Yaasi 7 - Kafa Linguistics Project

Akaani Shuuneti Axaaxoo

¹ Tunebaani timeeti mooyon aalliyoo qayona Israꞌeeleenaꞌo Doono Yeerich gibeneyoon qajjiyeete. Yihudi yoodoochee tuneti, Zaari bushoo, Zabidi bushoo, Karimi bushoo Akaani timeeti mooyoochee bi daammitoyich, Doono Yeeri kaaro Israꞌeeleenaꞌo toommooch aaxxehe.

² Yaasi “Hamiree showoon qiidote” iꞌi Beeteelaa aabi-keyo waan beeti, Beet Aweeni gaꞌooch beeti Aayi katemooch asheenaꞌon Yaarikee wochee daachiihe. Ebina asheenaꞌo kechii Aayin qiiddiyeete.

³ Yaas waan wottee waaꞌi, “Aayin koyoyich asheenaꞌo bulla hammaayeete. Arooch beeti asheenaꞌo giishecheenaꞌone. Ebich katemeen koyoyich gutte woyee keejje humo beddiye. Asho bulli hami aajjaaye” iyeete.

⁴ Ebich keejje hum bedeenaꞌo baach arooch hammii koyeheete. Tunebaani Aayi asheenaꞌo aafoochee wocee aalleheete.

⁵ Aayi asheenaꞌo Israꞌeeleenaꞌon katemee uxeree kelloochee tiijjiꞌi, Shebariim beddaahaa beeti dugilloon yookkiyeete. Boonoshiyoo yookkiibee dugilloochaa shaashaa shiritta bede asheenaꞌon wuxiyeete. Ebiichee tiyitona Israꞌeeleenaꞌo mullo keqqoona goojjii muujjiye.

⁶ Ebiyooba Yaasi bi tahoon keexxiye; xumemmi wottoon Doono Yeerichi taabootee aafooch baroona guufehe. Israꞌeelee geeneenaꞌoo ebiyoommon tuniiheete; boonoshi shimboochoo buttoon shakkiyeete.

⁷ Yaasiyoo ishichiye: “Woowo! Nuggishoo Doono Yeero, hini asheenaꞌon Yoordaanoosin kimiree hiniich boonoshi woyemmoyich ne tuniito, Amooree asheenaꞌoyich beshii imiree, noon boonoshi ciichemmoyich tuniyaniye? Abo kimaanoon aachee okk echebona!

⁸ Ta Doonocho, Israꞌeeleenaꞌo boonoshi etteenaꞌo aafoochee wocaa aalletinaꞌone. Illa ama getishiye ta gettemmo?

⁹ Kanaaneenaꞌonaa hini showee daggeexi asheenaꞌo bullina ishin waayeree noon giichemminaꞌone; noon wuxi aalliyemminaꞌone. Illa ooge ne shigoyicha getiree amooniye ne tuniyemmo?” iye.

¹⁰ Doono Yeeriyoo Yaasich ishichiye: “Tibe! Amoyich baroona guufenne?

¹¹ Israꞌeeleenaꞌo xuqqitinaꞌone; boonoshi quyemmoyich ta getteti ta wogoon shaaddetinaꞌone. Timeeti mooyon tiijjii daammitinaꞌone; gaajjitinaꞌone; koottitinaꞌone; eboshin boonoshi hajjee qiiceenaꞌona tookkii baccitinaꞌone; koottiinoo itinaꞌone.

¹² Israꞌeeleenaꞌo boonoshi etteenaꞌon koyoon boonoshi mawiito, ebichiye. Gubb wottee boonoshi woceto, aallo boonoshi toommooch bi nalleetoyichiye. Timeeti mooyon ittoshi daggoochee aalliyoo ittoshi qayigaata, ebiyee bekk ittoshina tookki tuneyaachemmo taane.

¹³ “Tibe! Asheenaꞌo yaafeyemmoyich tuniibe. Boonoshichoo ishichibe: ‘Israꞌeelee Nuggishoo Doono Yeeri ishichiye: “Israꞌeeleenaꞌote, timeeti mooyo ittoshi daggooch bi beetoyich, ebin ittoshi wokkiimmi wottoon, ittoshi etteenaꞌona tookki koyoon hakkaachemmo ittoshine” iye. Ebich, yaachich ittoshi qelloon qanniiree yaafeebote.

¹⁴ “ ‘Maaddoona ittoshi yoodi yoodoona tuneree giddemmo ittoshine. Doono Yeeri ta bariyemmi yoodo bi gumbi gumboona tuneree aaf beshemmone. Ta bariyemmi gumbo bi yari yaroona tuneree aaf beshemmone. Ta bariyemmi yaroo bi ashi ashoona tuneree aaf beshemmone.

¹⁵ Ebi timeeti mooyo bi waanee danemmi asho, Doono Yeeri ta wogoon bi shaaddetoyich, Israꞌeelee daggoochoo yeelliiti mooyon bi tuniitoyich, biinnaa biicho tuneto bullina qaaqqooch gokkemmone’ gete” iye.

¹⁶ Bi dechara maaddoona Yaasi tiyiye. Israꞌeeleenaꞌon boonoshi yoodi yoodoona tuneree boonoshi giddemmoyich tuniihe. Eboshiichee Yihudi yoodo bariye.

¹⁷ Yihudi yoodo bi gumbi gumboona tuneree aaf bi beshemmoyich tuniihe. Eboshiichee Zaarichi gumbo bariye. Zaarichi gumbo bi yari yaroona tuneree bi giddemmoyich tuniihe. Eboshiichee Zabidichi yaroo bariye.

¹⁸ Zabidi kechi asheenaꞌo ikkikkeree boonoshi giddemmoyich tuniihe. Aroochee Zaari bushoo, Zabidi bushoo, Karimi bushoo Akaani bariye.

¹⁹ Yaasi Akaanin “Ta bushoocho, Israꞌeelee Nuggishoo Doono Yeerich koottaahine; biichoo ne shuuneton aannibe; ne tuniiton aachaanoon and taach gete” iye.

²⁰ Akaaniyoo wochiꞌi Yaasich ishichiye: “Iberoone, Israꞌeelee Nuggishoo Doono Yeerin xuqqeto taane. Ta tuniito ebine:

²¹ Kecceti qiiceenaꞌo daggoochee Shinaaree showoochee waati ikke macecikkiti gaaboon, gutte balle sheqeelee birewoonaa aache sheqeelee nuuppheti aachoonon ciinnaꞌa dakiyoye; eboshin daammoye. Ebi qiicoon, birewoon dechiich geddaa ta duukkaanee maac showooch duukkaꞌa aachito taane” iye.

²² Ebiyooba Yaasi wocheyechinaꞌon wochee daachiihe. Boonoshiyoo Akaani duukkaanooch wocciyeete. Aroochoo birewoo dechiich tuniichaa, qiico duukketon daneheete.

²³ Duukkaanoocheenoo kichii, Yaasinaa Israꞌeeleenaꞌo bullina beetooch deebii, Doono Yeeri aafooch geddiyeete.

²⁴ Yaasinaa Israꞌeeleenaꞌo bullina Zaari yaroochee tuneti Akaanin, birewoon, gaaboon, nuuppheti aachoon, bi anaami bushiisheenaꞌonaa maache bushiisheenaꞌonon, bi miimon, bi kureenaꞌon, bi bageenaꞌonaa bi emmisheenaꞌonon, ebiyoommon bi duukkaanoonaa biicho tuneto bullinon Akoori bambooch daammiyeete.

²⁵ Yaasiyoo “Ebi shaahe iritoon amoyich no toommooch deebenne? Ebeege, hanaach ne toommoochoo Doono Yeeri iritoon deebemmone” iye. Aroochee Israꞌeeleenaꞌo bulli Akaanin, bi kechi asheenaꞌonaa bi gijjeenaꞌonon xaqqoona yexxii wuxiyeete; qaaqqoonoo goggiyeete.

²⁶ Hanaach beddaahaa bekkeebeeti, ooge xaqqee gutoon aree toommooch gutiyeete. Ebina Doono Yeeri bi kaaree shiixxoochee wottehe. Ebich hanaach beddaahaa, ebi are xaaꞌoo Akoori Bamboo getteehe.