi taabootee qanninaa yoochinooch neexee beeheete. Eboshi daggoochee qatinaꞌo Gerizimi guudi ciinooch, qatinaꞌoo Ebaali guudi ciinooch neexetinaꞌone. Ebin boonoshi tuniito, Doono Yeeri guuno Muusi Israꞌeeleenaꞌo diireyemmoyich, shiichii bi gettitoommoniye.

³⁴ Ebiyee gubb, Yaasi Sheeree Macaafooch bi kooreetoommon, Sheeree qaaro bullin, aroochoo kooreeti diiroonaa ufonon shemmee waayiihe.

³⁵ Yaasi maacheenaꞌo, nallefeenaꞌo, Israꞌeelee iiteenaꞌo bullinaa boonoshi daggooch beeti shiqqeenaꞌonochi aafoochaa shemmehe. Muusi gettiti sheeree qaaroochee ikkoonolla echiyaanoone.